Jerusalén ió anuax uisai uni 'iti ñuikë bana
60
Ësai ka Isaías kiakëxa: Jerusalén 'imainun Judánu tsókë unikama mitsun kamina kuati 'ain,Nukën 'Ibu kamabi kushiñuira ax ka achúshi ñu pëkikësa mitsubë 'ikën,
usa 'ain kamina mitsux ichu ichukikë anun rabumëkësa 'ikanin.
2 Kamina kuakanti 'ain, nëtë kuin tunankuatsinkë an ka me mapuia,
'imainun ka bëtsi ëmakamanu 'ikë unikama ax bë́anbëankikë an mapukënu 'ikësa 'ikën,
'aínbi ka Nukën 'Ibu ax tirítan pë́kakësa mitsunu 'iti 'ikën,
usai 'ia ka usai ka Diosan kushi mitsunu 'ia kixun bëtsi unikaman isti 'ikën.
3 Usai 'ikëbë ka bëtsi bëtsi ëmanu 'ikë unikama Dios kuëënkësabi oí tsóti tirínu 'ikësa 'iti 'ikën,
'imainun ka bëtsi bëtsi ëmanu 'ikë 'apukama atúxribi ichu ichukikë an pë́kakësanu 'iti 'ikën.
4 Jerusalénnu tsókë unikama mitsun kamina,
chairui kuainakëkin usai ka bëtsi menu tsókë unikama mitsubë timë́ti 'aia isti 'ain.
Mitsun bakë bëchikëkamax ka 'urakëoxbi uti 'ikën;
ukin ka unikaman mitsun 'ini bëchikë xanukama,
bërúanxun aín pëñanu 'aruxun bëkësa obëtsinkin bëti 'ikën.
5 Usakin bëia isi kamina 'itsaira kuëëni kuëpunchini kuaikanti 'ain,
usai 'i kamina uínsarabi kuëënkësamairai min nuitu mëu kuëënti 'ain;
usai ukin ka parúmpapa nasínua 'ikë ëmakamanua 'ikë ñu upíirabu a mitsu bëxunkanti 'ikën,
usakin bëxun ka bëtsi menu 'ikë unikama ñu kupikëirabu akama mitsu 'inánti 'ikën.
6 Usa 'ain kamina atúxa 'itsaira 'aish atun
camellonën ëma tsitsibëtsini Madián 'imainun Efá amiax 'aia isti 'ain;
usai ukin ka Sabánu 'ikë unikama an kuri
'imainun sanuira ñu aín camellonën bëi ukin an upíokin ñu 'aia kixun Dios a rabiti 'ikën.
7 Atun 'arakakë carnero 'imainun cabra Quedarnu 'ikë unikaman mitsu bëxunkë,
'imainun carnero kama Nebaiotnu 'ikëkaman bëkë
akamina mitsunmi anuxun ñuina xaroti 'akë anuxun an kuëëntisabi okin
'inaínshiti sinánxun nankë 'akësa okin upí 'itánun 'axunti 'ain,
usakin 'akëbëtan ka an anuxun a rabiti xubu upíira 'imiti 'ikën.
8 ¿Uikama kara axa kuin 'ikësai munu kuanima nianan,
ñumakuru aín 'uxtinu kuankësa 'inun kuankë ax 'it?
9 Tarsisnu 'ikë manë nunti kama ax ka atu rëkuëonbiani manë nunti kama raíri abë biranan kuatsini kuankin,
Jerusalénnu ikë unikama bëi ukin,
mitsun bëchikëkama 'urakëo bëanan, kuri manë uxua akama bëti aka ax 'ikën,
a ñukamax ka min 'Ibu Israel kaman Dios upíira a bëxunkë 'iti 'ikën,
an ka kushiira 'ixun mitsu 'akiankëxa.
10 Bëtsi menu tsókë unikaman ka anun mitsun ëma kënëara 'ikëbia rurupakama a mitsu 'axuntëkënti 'ikën,
usakin 'aia ka atun 'apukaman mitsu 'akinti 'ikën;
Nukën 'Ibun ka ax nishkin mitsu 'atima okin tëmëramiakëxa,
'aínbi ka bërí ax upí 'ixun mitsu nuibatia.
11 Jerusalén ëma kënëkë aín xëpútikama ax ka uínsaranbi xëpúkëma 'iti 'ikën;
usa 'ain ka nëtë 'imainun 'imë́bi xëpúkëma xëókikë 'iti 'ikën,
usa 'ain ka bëtsi bëtsi menu 'ikë uni ñuñuirakama atun ñu buani atsínti 'ikën,
anun bëtsi bëtsi menu 'ikë 'apukama aín unikamabë 'atsínti 'ikën.
12 Uinu 'ikë menu 'ikë 'apun kara aín unikamabëtan 'akinsama tania ax ka;
aín ëmakama këñunbi 'atima okin masókin këñúkë 'iti 'ikën.
13 Nukën 'Ibun ka Jerusalén ëmanu tsókë unikama ësokin kaxa:
“Líbano menu 'ikë unikaman ka anu 'ikë ñu upíbu a mitsu bëxúnti 'ikën,
ax ka 'iti 'ikën, pino kakë i 'imainun abeto kakë i 'imainun ciprese kakë i akaman
anuxun 'ë rabiti xubu 'upíira 'itánun mëníokin 'ati 'ikën,
usakin 'axun kamina anuxun 'ë rabikanti 'ain, ax ka 'ëx anu 'ikë xubu 'iti 'ikën.
14 An mitsu tëmëramia unikaman bakë bëchikë atux ka aí ñuumara 'ianan, kushiñuma mitsun iskëx 'iti 'ikën,
'imainun ka an mi tima unikama atúxribi mitsu bëtanain rantipuruni tsóbukin,
mi anëi kikanti 'ikën.
Mix kamina Nukën 'Ibun ëma 'ai kixun kati 'ikën.
'Imainun ka Jerusalén Dios upíira aín ëma kakin anëti 'ikën.”
15 Usa 'ain kamina mitsu rakanan,
istisama tankin miratsushi
'inun ënkësa 'itima 'ain,
usai 'ima kamina 'ën mi xënibua, 'aínbi 'ën kushiokëx kuëëni tsókanun mi 'imiti 'ain.
16 Bëtsi bëtsi menu tsókë unikaman atun piti upíira a bëxun 'inámainun,
ka 'apukamanribi ñu upíbu akama mitsu bëxúnti 'ikën;
bëxunkëxun kamina mitsun 'ëx kana Nukën 'Ibu a 'ai kixun 'unánkanti 'ain,
'unánan ka 'ëx kushiira 'ixun kana Israel unikama ië́mikin bitëkëa kixun 'unánkanti 'ikën.
17 “Usa 'ain kana manë panshian 'inánkinma kuri mi 'inánti 'ain,
'imainun kana manë iru 'inánkinma manë uxua a mi 'inánti 'ain,
'anan kana i 'inánkinma manë panshian a mi 'inánti 'ain.
'Anan kana maxá 'inánkima manë tunan mi 'inánti 'ain.
Usakin 'anan kana upiti tsótimi bukukanun 'imiti 'ain, 'imianan kana upiokinshi ñu 'anun mitsu 'amiti 'ain.
18 Usa 'ain ka Israel menu uínsaranbi ñu 'atima 'aia kuatëkënti 'aíma 'iti 'ikën,
'ianan ka amiribishi min menu masókin rurupakë 'itëkëntima 'ikën,
usa 'ikë ka anun mitsun ëma kënëara kama ax ië́mianankë kakin anëkë 'iti 'ikën'
'imainun ka aín xëkuëkama axribi anuxun Nukën 'Ibu rabiti kakin anëkë 'iti 'ikën'.
19 Usa 'ain ka nëtë́n barin pë́kamainun,
imë́ribi 'uxën pë́kakë ax kuëënkëma 'iti 'ikën,
'ëx mitsun 'Ibu 'ixun kana nëtë́tima okin mitsu pë́kati 'ain,
'ëx mitsun Dios 'ixun kana ichu ichúkikësa 'itánun mitsu pë́kati 'ain.
20 An mi pë́kakë bari ax ka uínsaranbi ain pë́kakë nëtë́tima 'ikë 'imainun ka
'uxën pë́kakë axribi nëtë́tima 'ikën,
'ëx min 'Ibu 'aish kana an mi pë́kakë 'ixun uínsaranbi nëtë́kinma pë́kati 'ain;
'ianan ka anun uni ñukëbë masá nuituti nëtëkama axribi nëtë́ti 'ikën.
21 Kamabi unikama mitsun ëmanu 'ikë ax ka upí sinánñubu 'iti 'ikën,
usai tsótika atun menubi xënibuti tsóti 'ikën,
usai 'ika 'ënbi 'apákëxa ñu upiti kookë usaribi atux 'iti 'ikën,
ax ka 'ën mëkënanbi usaka 'ën kushi 'ikë kixun ismikin 'ën 'akë 'ikën.
22 'Itsamara uni ënëx ka 'aisamaira 'inun 'uakamë 'ëoti 'ikën,
usai 'ika 'itsamara uni ax achúshi ëma chaiira 'inun 'uakamë 'ëoti 'ikën.
'Ëx kana Nukën 'Ibu 'ain,
usa 'ixun kana 'ën anun 'iti nëtë 'ikëbëa,
bënëtishi usai 'inun 'imiti 'ain.”