Usakin asérabi Dios kikësabiokin pikëmëti ñuikë bana
58
Nukën 'Ibun ka ësokin 'ë kaxa:“Rakuëtimaishi kamina munuma banai kiti 'ain,
usai 'i kamina manë banañu banokëx 'ikësa min bana 'inun kushin banati 'ain;
usai 'ikin kamina 'ën kaísa unikama atun 'akë 'atima ñukama ñuikin kati 'ain, ax ka Jacobnën rëbúnkikama 'ikën atun 'uchakëkamaribi ñuikin kati 'ain.
2 Kamabi nëtën ka 'ë baria,
usa 'ixun chuámarua tani 'ëx kikësoi 'ikatsi kiax 'ikin,
achúshi ëmanu 'ikë unikaman 'upiokin 'akësokin 'akin,
'ën bana kikësama okinma 'aia kixun;
upíokin 'ën bana kikësokin ñu 'axúnun 'ë kaia,
usakin 'ë ñukati ka 'ëx kikësabi oisa 'isatania kiax kuëënkania,
3 usai 'ibi ka kikania. ¿Uisa kupín karanuna Diosan iskëbëtanmabi pikëmëti 'ain?
¿Uisa kupín karanuna Diosan ka usai 'i tëmëraia kixun 'unánkëbëmabi usai 'iti 'ain?
Anunmi pikëmëti nëtën kamina mitsun ñukama marutishi 'anan,
a mitsun ñu mëmikë unikamaribi 'atima okanin;
4 anúnmi pikë mëti nëtë anun kamina mitsux ñukanantankëx mëëanankin
bëtsi min mëkënanbi mëëxun rëtëkin a nëtë inumikanin.
Usa ka anun pikë mëti achúshi nëtë ax 'itima 'ikën,
usai 'ikin ñukákëxunbi kana 'ën mitsun bana kuatima 'ain.
5 ¿Mitsun sinánkëx kara usakin piti mëëkin 'akë ax anun 'ëx kuëëntisa 'ikë
uínsaran karamina masá nuituti tëmërakani basi 'ikësai ñanati,
'ikin chupa chuakë pañuax chimapunu rakakë ax asabi 'iti 'ik?
¿A kaina mitsun anun pikëmëtisa kanan a nëtën ka Nukën 'Ibu usakin 'akankëbë kuëënia kixun sinánkanin?
6 'Aínbi ka usakin 'akë ax 'ën iskëx usama 'ikën.
'Ëx a isi kuëëntisabi 'itánun piti mëti ax ka ësokin 'ati 'ikën,
bëtsi unikamax ka upíokin nuibakë 'iti 'ikën,
usa 'aish ka anun uni ñu 'atima 'akëmabi tëkërëkakë manë risi të́kakë usa 'ianan,
vaca bënë tëatsimixun i anun tëkërëkakë risi churukë usaribi mitsunan 'iti 'ikën;
'ianan ka bëtsi unin tëmëramikë axribi ñankáishi 'itánun këñúkë 'iti 'ikën,
usakin 'akëx ka 'apukamaxa unimi an kuëënkësa okin 'akë ax këñúkë 'iti 'ikën;
7 'ianan ka uix kara pitiñu 'ikë an axa 'akëñuma nikë uni a aín piti 'inánti 'ikën,
'ianan kamina mitsun uix kara xubuñuma 'ikë a min xubunua 'inun 'imiti 'ain;
'imianan kamina chupañuma 'ikë bëtsi uni 'inánan
kamina misaribi uni aribi 'akinti ëntima 'ain.
8 Usa 'ain ka bëtsi 'akinkëbë mitsun tsóti ax barin urukin nëtë pë́kabëtsinkë usaribi 'iti 'ikën,
usai 'ikëbë ka mitsun ñu 'atima 'akëkama nami tëakë ax bënëtishi mókësaribi 'inun mëníokati 'ikën.
Usai 'ikëbë upiti tsókëbë kana 'ëx Dios kamabi kushiñu 'aish mitsubë 'iti 'ain.
9 Usa 'ain kana 'ëmi ñukákëxun, 'ënribi ënu kana 'ai kixun mitsu kati 'ain;
'ianan kana munuma banakinmi 'akinun kixun ñukákëxun 'ënribi mitsu: Ënu kana mitsu 'akinux 'ai kixun kati 'ain.
Mitsúnmi këmëxun bëtsi ñankabi 'atima okë a ëanan, bëtsi 'ichakin ñuikë 'imainun bëtsimi këmëi manánkë akama ënia kana usakin 'ati 'ain,
10 'anan kamina mitsun piti binux mi tëkë usaribikin axa pitiñuma 'aish 'akëñuma unikama 'ain piti 'inanux tëkanti 'ain,
'anan kamina bëtsin 'akinti kuëëniabi 'akinkëma uni aribi 'akinkanti 'ain,
usakin 'ai mitsux tsókë ax ka tirítan bëánkibukë pëkakë usaribi 'iti 'ikën,
'ianan ka barin xamarukin ñun tupëonkëkama pëkakë usaribi mitsun tsóti ax 'iti 'ikën.
11 Usokin 'aia kana 'ën ënkinma mitsu kuania buánti 'ain,
anu uni 'ikëma me anua 'umpax 'aíma anuxunbi kana 'itsaira piti mitsu 'inánti 'ain,
mitsu 'inánkëxun pi kamina mitsun nami kushiti 'ain,
usai 'i kamina unin aín 'ikë 'urama naë chukúma 'apáxun chabókë usaribi 'ianan,
xëxá upí aín 'umpax uínsaranbi ëskikëma usaribi 'ikanti 'ain.
12 Mitsun unikaman ka anun ëma kënëara kënë xëni 'ikëbia rurupakama a birutëkënti 'ikën,
'anan ka aín tapunkama bërámaira 'akan aribi kushiokin 'atëkënti 'ikën.
Usokin 'akë ka mitsun unikama raíri a bëtsi unikaman,
an anun ëma kënëara birutëkënkin mëníokë kakin anëanan,
an xubu rurupa 'ikëbi 'atëkënkë kakin anëti 'ikën.
Diosan anun ñu mëëtima nëtën usai 'iti ñuikë kia bana
13 Anun ñu mëëtima nëtë 'ikëbëtan kamina; mitsun maruti ñu marutima 'ain:
ax ka 'ën nëtë upíira 'ikën.
Usa 'ain ka a nëtë anun kuëënti nëtë,
kakin anëkë 'ain Nukën 'Ibun anun rabiti nëtë 'ain añu ñubi uinu 'ikë unínbi 'atima 'ikën;
usa 'ain kamina a nëtën mintsun sinánkësa 'oíshi bananan,
mitsunan 'iti ñuishi 'anan mitsun ñu marutishi 'akantima 'ain.
14 Ënë bana kikësa okinbi 'aia kana 'ën mitsu kuëënun 'imiti 'ain,
'ianan kana 'ën bëtsi menu 'ikë unikama 'akin kanantankëxun atun me ami bëbarukin binun 'amiti 'ain,
'imianan mitsun chaitiokë Jacobnën me 'ia anuami kuëënun mitsu 'inánti 'ain.”
Usai ka Nukën 'Ibu kiaxa.