Nukën 'Ibu aín unikaman upíokin ñu 'axunti ñuikë bana
55
“Kamabi axa shimakë akamax ka 'umpax xëai uti 'ikën;'imainun ka uikamax kara kuríkiñuma akamanribi,
atun piti trigo kupíokinmashi biti 'ikën;
bianan ka uvas baka vino 'akë a 'imainun vaca xuma aribi añubi kupíokinma biti 'ikën.
2 ¿Uisa kupín kaina kuríkinën a piti ñu 'akësokin pitima ñu a kupíoti 'ain?
¿Uisa kupín kaina të́xumi bikë kuríki anun pitima ñu kupíoti 'ain, a kana 'a kixun sinani kuëëntima ñu a kupíoti 'ain?
Upiokin kamina 'ën kakëxun kuati 'ain, kuakin
kamina upiokin 'akë piti nëish irakama piti 'ain.
3 Ënu kamina mitsux ukanti 'ain,
'ën kakësabiokin 'ën bana upiokin bëmë́kin 'ai kamina chuámarua tsókanti 'ain.
'Ën kana mitsubëtan uínsaranbi këñutima ñu 'ati 'ain,
usokin 'akin kana 'ën uni David nuibakin kásabiokin mitsu 'axunti 'ain.
4 Mitsun kamina 'unánti 'ain 'ën kana,
bëtsi bëtsi menu kuankian aín 'apu 'ixun ñu 'unánmikin 'ën 'unánmikë banakama ñuixunun xuakën.
5 Min kamina ëma 'unánkëma kamanua;
'ikë an mi 'unánma ëmakamanua bënëkuatsinia ukanun kuëënti 'ain, usokëx ka atux abákuatsini minu 'uti 'ikën,
'ëx min 'Ibu 'ianan Israel unikaman Dios upíira
'ixun kana 'ën mi uisakinbi katima 'imian.
6 ‘Bërí kamina mëratisa 'ikëishi Nukën 'Ibu barikanti 'ain,
'ianan kamina bëría mi 'urama 'ikëishi kuënti 'ain.
7 Uni 'atimakama an ñu 'atima 'ati sinánkin 'akë an ka ñu 'atima 'akë a ënti 'ikën,
'imainun ka uni bana kuakëmakama atúnribi 'atimakian sinánkë akama ënti 'ikën;
ëni ami katamëtia ka Nukën 'Ibun mitsu nuibati 'ikën,
'imainun kamina Diosan nuibanankëira 'ixun an mitsun ñu 'atima 'akëkama mëníoxunun ami sinánkin rabikanti 'ain.’
8-9 'Ën sinánkë ax ka mitsun sinánkësara usama 'ikën,
'imainun ka 'ën usakin ñu 'aisatankë ax mitsun usakin ñu 'aisatankë usama 'ikën.
Usa 'aish ka naíkamë 'ëo axa me manámi 'ikë,
usaribi ka 'ën 'ati sinánxun 'akë ñukama 'ikën,
usa 'ain ka 'ën 'ati sinánxun 'akë ax mitsunmi a 'ati sinánxun 'akë usama 'ikën, kiax ka.”
Nukën 'Ibu asérabi kiakëxa.
10 'Uí 'imainun nibí ax ka naíkamë 'ëonuax 'ibútankëx,
me chaboima kuarutëkënkima me chabóia,
usakin chabókëxa ñu bërukama komainun,
a 'apátëkënti aín bimi biti axribi koia,
komainun ka 'apáxun aín bimi piti akamaribi tuaia,
11 usaribiti ka 'ëx kikë bana ax 'ia,
usai 'i ka 'ën kuëënkësa okin ñu upí 'atankëxma 'ënu kuantëkënima,
'aínbi ka 'ëx kuëënkësabi okin pain 'aia,
'akin ka kuankima a 'anun 'ën xukë a pain 'aia.
12 Usa 'ain kamina mitsux kuëënkiani anuaxmi tëmërakankë,
anuax kamina mitsun menubi uínbi uisokinbi kakëma kuantëkënti 'ain.
Usai mitsux kuania isi ka 'ain bashikama kuëëni kantati 'ikën,
'imainun ka kamabi ikama ninu 'ikë akamax mëtashkiti 'ikën.
13 Usa 'ain ka pino kakë i axa komainun muxañu ikama ax kotima 'ikën,
'imainun ka i chaxkë́irabu aín pëchi këxtuira ax komainun axa nichaxonankë ax kotima 'ikën;
ënë ñukama iskin ka unin Nukën 'Ibun anë upiokin rabiti 'ikën,
ax ka uínsarabi ka Dios ax këñutima 'ikë kixun 'unánan uínbi ka 'atima otima 'ikë kixun 'unánti 'ikën.