Diosan ka aín unikama ënkinma xënibua 'aínbi nuibatia kikë bana
54
Jerusalén ax ka tuáñuma xanu 'ianan tuakëmaxanusa 'aish munuma kuëëni kantati 'ikën,
mix kamina bakënkin paëtankë usaribi 'ain usai ka Nun 'Ibu kiaxa:
xanu aín bënë ënkë an ka xanu bënuñunën 'akësamaira okin 'itsaira tuati 'ikën.
2 Min xubusokin chupa 'akë akamina chooti 'ain,
'anan kamina anun mapankë a rakuë́kimaishi anumi 'ikë a pëninkin 'ati 'ain;
'anan kamina aín itsikama chaxkë́bu 'axun aín ikama upíokin matáskin nitsintankëxun ami tëkërë kati 'ain,
3 min rëbúnkikamax ka mëkeu kuanan, mëmiu kuani me tsitsirui 'uakamë 'ëoti 'ikën;
usai 'ikin ka min rëbúnki kaman mekama
anu ëma 'ikëbia ënkan, anu uni 'ikëma ëmakama anu kuantëkënti 'ikën.
4 Usa 'ain kamina rakuë́tima 'ain katë́kësamina 'in, usa 'ain kamina bërúankati 'ain;
mi 'ichakin ñuikankëxbi anun rabinti ñu ka 'aíma 'iti 'ikën.
Bëná 'aíshmi bakë bëchikëñuma 'aish rabian akamina manuti 'ain,
'imainun kamina xanu aín bënën kasunankë 'akësokin mi 'akan a sinántima 'ain,
5 'ianan ka an mi unio an aín xanusa 'ikë mi biti 'ikën.
Aín anëx ka Nukën 'Ibu kamabi kushiñuira 'ikën;
ax ka an mi bitëkënti Israel unikaman Dios upíira a 'ikën,
'ianan ka Dios kamabi me an unio a 'ikën.
6 Mix kamina xanu chipash aín bënën 'atimati
nitsia ënkësa 'aish tëmërai 'iakën,
'aínbi ka min Diosan amirbishi nuitëkënun mi kaxa.
7 “'Itsama nëtë́ishi 'imikin kana mi ëankën,
'aínbi kana 'ëx nuibanankë ax chaiira 'ain amiribishi 'ëbë biranani utëkënun mi kakën.
8 Uínsaran karana 'ëx mimi nishakën anu kana,
'itsama nëtë́ishi mimi mëráma 'ain,
'aínbi kana 'ëx nuibanairakë ax nëtë́tima 'ain mi nuibakën.”
Usai ka min 'Ibu an mi bitëkënti ax kiaxa.
9 “Baka 'ikuatsini sënë́nkë 'ain kana,
sinanatëkëntima okin 'ën Noé amiribishi ka me
mapui baka 'ëtëkëntima 'ikë kixun kakën.
Usokin kana bërí sinanatëkëntima okin
amiribishi kana usakin mimi nishtëkëntima 'ai kixun kakën.
10 Aín bashikamax anua 'ikë anuax amoki shaíkimainua, matá mekama tukibuti rëukubukëbëbi ka
'ën mi nuibakë ax uisaibi 'i nëtë́tima 'ikën,
'imainun ka 'ën mibëtan 'a achúshi ñu anun upiti tsóti ax uisaibi 'i nëtë́tima 'ikën.”
Usai ka min 'Ibu ax mixmi 'aisama ñu 'inutia isi mi nuibati kia.
Jerusalén ëma ió 'itëkënti ñuikë bana
11 “¡Jerusalén ëma bërí kamina nuibatira 'aish, suñuanën 'atima okësa 'iti 'ain,
usa 'ain ka an mi kuëënmiti uibi 'aíma 'iti 'ikën!
'Ën kana min maxáxkama a tsisu niba nibakikë tunaínra anu nanan,
min tapunkama aribi zafiro kakë kuman batsisa akamanan nanti 'ain;
12 'anan rubíes kakë maxax panshian torrekama 'anan,
berilo kakë maxáx paxasa tani nibánibákikë aribi aín xëpútikamaribi 'ati 'ain,
'anan kana buinarakin kënëarakin maxax upíirabu akaman 'ati 'ain.
13 'Ën kana min bakë bëchikëkama ñu 'unánmiti 'ain,
usokëx ka akamax upiti tsóti bukuti 'ikën.
14 Usa 'ain ka ñu 'atima 'aíma upiti tsókë an mi kushioti 'ikën,
usai 'ia uínbi mi uisabi okëma 'aish kamina rakuë́tima 'ain,
usai 'i kamina rakuë́tan bamati sinántëkënima upitax tsóti 'ain.
15 Uin kara mi 'aisatankin 'aia, ax ka 'ën 'amikëxun mi 'akëma 'iti 'ikën,
'aínbi kamina min ira kanankin atu 'ati 'ain.
16 Ka kuat, 'ën kana ax manën tëkë akama uniokën,
an ka tsi ënxaira anu 'arukëxa charatia
bëtsi bëtsi ñu uniokin anun 'akánanti akamaribi 'aia;
'ianan kana uniribi uisokin kara 'akatsia usakin 'akin an kuëënkësa okin ñu 'atimonun uniokën;
17 'aínbi ka uínbi anun 'akanankin ñu anun
masókin 'ati uniokëma 'ikën.
Mitsun kamina an usa ka atux 'ikë kixun mitsu 'uchokëkama a uisa bananbi bananun kimitima 'ain.
Ësokin kana axa 'ëmi katamëkë unikama 'amiti 'ain: usokin 'akin ka atun ñusmoti 'ikën.”
Ësai ka Nukën 'Ibu asérabi kiakëxa.