53
¿Uin kara nukamannu kuaxun ñuikë min bana ax ka asérabi 'ikë kixun sinánti 'ik?¿Ui kara Nukën 'Ibun aín kushin ñu 'akin ax ka kushi 'ikë kixun sinánnun 'imiax?
2 Nukën 'Ibun ka kuëëankëxa, aín uni axa
ñu 'apákëx bërí koi kani aín tapunkama me ëskikë 'ukëmëu kuankë usairibi 'iti.
Usa 'aínbi ka upíma 'ianan, chabáchabákikë upima 'iakëxa,
ain namix ka usa ka kixun unin ñachakin istisama 'iakëxa;
3 usa 'ikë ka unikaman istisamatankin timakanti 'ikën.
Ax ka achúshi uni 'itsaira paë tani tëmërakin masánuitukinbi tënëkin 'axëkë 'iaxa.
Usa 'ikë ka a unin istisama tankë unisa 'ikë kamaxunbi usa ka;
ax 'ikë kixun nukaman 'unánma 'ain.
4 Usa 'aínbi ka ainansa ain nukamaxnu tëmërati anun tëmërakëxa,
usa 'ikë ka nukaman paë ainansa 'ain anun tënëakëxa.
Nukaman kananuna sinanin Diosan ka aín namikama tëakin,
'akësokin tëmëramikëx ñuumarasa 'iti 'ikën. (Ënë banax ka bëráma 'iása 'ikëbi upiokin 'unánti ësokin 'akë 'ikën.)
5 'Aínbi ka nun bana kuakëma kupí ax
bëtsi bëtsi okin mëëkë 'iti 'ikën,
usokin ka nun 'uchakama kupí 'ati 'ikën;
axa usai tëmërakë 'ain kananuna nux upitax tsótin,
'ianan kananuna rishkikin aín nami tëakan 'ain uisabi 'ikëma upiti tsóti 'ain.
6 Kamabi nukamax kananuna ovejakama nëtë́kësa 'inun,
nukamax achúshi achúshinëx nun kuëënkësoishi niakën,
'aínbi ka Nukën 'Ibun ainansa 'ikë nun ñu 'atima 'akëkama kamabi nukamanua mëníokëxa.
7 Ax ka 'atima okë 'iaxa, 'aínbi ka ñuumarasa 'ixun 'inamëkin tënëti 'ikën,
'ianan ka uisa banarabi banatima 'ikën;
usai 'iaka, anuxun 'atinua carnero aín bënë bërí kanikë buankësa okin buankanti 'ikën,
usai 'ika ax uisaibi banaima nëtë́ax aín rani
tëakëxun carneronën tanshikë usaíshi 'iti 'ikën.
8 Usa 'ain ka ñu 'atima 'akëmabi
uankankëbë anun rabanan nëëti ax banati uibi 'aíma 'iti 'ikën;
usai 'ikëbë ka axa ñukama 'inúkëbë uisa ñu kara inutia kiax ax ami sinánti uni 'aíma 'iti 'ikën.
'Imainun ka ënë menua chikinti 'ikën,
'anan 'ën aintsikama 'ucha kupín bamatanun 'akánti 'ikën.
9 'Atankëxun ka uni 'atimakama anu maínkë a rapasu maianan,
uni bana kuakëma anu maínkë, rapasu maínti 'iti 'ikën,
'aínbi ka ax uínsarabi uni 'akëma 'ianan
këmëi banakëma 'iti 'ikën.
10 Nukën 'Ibun ka 'itsaira a tëmëramisa tankëxa.
Usai ax unin 'ucha kupí ñukë
'ixun ka 'itsaira baritia xënibua,
'aínbi tsókin aín rëbúnkikama isti 'ikën;
usa 'ixun ka Nukën 'Ibu kakësabiokin an sinánkësa okin 'ati 'ikën.
11 Usai pain 'itsaira tëmëratankëxun ka
asérabi kana Diosan kakësabiokin 'an kixun 'unani kuëënti 'ikën;
usa 'ain ka Nukën 'Ibun ka upí 'ixun 'itsaira uni ië́miti 'ikën,
'ianan ka unikama 'atima ñu 'ai 'uchakë kupín ainansa 'ain, anun tëmërati 'ikën.
12 Usa 'ikë ka Diosan ñunuxa abi 'inamëa 'ikë, anua uni chabu 'ikë anu 'imia 'ixun,
anua uni kushiirabu kanantankëx 'ikë anua atubë 'inun 'imiti 'ikën,
a ka unin axribi ka uni 'atima 'ikë kixun unin sinánkëxa,
usa 'ixun ka kamabi unin 'ucha ainansa 'ikë
papianan kamabi uni atun 'ucha kupín ñukáxuankëxa.