Jerusalénnu 'ikë unikama ka asábi uínbi ubíokëma 'iti 'ikë Dios kikë bana
52
Axa Jerusalénnu tsókë unikama mitsux kamina upíokin sinani kushikanti 'ain,mitsux kamina Jerusalén upí kakë ëma anu tsotin,
usa 'ain kamina mitsun chupa upíirabu a pañukanti 'ain,
bëtsi menu 'ikë unikama an Dios rabikëmakama ax ka
amiribishi mitsunu atsíntëkëntima 'ikën.
2 Jerusalénnu 'ikë unikama mitsux kamina niruti 'ain,
nirukin kamina me tákati 'ain,
mitsux mi rabinkë a ëni
anua 'apukama tsókë anu tsókësa 'iti 'ain.
Jerusalénnu 'ikë uni bënákama mitsux kamina unían bërí ka
tëmëraima kixun mitsu istánun anuaxmi tëmërakankë anuax chikínkanti 'ain.
3 Ësai ka Nukën 'ibu kiaxa:
'Ën kana achúshi kuríkirabi axa mitsumi nishkë unikaman,
mitsu tëmëramikin ñu mëëminuxun buántanun biama 'ain,
usa 'ain kana bërí achúshi kuríkirabi 'ën mitsu chikínbëtsinkin bënuxun atu 'inántima 'ain.
4 Ësairibi ka Dios kiaxa:
“Bërámabi ka 'ën unikama Egipto menu,
kuan 'aish anu tsóakëxa
bëtsi menu 'ikë unikamasa 'aish,
usai 'ia 'ikëbi ka Asirianu 'ikë unikaman uisa ñu 'akëmabi tëmëramiakëxa.
5 Bërí ka ësai Dios kia, ¿uisa ñu karana isin?
'Ën unikama ka uisa ñu 'atima 'akëmabi Babilonianu 'ikë unikaman ain menu uanxa.
An buánkë unikama ax atumi kuai kuënkëni kushin rabiakati ki,
'ëmiribi nëtë́timaira kuëëreti kia.
6 'Aínbi ka anúan 'ën unikaman 'ëx kana Dios 'ai kixun 'unánti nëtë 'inuxun 'aia,
usa 'ain ka 'ë 'unánan 'ëx kana Nukën 'Ibu 'aish usai bana kixun 'unánti 'ikën.”
7 ¡Upíira upíira ka axa bashikama tësapanën,
upíira bana bëi aia iskë ax 'ikën,
an ka anun upiti tsóti bana bëia,
an ka anúan aín unikama ië́ti bana bëi ukin Jerusalén ësokin kaia,
“Min Dios ax ka 'apuira 'ikën!”
8 ¡An bërúankë! Unikama mitsux kamina munuma banai kiti 'ain,
kimainun ka bëtsíxribi ñusmokin bëtsi 'atankëx anun kiti bana anun kiti 'ikën,
atun ka aín bërúnbi uisa kuatsini kara utëkëni
Nukën 'Ibu Jerusalénnu aia isti 'ikën.
9 ¡Jerusalén na masókan anu tsókë,
unikama mitsux kamina kana ñusmo kiax kuëënkanti 'ain,
Nukën 'Ibun ka Jerusalénnu 'ikë aín unikama nuibaxa,
usakin 'akin ka aín unikama nuibakin chikíanxa! (Ënëx ka Jesucristo ñui kikë bana 'ikën.)
10 Nukën 'Ibun ka ax kushiira 'ixun
kamabi menu 'ikë unikama aín kushi ismiaxa.
Usa 'ain ka kamabi menuxun unánti 'ikën.
Nukën 'Ibu Dios an ka nu ië́miaxa kixun 'unánti 'ikën.
11 ¡Babilonia menu tsókë unikama mitsux
anuax chikíkin kamina anua 'ikë ñu 'atimakama a mëëtima 'ain!
¡Anuxun atun dios rabikë xubunua buánxun
nankan Diosan ñukama an buánti akamax ka upiti mëníokakë 'iti 'ikën!
12 'aínbi ka anuax chikiti kuani bënëtishi abákiani chikítima 'ikën,
Nukën 'Ibu Israel unikaman Dios,
an ka atu kuania uisa ñubi inuaxma 'inun amami amamiukua bërúanti 'ikën.
Tëmërakin ñusmotankëx ka Diosan uni upiti 'ikë kixun ñuikë bana
13 'Ën uni akana an 'akë ñukamax ka upí 'iakëxa,
'ikëbëtan ka axa aín kushiira 'i manámi 'inun 'imiti 'ikën.
14 Usa 'ain ka 'itsaira uni a isi ratúkanti 'ikën,
ain bëmánan bëtsianan ka aín nami,
unin nami iskësa akamax unin nami iskësama bëtsikë 'iti 'ikën. (Ënë banax ka hebreo banan usai kia.)
15 Usairibi ka kamabi menu 'ikë unikama atúxribi ratuti 'ikën;
usai 'imainun ka 'apukamaxribi a isi uisa banarabi banatima 'ikën,
usai 'ikin ka uinsaranbia unin ñuixuama ñu isti 'ikën,
'imainun ka uinsaranbia kuama bana a kuati 'ikën, kiax ka Dios kiakëxa.