Nukën 'Ibun ka kushiira 'ixun an unio ñukama uisokin kara 'aisatania usokin 'ati 'ikë kikë bana
50
Ësai ka Nukën 'Ibu kia:“¡'Ën kana Israel unikama mitsun tita 'ikëbi rakankë kixun kamina sinánkantima 'ain,
achúshi unin aín xanu ënkin rakankë usaribi okin,
usokin 'anan karana mitsu ñu mëmikë uni 'akësokin ama 'ain
bëtsi uni ribinxun akësokin 'ama 'ain!
Mitsux kamina mitsun 'uchakë kupín marukë 'iakën;
Israel unikama mitsun titax ka timakin rakankësa 'iakëxa,
mitsun kakëxunbi 'ën bana kuaisama tankë kupín.
2 ¿Uisa kupín karana ukin 'ën uibi mërama 'ain?
¿Uisa kupín kara kuënkëxunbi uínbi 'ë káma 'ik?
¿'Ëx isana mitsu 'akinsama 'ai kixun kaina sinánkankën?
¿'Ën isana mitsu chikintima 'ai kixun kaina sinánkankën?
'Ëx usai ka 'iti 'ikë kiax kikëbëshi ka parúmpapa ëskiti 'ikën,
'imainun ka bakakamaxribi anu uni 'ikëma mesa 'itánun aín 'umpax 'aíma 'iti 'ikën;
usai 'ikëbë ka anu 'ikë tsatsakama
'umpaxñuma 'ain xanan bamai chë́kia.
3 'Ën kana naíkamë' ëo uni ñukë 'ain unix masánuituti chupan mapukësa 'itánun 'imiti 'ain,
usakin kana 'ën 'imiti 'ain.”
Nukën 'Ibun uni 'itsaira tëmëraibi ami katamëti ñuikë bana
4 Nukën 'Ibun ka 'ë ñu 'unánmiaxa
atsánkë unikama bana ñuixunkin kuëminun.
'Ianan ka pëkarakëma 'ain 'aínshi 'ëa kakëxun munu aín bana kuanun 'ë kaxa.
5 Nukën 'Ibun ka aín bana upíokin kuanun 'ë 'imiaxa,
kana, 'aima kianan
an kakëxun ain bana kuaisama tani 'iama 'ain.
6 An 'ë mëëkë unikaman mëëkëxun kana 'ëa mëëtanun tanshiakën
'ën kuëniribi të́kakëxun kana na 'atanun tanshiakën.
'Imainun kana 'ën bëmánanribi 'atimakin ñuikin bëtushu kakëxunbi 'ën bëmánan ñuñai amo bësuakëama 'ain.
7 Nukën 'Ibu ax ka an 'ë 'akinkë 'ikën:
usa 'ain ka 'atimokin 'ë ñuikë bana an 'ë uisabi oima;
usa 'ain kana, 'ëx achúshi mapara irusaribi 'aish anubi 'ian,
usa 'ixun kana, 'ëx usai 'ikë anun kana katë́ti rabinkë 'itima 'ai kixun 'unan.
8 'Ë 'urama ka an 'ë 'akinkin bërúankë ax 'ikën:
¿Uix kara 'ën isana usakin ñu 'a kiax 'ëmi këmëi banati 'ik?
¡Usa 'ain ka uix kara 'ëmi 'atimati banaia ax ka ëbëtan 'apunuxun bana mënioi kuanti 'ikën!
¿Uin kara 'ën isana ñu 'atima 'a kiax këmëishi 'ëmi manánti sinanin?
¡Uin kara usakin sinania an ka 'utankëxun usakin kamina ñu 'a kixun 'ë kati 'ikën!
9 Nukën 'Ibun ka 'ë 'akinia;
¿uix kara 'ën isana 'atima ñu 'a kixun 'ë 'uchokatsi kiax 'ëmi manánti 'ik?
Kamabi axa 'ëmi nishkë unikamax ka këñuti 'ikën,
achúshi i bisan pikë usaíshi 'i nëtë́ti 'ikën.