Jesus joina kavaranihi hida
5
Arigamina,
joiki bana ada Jesus.
Avarigaki ida joina kavaranihi.
Ni-nahina biogaki ida mahi hana hini joina.
2 Avarigaki ida boꞌdi abono khana vani fori hija ida Jesus khana kamahini.
Boꞌdi abono ijaꞌari vaꞌini-ra kadihivini vani fori hija bana ida Jesus joina vavaꞌi kadihini hini.
Nimania ida akadikaꞌdaꞌdi khajorakina.
3 Ijaꞌari vaabono vakaniꞌakhamaki bana:
—Ni-makhaniki hida akadimahi.
Ni-nahina haria napohimajaki.
Vara vakhanina kabaꞌi,
jorakia vapohimajaki bana adani.
Hari.
Gamo kajahavidokia ni-bikaabokaki ida abononi akavaꞌijoavini,
bikamitharia kaimoni ida imani ꞌbanani.
Onivani fori hija bana ida namithaki Jesu-ra avigariki vakadiania.
Ni-vakaabokaki bana ida vaabono avakavaꞌijoavini,
vakamitharia kaimoni ida vaimana ꞌbanani.
4 Hari.
Ijaꞌari bakibakinia hojani vani fori hija ida ijaꞌari Jesu-ra kajariꞌdaki hojani.
Aꞌonivani arigamina,
ni-bakibakini kania avahojajanaki fori avihirihi.
Akadikaꞌdaꞌdi khana kamahini ni-avaꞌi-ra kadi hirihi.
Boꞌdi abono ijaꞌari vaꞌini-ra kadi hivini fori avihirihi.
5 Aꞌonivani mahi vagania avahojaki fori avihiꞌiki aꞌoni.
Ni-joma bakibakini fori hikia avahojajanaki.
6 Bakibakinia vahojaki fori vihiki adani Jesu-ra vanofiriki,
vavadiki fori vihiki jaboni adani,
ni-Jesus joina-ra vanokhaki.
Hariꞌa avadiki fori arihiva vaꞌoaniaro fori arihiria kaimoni.
Anokimaniva avaꞌi ogairini,
Jesus joina-ra anokhavini.
7 Joma vania vavadira adani ijaꞌari.
Joma vania vakahanora adani.
8 Harivani mahi vagania arihojaki fori arihiki hari.
Ni-kahanoki kamahi fori hirihi hida akadimahi.
Jesus joina-ra akavaꞌigairiva.
Hari.
Haria okavarajomivini hiki ada sorara makari ꞌdakhaki-ra kaimahaki,
hoariha kasaꞌaia bianakhararara kaimoni.
Ariabono akanakaidivakhamahi,
Jesu-ra avakaijokajahakihi,
oniani ida sorara makhoꞌini kaꞌoa kakamakarini-ra kaimahaki fori haria nihaja.
Hari.
Anokhahahaꞌoadahahi ida Jesus haria akavaꞌijoavini,
oniani ida sorara sapiva kaꞌdakhaki-ra kakaꞌdaꞌdihaki fori haria nihaja.
9 Deus haria nagathogathoꞌiki hari,
akadikaꞌdaꞌdi Jesus Cristo haria akavaꞌijoaja kaimoni.
Akadihojai jahariki abosini-ra agathanivini kaimoni hirihi hida Deus haria nagathogathovini hija.
10 Abiniꞌiki ada Cristo akadimoni hina,
arihojajabanaja kaimoni kidiania.
Joina kamahini ni-makhaniki ida asia arihokina,
ni-makhaniki ida ariabiniꞌina.
Aokhahahaviki bana hari Jesus kania.
11 Avaabononi khai vakaniꞌakhamavinihi hida Jesus varani hina.
Avaabononi vaakodiakhama bana jaboni.
Nimania ida avahojani,
asia avavahojaki kaimoni.
Paulo athi anokhomini hida
12 Arigamina,
aꞌonira akanikhariavini hiki vaꞌora avavavaꞌihavini adani aꞌonira vakaꞌojomoꞌiki.
Deus vaꞌora nagathogathoꞌiki adani aꞌonira vanavaꞌisohira kaimoni.
13 Deus kabadania vakabadaniki adani,
oniani ida vaꞌora avanakaidivavini,
vaꞌora avavavaꞌihavini onofivini hija.
Onofiki ida jaboni avaabononi avakanajahamisikhamavini.
14 Aꞌonira anavaꞌisohivini bana:
Vaꞌora vanavaꞌisohi bana adani vakajoniahaki mahija bada vakhanina vaabono vakaijahitavini.
Varani jahakia vara vaꞌora vaniꞌa vaꞌoani Jesus kaijaꞌari vavaꞌi khai niriki mahija khai vakhanivini.
Vaꞌora vakajoamora vaꞌoani Jesus kania avajahamisijahakiriki mahija avajahamisiꞌianana-ra vanofivini.
Vaꞌora avakaihamahijorakiravini vani ijaꞌari hahavi-ra vaꞌora vanokha bana.
15 Hariꞌa avaabononi vanaꞌdaꞌdiabosi hoariha kahojai asohirikia.
Avaabononi vanadano afohaꞌoadaha bana avaabononi avakakakodiakhamavini.
Ijaꞌari hoariha-ra vaakodiajahakiꞌa jaboni.
16 Khai vakhanihaꞌoadaha bana.
17 Deu-ra vara vaniꞌahahaꞌoadaha bana.
18 Nahina jahaki jahariki namithani kabaꞌi avakadiania Deu-ra khai vaniꞌahahaꞌoadaha bana.
Jesus kania avarakaramisini mani ida hojai nikia avakahojaini Deua binofivini hija.
19 Maꞌonahai Jahaki avavaꞌini-ra nahonariahihivini vani vanaaba ida aꞌonira honariavini hiki,
hariꞌa vakajoni ida binofiki avakadiania.
20 Hariꞌa vakajoni bana ida Deus athi namoniva abono athi.
21 Vakavaꞌibodivaraniꞌimidia bana ida athi Deus athi hini,
Deus athi hirini.
Deus athi hini avarigahi;
vanaabaꞌa bana.
22 Vakaimajahari bana ida hojai jahariki,
asohiriki.
23 Deus haria noꞌavini vaꞌi jahajahania.
Okanikhariaki ida aꞌonira kajoamoravini avaabononi gahinai avanihakaꞌoaja kaimoni kidiania.
Onofiki ida Deus avamaꞌonahani,
avakadivaꞌibodivarani,
avaabononi hiki-ra akadavaꞌahahaꞌoadahavini,
sohikaꞌoaja kaimoni ida avakadimahi.
Onofiki ida akadikaꞌdaꞌdi Jesus Cristo joina kamahini asia avakadimahi sohikaꞌoani-ra kahivini.
24 Deus aꞌonira nagathogathoꞌiki aꞌoni.
Aꞌonira akadavaꞌajahakivini-ra kahiha,
aꞌonira akadavaꞌajahakimaniꞌaha.
25 Arigamina,
Deu-ra vara vaniꞌa akadimoni jaboni.
26 Avaigamini-ra avakaꞌivanitihi,
avaabononi vakanakaidivakhamajahakivini-ra vananokia bana.
27 Onofiki hida oathi kapapirani jirini-ra vara avaniꞌavini,
avaigamini hahavia mitha vaniꞌaja kaimoni.
Akadikaꞌdaꞌdia bihonariaki jaboni ida vara avavaniꞌavini vahoariha mitha vaniꞌaja kaimoni.
28 Onofiki ida akadikaꞌdaꞌdi Jesus Cristo aꞌonira kajoamorahaꞌoadahavini.
Hari ida vani oamani Paulo athi jiriꞌiki anokhomiꞌini.