2 Akadikaꞌdaꞌdi Jesus haria honariavini hiꞌiki ida ojomoꞌihi athini aꞌonira akaꞌojomoꞌivini.

Avarigaki ida ojomoꞌihi athini.

3 Nimania ida hojai Deua binofikia avakahojaini.

Binofiki ida avaabononi gahinai avanihakaꞌoavini kidiania afohaꞌoadaha.

Ni-Deua bivajahapaꞌitxiki ida makhira kidigamo hiriki khama vaabono vakaviꞌomakhamavini.

4 Deua binofiki ida makhira kidigamo-ra nakaidivajahakivini-ra ogavini.

Binofiki ida jaboni kidigamo-ra vavaꞌihavini.

5 Hariꞌa Deu-ra avigariki fori vihi,

hivaꞌoania vakavaꞌinofinofiki ida hojai kaipahivahaki,

vakadigamo-ra vaviꞌomakaꞌoavini kabaꞌi.

Ni-vakadigamo-ra vanakaidivaki.

6 Hariꞌa vakanabadaniha ida iigamini kagamo,

kidinahina hiki.

Vanakaidiva bana ida kidinahina,

kidigamo hiki.

Kidiania ida.

Aꞌonira anavaꞌisohiꞌianavini hiki hida ariathi,

avarigaja kaimoni.

Akadikaꞌdaꞌdia binaimaꞌbanaki ida bana ijaꞌari akadikaabanahi-ra naabariki.

7 Deus haria nagathogathovini hiki kidiania ariabono gahinai anihakaꞌoaja kaimoni.

Deua binofiki ida makhira kidigamo kaꞌoa-ra vahojavini.

Ni-binofipaꞌitxiki ida kidigamo hiriki-ra kanabadanihavini badani kaipahivahakia.

8 Deus athi mani hida aꞌonira akaabanivini hija.

Ijaꞌari hana hini vahabini ariathi-ra kajonihi;

Deus athi oamani ida bikajonija.

Deus vania bikaronara ada Maꞌonahai Jahaki avakadiania.

9 Hari.

Deus vani aꞌonira kaꞌojomoꞌivini hija ida avaabononi avakanakaidivakhamajahakivini.

Avarigaki ida vaꞌora avanakaidivavini adani avaigamini Jesus kaniaja.

Ni-vara aꞌonira aniꞌajanavini hiki ida avaigamini-ra avanofijahakivini kavaranihi.

Avarigaꞌiki ida.

10 Vaꞌora avanakaidivajahakiki adani Jesus Cristo kaijaꞌari Macedônia kaarabonia vahojaki.

Onofiki ida avaigamini-ra avanofivini avijavani.

11 Vanofi bana ida vahoariha khama avaabononi avakanajahamisikhamavini.

Onofiki ida ijaꞌari kidibadani kaꞌoa vania kabadanini,

kidibadani abania vaꞌora kaijahitara kaimoni adani kidigamo,

kidisai vihiki.

Nimania ida aꞌonira anavaꞌisohivini hiꞌiki.

12 Avakhanini vani Jesu-ra avigariki avakadihojai-ra vanokihi;

aꞌonira vavavaꞌihaha.

Bada avakhanihananahi;

ni-nahina-ra avakainamoki;

ni-hoariha kanahina-ra avakanikhariabakhiaki.

13 Arigamina,

anofiki ida ijaꞌari kohana kavaranihi-ra avarigajahakivini.

Abinini naothinia ida ijaꞌari Jesu-ra ogariki,

ni-nahina jahaki-ra nokhaki,

oniani ida abinini kamahini kidijaꞌari vavaꞌi mokara niꞌakarahoni hija.

Hariꞌa vaꞌoaniaro fori vihi.

Ni-anofiki ida Jesus kaijaꞌari abinini kamahini avavaꞌini-ra mokara niꞌakarahovini asarahaꞌoadahani.

14 Aogaki ida Jesus abiniꞌina naothinia ahokiꞌina.

Aogaki jaboni ida Jesus joina kamahini Deus vaꞌora karonaki jaboni bana adani ijaꞌari kohana avahokiꞌina kidiania,

hivaꞌoani vaabinirina oadani hidiaja Jesu-ra vavakaijokaki.

15 Akadikaꞌdaꞌdi kaꞌojomoꞌihi kavaranihi hida aꞌonira anavaꞌisohivini hija bana.

Akadikaꞌdaꞌdi joina kamahini,

harivani arihokina oadani ni-aokhananavaki,

Jesus kaijaꞌari vaabiniꞌiki vaviaha.

Aokhana kamahini arihihaviki hari.

16 Deus kania hojana joirariki bana ada akadikaꞌdaꞌdi Jesus Cristo.

Kamithavahaki ida kidibodiꞌbarai.

Bodiꞌbarai naothinia kamithavahaki bana ida Deus ibavi kaijaꞌarini vakadikaꞌdaꞌdi athi.

Athii naothinia kamithavahaki ida Deus katrombeta rabojahavahaki ithoni.

Nimania bana ida akadikaꞌdaꞌdi Jesus joina kamahini.

Hari.

Oniaroa vahokiꞌimidiamaniha adani Cristo kaijaꞌari kohana,

hiꞌadani vaabinirina oadani Cristo-ra vavakaijokaꞌiki adani.

Deus vaꞌora gathaniki bana adani kidiania.

17 Harivani,

arihokina vani Deus haria gathanija bana jaboni.

Bahi vaforiki hararana vania aokasija bana,

ajoronijabanaja kaimoni nama jararinia.

Jesus khama ariabono aakaragararikhamaki bana hari.

Naothinia arihojahaꞌoadahaki hari Jesus kania.

18 Nimania ida ijaꞌari kohana vahokina varani hini.

Oniani hida Jesus joina kamahini kavaranihia khai avaabononi avakaniꞌakhamavini hija.