3 Ane tu fene mase ironamiteye su, ane Owane Sitewi lo peri tutawe fene maꞌe au teꞌe fiyariye. Owane Sitewi lai ane maꞌe peri lo tutawe auwe. Owane Sitewi lo peri tutawe apou aꞌi teꞌesiya, “Jisas Krais yo seni luwaru aꞌi nomo lo ne au temeniyeye.” Owane Sitewi lo peri apou aꞌi teꞌesiya.^a 4 Krais temeniyeye su, lowe tahe paꞌare lo tapiye fisiye yo papu fuwe. Sosu nowe hesi heta i henerai su, Owane Sitewi lai meni eime lo si tame norohuwe hene aniye. Owane Sitewi lo peri apou aꞌi teꞌesiya.^b 5 Serai Jisas si tame hene aniye su, le meni Sifas maꞌe iyape tereꞌe Pita, heneri. Sosu moꞌo le lu feni pefine lo weniri maꞌe heneri.^c 6 Sosu moꞌo lu taune tomu neꞌese (500 aiwawe aꞌi) taꞌuwerai su, le lowe werese maꞌe nowe taꞌi aiwawe aꞌi heneri. Lu feni ape mo ne, nowe pereye eite se lu taune tomu neꞌese awei sahe irosiya. Lu taune tewi oso aꞌi tamo temeniyeye. 7 Sosu moꞌo Jisas meni Jems maꞌe siyeri. Sosu lu feni pefine lo werese aꞌi, le lowe maꞌe siyeri.^d

8 Sosu moꞌo yeꞌewi le ane maꞌe henerai. Ane le siyeye. Ane le siyeye su, ane meni luwaru aꞌi ne. Ane peri lo wanu umasi taꞌame. Sosu le ane maꞌe henerai su, ane peri lo wanu tote tawesi umasinamiteye.^e 9 Serai ane lu feni lo yahowaꞌi aꞌi ne. Tu naifa ane lu taune werese maꞌe Jisas lo peri umasinamiteye ape au luwaruwenamiteye. Serai lu tamo ane ne apou aꞌi totenamiye. “Meni ape, Pol, Jisas lo lu feni pefine aꞌi henerai taꞌama. Le meni luwaru aꞌi ne.”^f 10 Ahowa, Owane Sitewi lai ane ne au ferafereiye. Serai ane faraꞌu Jisas lo lu feni pefine aꞌi henerai. Owane Sitewi lai yo seni luwaru werese aꞌi ano ani sasari pamoweye. Serai ane Jisas lo lu feni pefine henerai tepaꞌasiye. Sosu ane Jisas lo lu feni henerai su, ane wiyawi lo taꞌane tohotenamiteye. Ane lu feni tereꞌe lo ani ararowe. Ahowa, ane kairefi topo ano se wiyawi lo taꞌane taꞌame. Ane Jisas lo wiyawi Owane Sitewi lo feraferei se taꞌanenamisiya.^g 11 Serai ane fene maꞌe Owane Sitewi lo peri au teꞌeye su, aiwawe aꞌi lowe lai Owane Sitewi lo peri fene maꞌe au teꞌe fiyariye su, ane soꞌoru taꞌama. Owane Sitewi lo peri fene maꞌe au teꞌeteye su, fene Owane Sitewi lo peri wanu tote tawesi umasinamiteye.

12 Sosu aꞌi pe ane Krais lo peri au teꞌe fiyariye su, ane fene maꞌe apou au teꞌeye, “Owane Sitewi lai meni eime lo si tame norohuwe hene aniye.” Lu tamo fene mase irosiya ape, lowe apou teꞌesiya, “Owane Sitewi lai lu taune werese si tame norohuwe hene anirowata.” Fene piyene apou teꞌesiya awere? 13 Owane Sitewi lai lu taune werese si tame norohuwe hene anirowata su, serai le aꞌi lai Krais, meni eime lo, aiwawe aꞌi si tame norohuwe hene ani taꞌame. 14 Sosu Owane Sitewi lai Krais si tame norohuwe hene aniye taꞌama su, Owane Sitewi lo peri, nomo fene maꞌe au teꞌeye ape, yahowaꞌi henerai. Serai Owane Sitewi lo peri fene maꞌe yahowaꞌi henerai. Sosu Owane Sitewi lo peri fene maꞌe yahowaꞌi henerai su, tote tawesiyei fene lo aiwawe yahowaꞌi henerai. 15 Aiwawe Owane Sitewi lo peri wiyeme se taꞌama su, nomo areare siye lu pefine aꞌi henerai. Nomo Owane Sitewi lo peri wawero aꞌi au teꞌenamiyei. Serai nomo apou aꞌi teꞌesiya su, “Owane Sitewi lai Krais si tame norohuwe hene aniye.” Sosu lu tamo, fene maꞌe irosiya ape, apou teꞌeye. “Owane Sitewi lai lu taune si tame norohuwe hene anirowata.” Nomo Owane Sitewi ne peri teꞌe areareye. Serai peri fene lo wiyeme aꞌi teꞌeye su, nomo lai Owane Sitewi lo areare siye lu pefine aꞌi ne. Owane Sitewi lai lu taune werese si tame norohuwe hene anirowata. 16 Serai Owane Sitewi lai lu taune werese si tame norohuwe hene anirowata su, le aiwawe Krais si tame norohuwe ani taꞌame. 17 Owane Sitewi lai Krais si tame norohuwe hene ani taꞌame su, tote tawesiyei fene lo Owane Sitewi ne yahowaꞌi henerai. Tote tawesiyei fene lo Owane Sitewi ne yahowaꞌi henerai su, fene yo seni luwaru aꞌi marepi hepene papu ironamisiya. 18 Serai lu taune tomu neꞌese Jisas lo peri wanu tawesi umasiye ape, lowe temeniyeye. Lowe temeniyeye su, lowe mi mi pasi pasi temeniye poꞌutenamitorowa. 19 Serai nomo werese ironamisiya ape, nomo Krais lo teꞌe naneiyei ninawesiya su, lu taune tereꞌe werese lai nomo ne erasi aꞌi au ewiteyei.

20 Ahowa! Fene peri ano wanu etire! Krais temeniyeye su, Owane Sitewi lai le si tame norohuwe sine tepaꞌasiye. Wiyeme aꞌi tene! Tutawe Owane Sitewi lai le si tame norohuwe hene aniye. Sosu moꞌo lu taune ape mo temeniyeye ape, Owane Sitewi lai lowe si tame norohuwe hene anirowa. 21 Tu naifa weriyei weriyei meni tutawe Owane Sitewi lo peri arisiteye. Serai meni ape lu taune werese aiwawe aꞌi temeniyeyei ne irowe. Serai lu taune werese temeniyerowa. Aiwawe aꞌi meni tereꞌe se Owane Sitewi lai lu taune werese si tame norohuwe hene anirowa.^h 22 Serai meni Adam Owane Sitewi lo peri arisiteye su, lu taune werese werese temeniyerowa. Sosu aiwawe meni Krais se le lu taune werese maꞌe marepi hepene heꞌi aꞌi aurowa. 23 Sosu Owane Sitewi lai tu Krais si tame norohuwe hene aniye. Le aꞌi lai tutawe meni si tame hene aniye. Sosu moꞌo Jisas hi awei maꞌe si tame itoraiyei su, nomo werese, peri lo umasinamisiya ape, Owane Sitewi lai nomo si tame norohuwe hene anirowa.ⁱ

24-25 Sosu aꞌi pe nowe yeꞌewi se Krais si tame itorairowa su, le lu taune werese pei au noweinoweinamite. Sosu le etiri werese awei sahe au iro poꞌuterowa. Nowe ape se le awei lo lu owane werese aine teraꞌerowa. Le awei lo lu owane lo peri einamirowa. Sosu le awei lo kairefi werese ani ararosawirowa. Le hi awei sahe ironamirowa su, le etiri werese au noweinoweirowa. Serai le Satan lo ai lu werese ape mo au ani ararosawirowa su, le lu taune werese au noweinoweiteye ape, le Owane Sitewi, Tai lo, ereti maꞌe si itiyaꞌu hene aitirowa.^j 26 Airame yeꞌewi lo ape mo, Krais au ani poꞌuterowa ape, le temeniyeyei lo seni au ani ararorowa.^k 27 Serai Krais si tame itorairowa su, etiri werese le maꞌe ai atu ironamiye ape, le au ani ararosawirowa. Owane Sitewi lai tu naifa weriyei one towe lo sahe apou au leseye,

29 Lu taune tamo Jisas lo peri umasinamisiya ape, sosu moꞌo temeniyeye. Lowe saꞌi se au ani hu taꞌame. Lu taune tamo apou toteye. “Lu taune ape mo saꞌi se au ani hu taꞌame ape temeniyeye. Serai nomo Owane Sitewi lo wesi lu owane maꞌe apou teꞌe toweriyei, ꞌNe nomo lowe ne saꞌi se tame au ani hure. Serai kaiyemo mo nomo lo temeniyeye ape nomo lowe ne saꞌi se au ani huwei.’” Owane Sitewi lu taune werese si tame norohuwe anirowa taꞌama su, fene piyene lowe ne saꞌi se au ani huwe awere? 30 Nomo omo werese maꞌe Owane Sitewi lo peri au teꞌe fiyarisiya. Nomo Owane Sitewi lo peri au teꞌe fiyarisiya su, lu taune tamo apou teꞌeyei. “Nomo Pol lu feni lo mase aiwawe aꞌi lowe aine teraꞌeyei.” Owane Sitewi nowe yeꞌewi se nomo si tame norohuwe hene anirowata su, piyene nomo omo werese maꞌe Owane Sitewi lo peri au teꞌesiya awere? Nomo apou soꞌoruwesiya, Owane Sitewi lai nowe yeꞌewi se nomo si tame norohuwe hene anirowa. Serai lu tamo nomo aine teraꞌeyei su, Owane Sitewi lai nomo si tame norohuwe hene anirowa.^l 31 Wiyeme aꞌi ne. Kaiyemo mo, ane fene maꞌe Owane Sitewi lo peri au teꞌeye su, fene Owane Sitewi lo peri wanu umasinamiteye. Serai nomo Jisas Krais, Meni Owane Pefine aꞌi nomo lo papu ironamisiya su, ane marepi wisere aꞌi fene ne au totenamisiya. Ahowa, mi mi werese, lu tamo tomu neꞌese ane aine teraꞌeyei ne totesiya. Ane apou totesiya, “Lowe ane aine teraꞌeyei su, faraꞌu aꞌi ne. Owane Sitewi lai ane si tame norohuwe hene anirowa.”^m 32 Lu taune tamo omo Efesus sahe you erawe wou aꞌi irosiya. Ane lu lo marepi wou totesiya. Ane omo Efesus sahe lu tamo maꞌe ai teꞌe tiyatiteye su, etiri ape ane ne ani pati ani taꞌame. Ahowa, Owane Sitewi lai lu taune si tame norohuwe hene anirowata su, ai teꞌe tiyateye ape yahowaꞌi ne.

35 Ahowa, meni ta apou teꞌeyei, “Owane Sitewi lu taune si tame norohuwe hene anirowa su, piye ta yo le umasiyei awere? Piye tahe paꞌare apou wou aꞌi awere?” 36 Ne meni meremereye aꞌi ne. Ne etiri ta soꞌoru taꞌama awere? Ne kewi so yehe sameyei ne toteyei su, kewi so ape foroꞌoweye temeniyeyei wou aꞌi ne. Serai ne awei sahe yehe sameyei su, kewi so ape awei sahe perati wiraiyei. Le norohuwe heꞌi aniyei. Lu taune aiwawe aꞌi ne. Lu taune temeniyeyei su, Owane Sitewi lai lowe si tame norohuwe hene anirowa. Lowe marepi hepene heꞌi aꞌi anirowa.^o 37 Fene kewi ape yehe sameyei ne toteyei su, fene kewi loꞌuwe yehe same taꞌame. Ahowa, fene kewi so sameyei ne toteyei su, fene kewi so foroꞌo aꞌi yehe sameyei. Etiri tomu neꞌese fene aiwawe aꞌi so foroꞌo yehe sameyei. Pameki, momo aiwawe aꞌi fene so foroꞌo yehe sameyei. 38 Fene kewi so foroꞌo aꞌi yehe sameyei su, Owane Sitewi lai marepi lo se kewi maꞌe motowe patiye auwei. Owane Sitewi lai me so tereꞌe tereꞌe maꞌe motowe patiye werese taꞌi taꞌi auwei.

39 Etiri werese, awei sahe irosiya ape, lowe tahe paꞌare tereꞌe tereꞌe irosiya. Lu werese lowe tahe paꞌare aiwawe taꞌi aꞌi irosiya. Fe, you tahe paꞌare tereꞌe tereꞌe irosiya. Irowe werese aiwawe aꞌi tahe paꞌare tereꞌe irosiya. Sosu hare werese lowe tahe paꞌare tereꞌe irosiya.

40 Fene tahe paꞌare werese hire maꞌe irosiya ape ne totere. Owane Sitewi lo ipari wisere aꞌi lowe tahe paꞌare tereꞌe ironamisiya. Lowe lo tahe paꞌare lu lo tahe paꞌare wou taꞌame. Owane Sitewi lo ipari, tahe paꞌare mi taꞌi aꞌi atuatu tewi fiyarisiya. Sosu aiwawe awei lo lu tahe paꞌare lo mi tereꞌe atuatu tewi fiyarisiya. 41 Fene etiri werese hire maꞌe irosiya ape ne totere. Poweiye lo nihari taꞌi aꞌi ne. Yame lo nihari tereꞌe siyesiya. Sosu aiwawe aꞌi eiwariyemi werese lowe nihari tereꞌe siyesiya. Eiwariyemi taꞌi taꞌi aꞌi nihari tereꞌe tereꞌe irosiya.

42 Owane Sitewi lai lu taune werese si tame norohuwe hene anirowa su, tahe paꞌare nomo lo kewi so aiwawe aꞌi ne. Tahe paꞌare nomo lo temeniye uwaseyei. Kewi so aiwawe aꞌi. Nomo kewi so yehe sameyei su, kewi so temeniye uwaseyei. Owane Sitewi lai nomo si tame norohuwe hene anirowa su, le nomo maꞌe tahe paꞌare tereꞌe aurowa. Tahe paꞌare heꞌi aꞌi ape temeniyerowata. 43 Nomo temeniyeyei su, tahe paꞌare nomo lo uwaseyei. Tahe paꞌare uwaseyei ape, le nihari luwaru aꞌi ironamisiya. Ahowa, Owane Sitewi lai nomo si tame norohuwe hene anirowa su, le nomo maꞌe tahe paꞌare heꞌi aꞌi aurowa. Tahe paꞌare heꞌi aꞌi nihari wisere aꞌi ironamirowa. Nomo temeniyeyei su, tahe paꞌare nomo lo pereꞌe aꞌi ne. Owane Sitewi nomo si tame norohuwe hene anirowa su, tahe paꞌare heꞌi aꞌi nomo lo kairefi pefine aꞌi henerairowa.^p 44 Nomo awei sato ironamisiya su, tahe paꞌare nomo lo awei aiwawe aꞌi ne. Sosu nomo temeniyeyei su, Owane Sitewi lai nomo si tame norohuwe hene anirowa. Sosu le nomo maꞌe tahe paꞌare hepene heꞌi aꞌi aurowa. 45 Owane Sitewi lo one towe sahe meni ta apou leseye, “Meni tutawe Owane Sitewi lai taꞌaneye ape iyape Adam. Owane Sitewi lai le maꞌe marepi hepene norohuwe aꞌi auwe.” Tahe paꞌare nomo lo Adam heꞌi aꞌi wou aꞌi ne. Le nomo maꞌe marepi hepene heꞌi aꞌi auwe. Serai nomo mi mi pasi pasi weriyei ironamitorowa.^q 46 Meni Adam awei sato iroteye su, le awei lo meni pefine aꞌi ne. Ahowa, meni yeꞌewi Krais le marepi hepene heꞌi aꞌi aurowa. 47 Meni tutawe awei maꞌe fai. Le awei lo meni aꞌi ne. Nowe moꞌo se Owane Sitewi lai meni tereꞌe eimawesai. Meni ape lo iyape Jisas Krais. Le niꞌarawe hire maꞌe itorai. 48 Meni ape Adam yaꞌariyei nomo lo ne. Serai nomo werese Adam aiwawe aꞌi ne. Nomo, Jisas Krais ne tote tawesi umasisiya ape, meni ape niꞌarawe hire maꞌe itorai ape wou aꞌi ne. Serai nomo werese marepi hepene pefine lo lu taune henerairowa. 49 Nomo werese awei sahe ironamisiya su, tahe paꞌare nomo lo Adam lo tahe paꞌare aiwawe aꞌi ne. Sosu nowe yeꞌewi se nomo Owane Sitewi lo omo maꞌe yaneyei su, nomo lo tahe paꞌare Krais wou aꞌi ne.

50 Sosu aꞌi pe ane fene maꞌe au teꞌesiya. Fene peri ano wanure. Awei lo tahe paꞌare fisaꞌi lowe witane aꞌi uwaseyei. Lowe Owane Sitewi lo omo maꞌe yanerowata. Lu taune Owane Sitewi lo yo umasinamisiya ape, lowe tahe paꞌare heꞌi aꞌi anirowa. Tahe paꞌare heꞌi aꞌi lowe lo Krais lo tahe paꞌare wou aꞌi ne. Tahe paꞌare heꞌi aꞌi ape lowe uwaserowata.

51 Wanure. Ane peri fareyare aꞌi ta fene maꞌe au teꞌe areiyesiya. Lu taune tamo lowe temeniye tepaꞌasiye. Sosu Jisas Krais si tame itorairowa su, nomo tewi aꞌi sato ironamirowa. Nomo temeniyerowa su, nomo sato ironamirowa su, nomo soꞌoru taꞌama. Ahowa, nomo temeniyerowa su, nomo tahe paꞌare heꞌi aꞌi anirowa. Nomo sato ironamirowa su, nomo aiwawe aꞌi tahe paꞌare heꞌi aꞌi anirowa.^r 52 Sosu nowe yeꞌewi se Owane Sitewi lo ipari wisere aꞌi meneꞌe mapefuwe erasi faterowa. Meneꞌe mapefuwe faterowa su, Owane Sitewi lai tahe paꞌare nomo lo witane meraꞌo aiwawe aꞌi tahe paꞌare heꞌi aꞌi aurowa. Lowe meneꞌe mapefuwe lo noꞌu erasi wanurowa su, lu taune werese temeniye tepaꞌasiye ape, Owane Sitewi lai lowe si tame norohuwe hene anirowa. Serai lowe mi mi pasi pasi weriyei ironamirowa. Sosu nomo werese tahe paꞌare heꞌi aꞌi anirowa.^s 53 Owane Sitewi lai nomo maꞌe tahe paꞌare heꞌi aꞌi aurowa su, tahe paꞌare heꞌi aꞌi nomo lo uwaserowata. Awei tahe paꞌare nomo lo temeniyerowa. Serai Owane Sitewi lai marepi hepene heꞌi aꞌi nomo maꞌe aurowa su, marepi hepene heꞌi aꞌi nomo lo mi mi pasi pasi weriyei ironamitorowa.^t 54 Serai nomo awei lo tahe paꞌare arunatirowa su, nomo marepi hepene heꞌi aꞌi, sosu tahe paꞌare heꞌi aꞌi anirowa. Aiwawe aꞌi Owane Sitewi nomo si tame norohuwe hene anirowa su, nomo mi mi pasi pasi ironamitorowa. Etiri ape mo henerairowa su, Owane Sitewi lo peri teꞌe naneiye wiyeme aꞌi henerairowa. Owane Sitewi lo peri teꞌe naneiye apou teꞌesiya,

58 Serai kaiyemo mo nomo lo, Ane fene werese ne marepi erasi aꞌi tote wawesiyenamisiya. Fene tote tawesiyei fene lo kairefi aꞌi teite. Fene owe ape fekeriyetite. Fene Meni Owane Pefine lo wiyawi ani tohotete. Fene owane lo wiyawi taꞌaneyei su, Owane Sitewi lo wiyawi werese yahowaꞌi aꞌi henerairowata.