3 Kaiyemo mo, ane marepi wisereye aꞌi fene maꞌe marepi hepene heꞌi aꞌi Krais nomo maꞌe auwe ape ne, au leseyei ne toteye. Ahowa, marepi ano orese aꞌi teritesiya. Serai ane peri tereꞌe ta fene maꞌe lesesiya. Sosu ane fene maꞌe kairefi aꞌi au teꞌesiya. Tote tawesiyei fene lo ne Owane Sitewi lai lu taune maꞌe peri pefine tote tawesi tepaꞌasiye ape, fene Owane Sitewi lo peri pefine au noweinowei tote kairefiyenamite. 4 Lu luwaru aꞌi tamo fene ponei sahe taꞌuwe fareyaresiya. Tu naifa weriyei Owane Sitewi lo peri au teꞌe siye lu tamo, lowe ne au leseye. Owane Sitewi lai yo seni lowe lo au hese erei tepaꞌasiye. Yo seni lowe lo apou aꞌi ne. Lu ape mo yo seni luwaru aꞌi ironamisiya. Lowe Owane Sitewi maꞌe ai atu tiyatinamisiya. Lowe lai Owane Sitewi lo ferafereiyei atati arowesiya. Serai lowe faraꞌu taune tamo tafaꞌe yo seni luwaru aꞌi ironamirowa. Sosu lowe Jisas Krais, Meni Owane Pefine aꞌi nomo lo, sosu Meni Owane tutawe nomo lo meꞌiyeni maꞌe atati tei arunatinamisiya.^b

5 Etiri ape mo ne fene soꞌoruwe tepaꞌasiye. Ahowa, ane fene maꞌe etiri ape mo tame teꞌeyei ne totesiya. Tu naifa weriyei Meni Owane Sitewi Pefine aꞌi nomo lo lai lu tewi lo pani Isip henetiyewe, sosu pani tereꞌe maꞌe henerai. Pani Isip arunati su, lowe tamo Owane Sitewi ne tote tawesi taꞌame. Serai Owane Sitewi lai lowe werese le ne tote tawesi taꞌame ape, aine teraꞌeye.^c 6 Sosu aiwawe, Owane Sitewi lo ipari tamo wiyawi lowe lo, Owane Sitewi lowe maꞌe irowei ne auwe ape, aweraꞌiyenatiyewe, iyape erasi heneraiyei ne toteye. Serai lowe omo lowe lo, Owane Sitewi lowe ne ariariyeye ape, arunati. Sosu Owane Sitewi lai lowe wafei se ereti, lowe sahe mi mi pasi pasi ti tawesinamiteye. Sosu le lowe yehe omo pasi aꞌi maꞌe ani fu arosawi. Sosu nowe yeꞌewi su, lowe Owane Sitewi maꞌe teirowa. Sosu Owane Sitewi lai yo seni werese lowe lo au hese ereirowa.^d 7 Sosu tu naifa aiwawe aꞌi omo hesi aꞌi Sodom, Gomora, sosu omo tereꞌe tamo lowe atahe aꞌi iroteye ape, lowe tafaꞌe yo seni tereꞌe tereꞌe luwaruwenamiteye. Nowe moꞌo su Owane Sitewi lai yehe taiso erasi aꞌi hire maꞌe fu arosai. Serai lu taune werese omo hesi ape sahe yehe ti seroꞌo poꞌuteye. Owane Sitewi lai nomo maꞌe au teꞌe atuatu areiyesiya. Serai lu taune werese yo seni luwaru aꞌi ironamisiya ape, Owane Sitewi lai lowe mi mi pasi pasi yehe taise ti seroꞌo poꞌutenamirowa. Lu taune werese apou ape siye soꞌoruwerowa.^e

8 Sosu aiwawe aꞌi lu ape mo fene mase fareyare aꞌi taꞌuwerai ape ne, ane tu fene maꞌe teꞌeye. Lowe suwou peri wawero aꞌi siyesiya. Serai lowe tahe paꞌare towafi lowe lo ne tafaꞌe yo seni lai au luwaruwesiya. Lowe awei lu owane werese lo peri arisinamisiya. Sosu lowe Owane Sitewi lo ipari mitaiyeyei aꞌi ape maꞌe teꞌe narusiya. 9 Ahowa, Owane Sitewi lo ipari tutawe iyape Maikel, le sepei Satan maꞌe Moses lo tahe paꞌare ne ai peri teꞌe tiyatiye su, le Satan lo yo seni teꞌe naruwei se au hese erei taꞌame. Ahowa, le le maꞌe apou eiye, “Owane Sitewi, Meni Owane Pefine aꞌi lai ne maꞌe fofowei erasi aꞌi aurowa.”^f 10 Lu ape mo etiri werese ape mo lowe soꞌoru taꞌama ape, lowe etiri ape mo maꞌe peri luwaru aꞌi au teꞌe narusiya. Sosu lu ape mo you tamo fe erawe, tamo aiwawe wou aꞌi ne. Lowe etiri ape marepi lowe lo maꞌe fai ape, lowe soꞌoruwesiya. Etiri ape mo lowe marepi papu irosiya ape, etiri ape lai marepi hepene lowe lo au luwaruwe poꞌuterowa.^g

11 Owane Sitewi lai lowe maꞌe au hese ereirowa. Weiyai! Lowe Kein lo yo seni luwaru aiwawe aꞌi umasisiya. Lowe meni Balam aiwawe aꞌi ne. Tu naifa meni Balam Owane Sitewi lo lu tewi god wawero maꞌe hene tatai aniteye. Sosu maꞌaru tomu neꞌese aniye. Serai lu luwaru aꞌi tamo fene ponei sahe irosiya ape, Owane Sitewi lai lowe werese aine teraꞌe poꞌuterowa. Apou wou aꞌi tu naifa Owane Sitewi lai meni Kora aine teraꞌe poꞌuteye. Meni Kora, lu taune tomu neꞌese aiwawe aꞌi Moses lo peri arisiteye. Serai Owane Sitewi lai lowe werese aine teraꞌe ereye.^h

12 Sosu aꞌi pe lu luwaru aꞌi ape mo taꞌuwe hereiyei fene lo ene ayei ne taꞌuwerai su, lowe me teꞌe saꞌi papu irosiya ape, wou aꞌi ne. Lu tamo me teꞌe siye taꞌame su, lowe wai sahe me teꞌe aine aporuwei. Lowe marepi towafi lowe lo au noweinoweisiya. Sosu lowe neritase se taꞌama. Yo seni lowe lo iroteye ape, lowe aitu sapu yahowaꞌi apou wou aꞌi ne. Lu tiyati siye feraferei se taꞌama. Fiyaru lai aitu sapu faseti fasetai irowe. Saꞌi ito taꞌame. Patiyawe so taꞌeyei huse henerai su, me ape so werese taꞌe taꞌame. Serai me patiyawe ape lu tamo lai tahe sasarirowa. Serai me ape nowe hesi aꞌi temeniyeye. Lu luwaru aꞌi ape mo mesi apou wou aꞌi ne.ⁱ

13 Lowe saꞌi ei wou aꞌi ne. Saꞌi ei omo maꞌe itorai su, saꞌi pisaro erasi henerai. Lu tewi apou aꞌi ne. Lowe neritaseyeyei lowe lo pisaro aiwawe aꞌi henerai. Lowe eiwariyemi apou wou aꞌi ne. Lowe meremereye uweisiya. Owane Sitewi lai omo pasi wiyeme aꞌi lowe ne taꞌaneyewe, nowe yeꞌewi se lowe ani fu arosawirowa.

14 Meni ta iyape Enok, Adam lo auwe kaukau toꞌu. Meni ape Enok lowe ne apou aꞌi au teꞌe areiyeye, “Siyere! Owane Sitewi, Meni Owane Pefine nomo lo itoraisiya. Ipari wisere waraꞌi aꞌi lo tomu neꞌese aꞌi le mase itoraisiya.^j 15 Owane Sitewi, Meni Owane Pefine aꞌi itoraiyei su, le lu taune luwaru werese aꞌi maꞌe au hese ereirowa. Lu taune yo seni luwaru aꞌi iroteye ape, le lowe maꞌe fofowei erasi aꞌi aurowa. Lowe Owane Sitewi maꞌe ai atu tiyatinamirowa ape, sosu lowe Owane Sitewi maꞌe ai peri luwaru aꞌi au teꞌe narunamirowa ape, le lowe werese ani hese ereirowawe, lowe maꞌe fofowei erasi aꞌi aurowa.” 16 Lu taune ape mo ai peri erasi teꞌenamisiya. Lowe lu taune tereꞌe lo yo seni luwaru aꞌi au teꞌe areiyeye. Lowe marepi luwaru aꞌi towafi lowe lo umasinamisiya. Lowe lai marepi lowe lo ei ani arowesiya. Sosu lowe lu taune tereꞌe maꞌe peri teꞌe wisereyesiya su, lowe maꞌaru tomu neꞌese aniyei ne totesiya.

17 Ahowa, kaiyemo mo, fene Meni Owane Krais Jisas lo aposel lo peri, nomo maꞌe tu au teꞌeye ape, owe ape tote iꞌanete. 18 Lowe apou aꞌi au teꞌe areiyeye, “Nowe mi mi yeꞌewi ataheye tepaꞌasiye su, lu taune tamo Owane Sitewi lo marepi werese maꞌe teꞌe narurowa. Lowe marepi luwaru aꞌi towafi lowe lo umasinamirowa.”^k 19 Lu taune ape mo Owane Sitewi lo lu feni marepi lowe lo teꞌe tatai ani erauwi fereꞌesiya. Lu taune ape mo yaꞌariyei lo marepi umasinamisiya. Lowe Owane Sitewi lo Hepene Waraꞌi aꞌi iro se taꞌame.

20 Ahowa, fene werese, wanure! Kaiyemo mo, fene tote tawesiyei waraꞌi aꞌi Owane Sitewi fene maꞌe auwe ape, kairefi aꞌi irote. Sosu fene Owane Sitewi maꞌe teꞌe tiyatiteyei su, fene Hepene Waraꞌi aꞌi lo se au teꞌete.^l 21 Sosu aꞌi pe fene Owane Sitewi lo tote wawesiyeyei ape sahe ironamite. Fene Meni Owane Jisas Krais lo seremareyeyei ninawete. Le si tame itorairowa su, le marepi hepene heꞌi aꞌi, mi mi pasi pasi weriyei ironamitorowa ape, fene maꞌe aurowa.

22 Lu taune ape mo tote tawesiyei Owane Sitewi ne kairefi se taꞌama. Fene lowe maꞌe ferafereiyei aꞌi au atuatute. 23 Lu taune tamo yo seni luwaru aꞌi yehe omo maꞌe eimawesawirowa ape, fene lowe yehe maꞌe tohote ani tepaꞌasi anire. Lu taune tereꞌe maꞌe, fene atoweiyeyei se lowe maꞌe au atuatu ferafereite. Serai fene marepi luwaru aꞌi lowe lo umasirowata. Fene ferafereiyei lowe maꞌe au atuaturowa su, fene yo seni etiri luwaru werese lowe lo meꞌiyeni maꞌe atati arunatite.^m

24 Owane Sitewi lai fene werese maꞌe au pati tei kairefiyesiya. Serai fene yo seni luwaru aꞌi wiyeinerowata. Le fene yo seni waraꞌi aꞌi omo wisere aꞌi lo maꞌe hene ani wirowa. Serai Owane Sitewi lo nihe se fene marepi waraꞌi aꞌi le mase ironamitorowa. Le marepi nineꞌiyei lo fene maꞌe aurowa. 25 Meni Owane Jisas Krais lo iyape se nomo Owane Sitewi pefine aꞌi lo iyape ei ani arowete. Le Owane Sitewi Pefine taꞌi aꞌi ne. Le yo seni luwaru aꞌi nomo lo au sasarisawi tepaꞌasiyewe, marepi hepene heꞌi aꞌi nomo maꞌe auwe. Nomo mitaiyeyei pefine aꞌi le maꞌe ei ani arowete. Le kairefi pefine aꞌi ironamisiya. Le Meni Owane tutawe pefine aꞌi ne. Le tu naifa weriyei weriyei aiwawe aꞌi ironamiteye. Sosu aiwawe aꞌi le nowe mi mi pasi pasi weriyei ironamitorowa. Wiyeme aꞌi tene!ⁿ