22
Sosu Owane Sitewi lo ipari ape ane maꞌe hepene norohu lo saꞌi mai au atuatuwe. Saꞌi mai waraꞌi aꞌi ape, Owane Sitewi, sosu fe sipsip yene, lowesi lo me tutoꞌu maꞌe oweirai.a 2 Saꞌi mai ape omo weniyei sahe yo mai ponei oweirai. Saꞌi ape tewiye hesi sahe hepene norohu lo me saro teiteye. Me so loꞌu tomu neꞌese iyu menei taꞌi aꞌi se nowe ereti feni hesi lowe hesi aꞌi (12) taꞌeye. Me ape lai so werese lo yame taꞌi taꞌi aꞌi se taꞌesiya. Me ape lo towe se lu taune werese werese lai lowe wisere aꞌi ironamitorowa.b 3 Sosu yo seni luwaru aꞌi, lu taune iroteye ape, Owane Sitewi lai lowe maꞌe apou teꞌerowa, “Fene yo seni luwaru aꞌi iroteye ape, ane fene ne marepi luwaru aꞌi totenamisiya.” Lu taune werese, yo seni luwaru aꞌi, apou ape iroteye ape, lowe omo weniyei ape wirowata.Ahowa, Owane Sitewi, sosu fe sipsip yene, lowesi lai me tutoꞌu tutawe sahe onunamitorowa. Wiyawi lu taune werese lowesi lo, omo weniyei ape ironamisiya ape, lowe lowesi maꞌe au teꞌe nineꞌi wisereyenamitorowa. 4 Lowe Owane Sitewi lo nihari siyerowa. Sosu Iyape lo mapine lowe lo sahe au leserowa.c 5 Sosu Owane Sitewi lo mi erasi pefine aꞌi omo weniyei ape maꞌe tewi mitaiye fiyarinamirowa. Serai poweiye, yehe erei mi saro irotorowata. Lowe mi mi pasi pasi weriyei au noweinoweinamitorowa.d
Jisas si tame itorairowa.
6 Sosu aꞌi pe Owane Sitewi lo ipari ape ane maꞌe eiye, “Peri werese one towe eite sahe wiyeme pefine aꞌi ne. Etiri werese, ne siyeteye ape, pefine aꞌi henerairowa.” Sosu Meni Owane Pefine ape, Owane Sitewi lo peri au teꞌe siye lu werese maꞌe au teꞌeteye ape, le lai Hepene Waraꞌi aꞌi lo, wiyawi lu taune maꞌe eimawe arosai. Le etiri werese ape mo iꞌero aꞌi henerairowa ape, au atuatuwei ne itorai.e
7 Sosu Wanure! Ane witane aꞌi aiyerowa! Peri werese, one towe eite sahe leseteye ape, apou teꞌesiya. “Etiri werese ape mo pefine aꞌi henerairowa. Serai lu taune werese peri ape wanu tote umasisiya ape, marepi lowe lo nineꞌinamirowa.”f
8 Iyape ano, Jon. Ane peri werese ape mo wanuwe. Sosu etiri werese ape mo siye tepaꞌasiye. Owane Sitewi lo ipari etiri werese ape mo ane maꞌe au atuatuteye ape ne, ane etiri ape mo wanuwe ape, siyeye su, ane Owane Sitewi lo ipari ape lowe uporo apeꞌi onuwewe, au teꞌe wisere nineꞌiteye.g 9 Ahowa, le ane maꞌe eiye, “Ne ane ne lowe uporo owe ape apeꞌi onure. Ane ne aiwawe aꞌi Owane Sitewi lo wiyawi meni tene! Ane Owane Sitewi lo peri au teꞌe siye lu, kaiyemo mo no ape, aiwawe aꞌi ne. Sosu lu taune peri werese ape mo one towe eite sahe wanu tote umasinamisiya ape, ane lowe aiwawe aꞌi ne. Serai ne ane ne owe ape au teꞌe wisereye nineꞌite. Ne Owane Sitewi ne au teꞌe wisereye nineꞌinamite.”
10 Sosu le ane maꞌe eiye, “Ne peri werese one towe eite sahe iꞌero aꞌi henerairowa ape, owe ape ti tawesire. Nowe ape se witane aꞌi henerairowa. 11 Lu taune yo seni luwaru aꞌi irosiya ape, lowe yo seni luwaru aꞌi fa ironamite. Lu taune marepi unou aꞌi totesiya ape, lowe marepi unou aꞌi ape fa totenamite. Lu taune yo seni farere wisere aꞌi irosiya ape mo, lowe yo seni ape aꞌi fa ironamite. Sosu lu taune yo seni waraꞌi aꞌi irosiya ape, lowe yo seni apou ape fa ironamite.”h
12 “Wanure! Ane iꞌero witane aꞌi aiyerowa. Ane aiyerowa su, ane etiri tamo aitairowa. Lu taune tamo yo seni luwaru aꞌi ironamisiya ape, ane lowe maꞌe fofowei erasi itiyaꞌu aurowa. Lu taune yo seni wisere aꞌi ironamisiya ape, ane lowe maꞌe wisere aꞌi itiyaꞌu aurowa.i 13 Piyene awere? Ane aꞌi lai tu naifa weriyei weriyei ironamiteye. Sosu ane nowe yeꞌewi se ironamitorowa. Ane etiri werese ape mo lo sitewi. Sosu ane etiri werese taꞌaneye.j
14 Lu taune peri werese ano wanu tote umasinamisiya su, lowe apou aiwawe aꞌi lu taune ipari tahe au husiya. Yo seni lowe lo waraꞌi aꞌi heneraiyei su, lowe hepene norohu lo me lo so ape faraꞌu arowa. Lowe faraꞌu omo weniyei lo yo tewi papu wirowa.k 15 Omo weniyei nowe maꞌe lu taune sinariyei lo yo seni iroteye ape, lu taune, tafaꞌe yo seni luwaru aꞌi iroteye ape, lu taune tiyati aine teraꞌeteye ape, lu taune god wawero au nineꞌiteye ape, sosu lu taune peri wawero ape mo marepi erasi aꞌi tote umasinamisiya ape, sosu lu taune werese yo seni luwaru aꞌi irosiya ape mo, you luwaru wou aꞌi ne. Lowe werese Owane Sitewi lo omo weniyei nowe maꞌe ironamitorowa.
16 Ane aꞌi lai, Jisas. Ane peri pefine aꞌi ape ipari wisere aꞌi ano ne maꞌe au teꞌeyei ne eimawe arosai. Ne peri pefine aꞌi ape lu taune iyape ano ne, taꞌuwesiya ape maꞌe, au teꞌete. Ane aꞌi lai meni owane Devit lo yaꞌariyei sitewi meni ne. Sosu aiwawe aꞌi ane Devit lo eime auwe. Ane apou aiwawe aꞌi eiwariyemi erasi, nowe esi pasi henerai ape, siyesiya.”l
17 Owane Sitewi lo Hepene Waraꞌi aꞌi, sosu lu feni pefine aꞌi lo, nomo lowe fe sipsip lo tani apou teꞌesiya, “Fene aiya!” Fene werese peri ape wanu umasisiya ape, lowe aiwawe aꞌi apou teꞌere. “Fene aiya!” Fene taune saꞌi wawe teriteyei su, lowe fa aiya! Ane saꞌi ape hepene norohuwe ausiya ape, ane lowe maꞌe neri aꞌi aurowa.m
Peri yeꞌewi.
18 Lu taune werese peri ape one towe eite sahe wanuwei ape, ane, Jon, lowe maꞌe peri kairefi aꞌi au teꞌesiya. “Fene weiyai!” Lu taune tamo peri heꞌi tereꞌe ta one towe sahe leseyei su, Owane Sitewi lai marepi orese aꞌi one towe eite sahe irosiya ape, lowe maꞌe itiyaꞌu aurowa. 19 Sosu aiwawe aꞌi lu taune tamo lai peri ta henerairowa ape one towe eite sahe ani sasariyei su, Owane Sitewi lai peri teꞌe naneiyei lo lowe maꞌe au sasariyei. Lowe omo weniyei waraꞌi aꞌi ano wirairowata. Lowe me lo so, hepene norohuwe iroteyei ape, arowata. Etiri werese ane one towe eite sahe au teꞌe tepaꞌasiye ape, lowe anirowata.n
20 Meni ape, peri pefine aꞌi ape au teꞌesiya ape, le apou eiye. “Pefine wiyeme aꞌi ne. Ane aꞌi lai iꞌero witane aꞌi aiyerowa.” Ei, ane aiwawe aꞌi totesiya. Meni Owane Jisas, ne aiyere!o
21 Serai Meni Owane Jisas lo seremareyeyei nomo werese maꞌe Owane Sitewi lo peri tote umasisiya ape, fa ironamite. Peri werese ape wiyeme aꞌi ne.