Niꞌarawe heꞌi aꞌi, sosu awei heꞌi henerai.
21
Sosu aꞌi pe ane niꞌarawe heꞌi, awei heꞌi aꞌi siyeye. Niꞌarawe weriyei, awei weriyei lowesi poꞌuteye.a 2 Sosu ane omo Jerusalem weriyei poꞌuteyei siyeye. Sosu Owane Sitewi lo omo heꞌi aꞌi niꞌarawe hire maꞌe itorai. Omo Jerusalem heꞌi aꞌi nihari lo wisere aꞌi leseteye. Menitani ta meni lo naitu ene ayei ne naneisiya ape, wou aꞌi ne. Le ipari tahe wisere pefine aꞌi ani asiteye.b 3 Sosu ane peri noꞌu erasi aꞌi me tutoꞌu pefine aꞌi maꞌe apou uteyei wanuwe, “Wanure! Owane Sitewi lai lu taune mase saro ironamitorowa. Le lowe mase mi mi pasi pasi weriyei ironamitorowa. Lowe werese lu feni pefine lo henerairowa. Sosu Owane Sitewi aꞌi lai lowe aiwawe aꞌi ironamitorowa. Le aꞌi lai Owane Sitewi lowe lo henerairowa.c 4 Sosu le lai marepi luwaru orese aꞌi lowe lo ani sasari poꞌuterowa. Etiri weriyei werese aꞌi poꞌuterowa. Serai lowe tame lurowata. Temeniyeyei werese poꞌuterowa. Lowe uruwei irorowata. Luwei werese poꞌuterowa. Fofowei werese poꞌuterowa.”d5 Sosu meni ape, me tutoꞌu tutawe sahe onusiya ape, apou eiye, “Wanure! Ane etiri werese heꞌi aꞌi taꞌanerowa.” Sosu aiwawe aꞌi le apou eiye, “Ne peri ano ape lesere! Peri werese ano pefine aꞌi ne. Ane peri ta au teꞌeyei su, peri ano ape pefine aꞌi henerairowa.”e 6 Sosu le ane maꞌe apou eiye, “Eite tepaꞌasiye. Etiri werese ane irowei ne toteteye ape, Ane taꞌane iro tepaꞌasiye. Ane tu naifa weriyei weriyei ironamiteye. Sosu ane nowe yeꞌewi se ironamitorowa. Ane etiri werese lo sitewi. Sosu aiwawe aꞌi wiyawi werese ano tepaꞌasiye. Lu taune saꞌi wawe teriteyei su, ane lai lowe maꞌe saꞌi pitomuwe waraꞌi aꞌi hepene norohuwe weriyei iroteyei ape au arowa. Lowe saꞌi ape ne maꞌaru tamo itiyaꞌu aurowata.f 7 Lu taune werese awei lo yo seni luwaru aꞌi ani araroteyei ape, ane lowe maꞌe etiri ta neri aꞌi aurowa. Ane aꞌi lai Owane Sitewi pefine lowe lo ne. Sosu lowe eimane pefine aꞌi ano henerairowa.g 8 Ahowa, lu taune Krais ne umasiyei ne atoweiye neritaseyeyei ape mo, lu taune ane ne tote tawesi taꞌame ape, lu taune marepi unou aꞌi totesiya ape, lu taune tiyati aine teraꞌesiya ape, lu taune tafaꞌe yo seni luwaru aꞌi irosiya ape, lu taune sinariyei se ape, lu taune god wawero au nineꞌisiya ape, lu taune peri wawero aꞌi teꞌesiya ape, Owane Sitewi lai lowe werese tapiye salfa yehe hare ite maꞌe ani fu arosawirowa. Lowe yehe hare ite sahe ironamitorowa su, temeniyeyei ape toꞌuresi aꞌi ne.”h
Omo weniyei Jerusalem heꞌi aꞌi itorai.
9 Sosu aꞌi pe Owane Sitewi lo ipari ereti feni werese feni hesi aꞌi, nowe tu se Owane Sitewi lo ai marepi wahu sahe iroteye ape, hi awei maꞌe ani teroso arosai ape, ipari taꞌi lai itoraiyewe, le ane se apou teꞌerai. Ipari ape ane se apou eiye. “Ne aiya. Ane ne maꞌe menitani ape fe sipsip yene lo naituwei ape au atuatuwei.” 10 Sosu Owane Sitewi lo Hepene Waraꞌi aꞌi ane papu wiyewe, omo pihatu erasi ta hene yaneye. Le Owane Sitewi lo omo weniyei Jerusalem waraꞌi aꞌi ane maꞌe au atuatu areiyeye. Owane Sitewi lai omo lo ape niꞌarawe hire maꞌe eimawe arosai.i 11 Omo ape Owane Sitewi lo mitaiyeyei wou aꞌi tewi mitaiye fiyarisiya. Mi erasi lo tapiye waraꞌi wou tewi mitaiyesiya. Tapiye norohuwe loꞌu aseyaro aꞌi wou tewi mitaiye fiyarisiya.j 12 Omo ape tapiye fisahe erasi pite aꞌi yose ti tawesiteye. Tapiye fisahe papu yo erasi ereti feni hesi lowe hesi aꞌi (12) iroteye. Owane Sitewi lo ipari ereti feni hesi lowe hesi aꞌi (12) iroteye. Owane Sitewi lo ipari ereti hesi werese lowe hesi aꞌi, lowe yo tewiye taꞌi taꞌi ape mo au noweinoweiteye. Meni Israel lo eimane ereti feni hesi lowe hesi aꞌi (12) lo iyape lowe lo yo tewiye ape sahe leseteye.k 13 Yo tewiye hesi heta, poweiye wiraisiya ape, maꞌe iyape taꞌi taꞌi ta leseye. Sosu yo tewiye hesi heta, poweiye itorisiya ape maꞌe, iyape taꞌi taꞌi ta leseye. Sosu yo tewiye hesi heta, ereti eyate feni irosiya ape maꞌe, iyape taꞌi taꞌi ta leseye. Sosu yo tewiye hesi heta, ereti epi feni irosiya ape maꞌe, iyape taꞌi taꞌi ta leseye. 14 Tapiye fisahe omo ape yose ti tawesiteye ape, tapiye fisahe lo sitewi kairefi aꞌi ereti feni hesi lowe hesi aꞌi (12) iroteye. Tapiye sitewi ape sahe fe sipsip yene lo lu feni pefine aꞌi lo iyape au leseye.
15 Owane Sitewi lo ipari ane maꞌe teꞌeteye ape, le haweseyei me ta tapiye gol se taꞌaneye ape ereti lo se aniteye. Omo weniyei ape haweseteye. Tapiye fisahe pite aꞌi haweseteye. Yo tewiye ape haweseteye. Le haweseyei me ta se haweseyei ne totesiya.l 16 Omo weniyei lo tewiye werese aiwawe aꞌi au haweseye. Owane Sitewi lo ipari ape lai omo weniyei ape haweseyei me se au haweseye. Omo weniyei lo tewiye werese 2,200 kilomita haweseteye. Omo weniyei pite aꞌi apou aiwawe aꞌi 2,200 kilomita. 17 Le tapiye fisahe pite aꞌi haweseye. Haweseyei me ape se, nomo hi awei sahe irosiya ape, wesi towafi nomo lo ta au hawesesiya. Owane Sitewi lo ipari ape tapiye fisahe pite aꞌi, aiwawe aꞌi 65 mita haweseyei me ape se au haweseye. 18 Tapiye fisahe ape tapiye loꞌu norohuwe waraꞌi aꞌi se taꞌaneye. Omo weniyei ape tapiye gol waraꞌi aꞌi se taꞌaneye. Saꞌi waraꞌi wou aꞌi ne. 19 Fisahe lo sitewi ape, lowe tapiye wisere waraꞌi aꞌi ape sahe au leseteye. Tapiye sitewi neme tapiye loꞌu norohuwe waraꞌi aꞌi ne. Tapiye lo iyape jaspa. Tapiye sitewi nemeroru apou aiwawe aꞌi norohuwe waraꞌi aꞌi ne. Tapiye ape lo iyape safaia. Tapiye sitewi faforu iyape agate. Nihari tereꞌe tereꞌe aiwawe aꞌi ne. Tapiye sitewi ororu iyape emerald. Nihari ape lo norohuwe pefine aꞌi ne.m 20 Tapiye sitewi erenawe iyape sardoniks. Nihari lo apou wou loꞌu aꞌi ne. Tapiye sitewi moruwene iyape kanelian. Nihari lo loꞌu tereꞌe aꞌi ne. Tapiye sitewi toꞌu lo iyape krisolait. Nihari lo ape wareme waraꞌi aꞌi ne. Tapiye sitewi orowene lo iyape beril. Nihari lo ape norohuwe tereꞌe aꞌi ne. Tapiye sitewi pife lo iyape topas. Nihari lo ape wareme aꞌi ne. Tapiye sitewi iyoꞌo lo iyape krisopras. Nihari lo ape motowe heꞌi aꞌi wou aꞌi ne. Tapiye sitewi pereꞌi lo iyape haiasin. Nihari lo ape apou loꞌu wareme aꞌi ne. Tapiye sitewi apaniye lo iyape ametis. Me yesi so lo nihari aiwawe aꞌi ne. 21 Sosu yo tewiye ereti feni hesi lowe hesi aꞌi (12) lowe tapiye waseyare se taꞌaneteye. Yo tewi taꞌi taꞌi ape tapiye waseyare taꞌi erasi pefine aꞌi se taꞌaneteye. Omo weniyei ape lo yo mai erasi ape tapiye gol waraꞌi aꞌi se taꞌaneteye.
22 Sosu ane Owane Sitewi lo wesi tutawe ta siye taꞌame. Ahowa, Owane Sitewi erasi pefine aꞌi, sosu fe sipsip yene lowesi lai Owane Sitewi lo wesi tutawe aꞌi ne. 23 Sosu omo weniyei ape sahe poweiye yame mi se taꞌama. Lowe wiyawi se taꞌama. Piyene awere? Owane Sitewi lo mi erasi pefine aꞌi omo weniyei ape sahe tewi mitaiye fiyarinamisiya. Fe sipsip yene lo mi aiwawe aꞌi yehe mi erasi wou tewi mitaiye fiyarinamisiya.n 24 Lu taune werese werese aꞌi mitaiyeyei lowesi lo ape sahe ironamitorowa. Sosu awei lo lu owane tutawe ape mo lowe maꞌaru etiri wisere pefine aꞌi lowe lo omo weniyei ape sahe ani wirowa.o 25 Sosu lowe omo weniyei ape lo yo werese ti tawesi taꞌame. Piyene awere? Nowe pasi werese aꞌi poꞌuteye.p 26 Lu taune omo omo pani werese iroteye ape, lowe etiri wisere aꞌi towafi lowe lo omo weniyei ape papu aitairowa. 27 Ahowa, etiri luwaru unou werese aꞌi omo ape sahe wirowata. Lu taune werese yo seni luwaru aꞌi ironamiteye ape, sosu lu taune werese peri wawero teꞌeteye ape, lowe werese omo ape sahe wirowata. Ahowa, lu taune werese iyape lowe lo fe sipsip yene lo one towe hepene norohuwe sahe leseye ape mo, lowe faraꞌu omo weniyei ape wirowa.q