4 Sosu moꞌo ane lu tamo lu owane lo me tutoꞌu saro onuteye ape siyeye. Owane Sitewi lowe maꞌe kairefi tamo yo seni au hese ereiyei ne auwe. Sosu aiwawe aꞌi ane lu taune tamo lo hepene siyeye. Lowe lu taune maꞌe Jisas lo yo seni waraꞌi aꞌi, sosu Owane Sitewi lo peri au teꞌe fiyari areiyeye. Lowe Owane Sitewi lo peri au teꞌeye su, airame lowe lo mato lowe lo aine tou teraꞌe ereteye. Lowe saꞌi eifariyai, sosu nihari hawese lo ape au wisereye nineꞌi taꞌame. Mapine sahe sosu ereti lo sahe lowe saꞌi eifariyai lo yaru lese taꞌame. Serai Owane Sitewi lai lowe si tame taꞌane norohuwe sineteyewe, lowe iyu menei tausen taꞌi aꞌi se Meni Owane Krais mase lu taune werese au noweinoweiteye.^c 5 Lu taune ape mo si tame norohuwe sineteye su, nowe tu ape se Owane Sitewi lowe ape mo si tame norohuwe sineteye. Lu taune tereꞌe werese ape mo fisiye yo saro iroteye. Iyu menei tomu neꞌese (1,000) i tepaꞌasiye su, Owane Sitewi lai lowe werese si tame taꞌane norohuwe sinerowa. 6 Lu taune ape mo ne Owane Sitewi lai tu si tame taꞌane norohuwe sineteye ape, lowe marepi wisereye nineꞌinamirowa. Yo seni lowe lo aseyaro waraꞌi aꞌi ne. Lowe temeniyeyei toꞌuresi ape temeniyerowata. Serai lowe Owane Sitewi lo omo hire sahe ironamitorowa. Ahowa, lowe Owane Sitewi, sosu Meni Owane Krais lo ponei lu taune henerairowa. Lowe iyu menei tausen taꞌi le mase lu taune au noweinoweinamirowa.^d

7 Iyu menei tausen taꞌi aꞌi i tepaꞌasiyei su, Owane Sitewi lai sepei Satan tame nowe maꞌe fisiye yo erau toso hene arosairowa. 8 Fisiye yo nowe maꞌe hene arosairowa su, le lu taune omo omo pani irorowa ape, peri wawero se arearerowa. Le lu taune omo pani sahe poweiye wirai siye maꞌe, poweiye itori siye maꞌe, tewiye tewiye hesi maꞌe ape mo werese ei taꞌuwe anirowa. Omo pani Gok, sosu omo pani Magog, le lu taune ape mo ai atuwei ne taꞌuwerairowa. Lu taune tomu neꞌese nawiteyei lowe lo eneri wou aꞌi ne.^e 9 Ai lu tomu neꞌese werese ape omo omo pani maꞌe pite aꞌi tei toreyewe, aiyeteye. Lowe Owane Sitewi lo lu feni omo wesi weniyei ape sahe iroteye ape tei yose taꞌuwerai. Ahowa, Owane Sitewi lai yehe erasi hire maꞌe fu arosaiyewe, ai lu werese ape mo ti seroꞌo poꞌuteye.^f 10 Yehe tapiye salfa sahe tisiye ape, saꞌi eifariyai, sosu meni peri wawero aꞌi saro iroteye ape, Owane Sitewi lai sepei Satan aiwawe aꞌi hare ite yehe titeye apou maꞌe ani fu arosawi. Sepei Satan ai lu werese ape mo au areareteye. Lowe hesi heta yehe harite sahe mi mi pasi pasi ironamitorowa. Lowe fofowei erasi pefine aꞌi teritenamitorowa.^g

11 Sosu aꞌi pe ane me tutoꞌu wapo erasi aꞌi saro iroteyei siyeye. Ane meni ta me tutoꞌu ape sahe onuteyei siyeye. Etiri werese werese hi awei omo pani sahe ape, sosu niꞌarawe hire sahe ape meni ape lo nihe se atoweiye iteroti. Piye omo maꞌe atoweiye iterorowata. 12 Sosu ane lu taune werese temeniyeteye ape, lu taune iyape se, sosu lu taune yahowaꞌi tamo ne, lowe me tutoꞌu erasi wapo aꞌi sahe teiteyei siyeye. Owane Sitewi lo ipari tamo one towe tamo ani toso fuwe. One towe ape sahe lu taune lo yo seni werese leseteye. Serai meni ape me tutoꞌu onuteye ape, lu taune temeniyeteye ape, le lai yo seni, lowe iroteye ape, au hese ereiteye. Sosu one towe tereꞌe ta ani toso fuwe. Lu taune werese Jisas lo peri tote tawesi umasiteye ape, iyape lowe lo hepene norohuwe lo one towe ape sahe lese fuwe.^h 13 Sosu lu taune saꞌi erasi sahe temeniyeteye ape, lowe norohuwe sineye, sosu lu taune werese tu temeniyeye ape, temeniyeyei omo sahe iroteye ape, sosu lowe werese si tame taꞌane norohuwe sineteyewe, meni ape me tutoꞌu sahe teiteye ape, yo seni werese, lowe iroteye ape, le lowe au hese ereiteye.ⁱ 14-15 Sosu temeniyeyei lo seni ape, sosu temeniyeyei lo omo ape, Owane Sitewi lai yehe hare ite maꞌe ani fu arosawi. Sosu lu taune tamo lo iyape hepene norohuwe lo one towe sahe lese fu taꞌame su, lowe yehe hare ite maꞌe ani fu arosawirowa. Le lu taune ape mo yehe hare ite maꞌe ani fu arosawi su, nowe ape se temeniyeyei toꞌuresi wou ne. Serai temeniyeyei lo seni werese poꞌutenamiye.