Lu taune tomu neꞌese Owane Sitewi maꞌe au teꞌe nineꞌiteye.
19
Sosu aꞌi pe ane lu taune lo peri noꞌu erasi niꞌarawe hire maꞌe wanuwe. Lowe apou uteye,“Nomo Owane Sitewi lo iyape teꞌe ani arowete.
Le lai nomo si ete hene aniye.
Mi erasi pefine lo mi mi pasi pasi ironamitorowa.
Le kairefi erasi aꞌi ironamitorowa.
2 Le yo seni werese au hese ereiyei su,
peri werese lo wiyeme pefine aꞌi ne.
Au hese ereiyei lo ape farere aꞌi ironamisiya.
Le tafaꞌe menitani lo yo seni luwaru aꞌi au hese erei tepaꞌasiye.
Tafaꞌe menitani ape lu taune werese omo omo pani iroteye ape,
tafaꞌe yo seni luwaru aꞌi lo se au luwaruweteye.
Menitani ape lai Owane Sitewi lo wiyawi,
lu taune taꞌaneteye ape mo, aine teraꞌeteye.
Serai Owane Sitewi lai le maꞌe fofowei erasi aiwawe aꞌi itiyaꞌu auwe.”a
3 Sosu lowe peri noꞌu erasi apou tame uteye,
“Nomo Owane Sitewi lo iyape teꞌe ani arowete. Yehe ape omo Babilon ti seroꞌoteye ape, itomu lo ape mi mi pasi pasi weriyei winamitorowa.”
4 Sosu yaꞌariyei lu owane meni ta werese hesiyo hesiyo, sosu etiri hesiyo hesiyo ape marepi hepene norohuwe irosiya ape, lowe werese Owane Sitewi me tutoꞌu tutawe onusiya ape, lowe le maꞌe lowe uporo apeꞌi onuwewe, le maꞌe au teꞌe wisereye nineꞌiteye. Lowe apou uteye,
“Nomo Owane Sitewi lo iyape teꞌe ani arowete. Peri ape pefine aꞌi ne.”
Fe sipsip yene menitani ta naituwe.
5 Sosu aꞌi pe peri noꞌu ta Owane Sitewi lo me tutoꞌu atahe sahe uteye.
“Fene Owane Sitewi maꞌe wiyawi au taꞌanesiya ape, fene le ne au teꞌe wisereye nineꞌite, fene le maꞌe unahi teinamisiya ape, fene iyape erasi se ape, sosu fene lu taune yahowaꞌi ape ne. Fene werese iyape pefine aꞌi lo teꞌe ani arowete.”
6 Sosu ane lu taune neꞌese lo peri noꞌu erasi aꞌi wanuwe. Pesiyei, sosu saꞌi noꞌu erasi aiwawe wou wanuwe. Lowe apou uteye,
“Nomo Owane Sitewi lo iyape teꞌe ani arowete. Owane Sitewi nomo lo, le lu taune werese werese kairefi erasi lo se au noweinoweinamisiya.b
7 Marepi nomo lo tote wisereye nineꞌinamite. Le erasi pefine aꞌi tene! Nomo le maꞌe au teꞌe wisereye nineꞌinamite. Fe sipsip yene menitani ta naituwei ape, nowe ape henerai. Menitani lo ape taꞌuwe nanei tepaꞌasiye.c
8 Lowe menitani ape maꞌe ipari tahe wisere pefine aꞌi ani asiyei ne auwe. Ipari tahe lo wapo aseyaro aꞌi ne.” Ipari tahe ape apou aꞌi ne, yo seni aseyaro waraꞌi aꞌi Owane Sitewi lo lu feni taꞌaneteye ape ne.d
9 Sosu Owane Sitewi lo ipari ta ane maꞌe eiye, “Ne peri ape apou lesere! Lu taune werese fe sipsip yene lo menitani naituwei lo ape ne, ei taꞌuwe aniye ape, lowe marepi nineꞌinamiteye.” Sosu le ane maꞌe tame eiye, “Owane Sitewi lo peri ape pefine aꞌi ne.”e
10 Sosu ane Owane Sitewi lo ipari maꞌe winetai lowe uporo apeꞌi onuwewe, le maꞌe au teꞌe wisereye nineꞌiyei ne toteye. Ahowa, le ane maꞌe eiye, “Ane maꞌe owe ape au teꞌe wisereye nineꞌite. Ane ne aiwawe aꞌi Owane Sitewi lo wiyawi meni tene! Sosu kaiyemo mo no aiwawe aꞌi. Lowe Jisas lo peri pefine aꞌi au teꞌe areiyeteye ape, fene werese Owane Sitewi maꞌe au teꞌe wisereye nineꞌite. Lu taune Jisas lo yo seni waraꞌi aꞌi au teꞌe areiyeteye ape, peri lo ape wiyeme pefine aꞌi henerairowa.”f
Meni ta fe hos wapo aꞌi hire sahe onuteye.
11 Sosu aꞌi pe ane niꞌarawe toso howeiyei siyeye su, ane fe hos wapo aꞌi siyeye. Meni ape fe hos lo meꞌiyeni sahe onuteye ape, iyape lo apou aiwawe aꞌi ne. Meni ape Owane Sitewi lo marepi mi mi weriyei umasinamisiya. Peri werese lo ape pefine aꞌi ne. Le lu taune lo yo seni au hese ereiyei su, marepi yo seni lo farere pefine aꞌi ne. Sosu le airame lo ai atuwei su, marepi yo seni lo aiwawe aꞌi farere aꞌi ne.g 12 Nihe lo yehe mi wou mitaiyeteye. Mato lo sahe meni owane tutawe lo mato tuhe oso aꞌi ani asiteye. Tahe lo sahe iyape ta leseye. Iyape lo ape lu taune werese soꞌoru taꞌama. Le aꞌi lai iyape topo lo soꞌoruwe ne.h 13 Ipari tahe pitase aꞌi fisaꞌi sahe ani aporuwe ape, ani asiteye. Iyape tereꞌe lo apou aiwawe aꞌi Owane Sitewi lo peri pefine aꞌi ne.i 14 Ai lu tomu neꞌese omo niꞌarawe hire maꞌe iroteye ape, lowe ipari tahe wisere pefine aꞌi ani asiteye. Ipari tahe lowe lo wapo aseyaro aꞌi ape ani asi ereye. Ai lu werese ape mo fe hos wapo aꞌi meꞌiyeni hire sahe onu ereyewe, le moꞌo umasiteye. 15 Ahi lo sahe ipari meneꞌe pipisi aꞌi nowe maꞌe henerai. Ipari meneꞌe lo se, le lu taune omo omo pani werese maꞌe ai atuwei ne fi.
“Le lowe werese kairefi aꞌi se au noweinoweinamiteye.” Sng 2:9
Lu taune werese Owane Sitewi meꞌiyeni maꞌe tote aruteyei ape, le Owane Sitewi lo ai marepi tote umasiteye.j 16 Ipari tahe pitase aꞌi lo sahe, le ani asiye ape, sosu lowe po lo sahe iyape ta leseye.
“Meni Owane tutawe lo meni owane tutawe pefine aꞌi ne. Sosu meni owane lo meni owane pefine aꞌi ne.”
17 Sosu aꞌi pe ane Owane Sitewi lo ipari ta poweiye sahe teiteyei siyeye. Le peri erasi irowe werese maꞌe niꞌarawe hire maꞌe sine ere uweiteye ape mo, apou uteye, “Fene werese taꞌuwera! Fene werese Owane Sitewi lai airame lo ape mo aine teraꞌeyei ne fa ninawere. Airame werese aine teraꞌe tepaꞌasiye su, fene hereiyei erasi aꞌi eite sahe taꞌuwe ene are.k 18 Fene ene ayei ne taꞌuweraiyei su, fene meni owane tutawe ape mo lo loꞌu, sosu ai lu lo lu owane werese lo loꞌu, sosu lu kairefi aꞌi lo loꞌu, ene are. Fene fe hos lo loꞌu, sosu lu ape, fene loꞌu lowe lo werese ene are. Sosu lu werese lo loꞌu ene are. Lu tamo wiyawi maꞌaru ne taꞌanesiya ape, sosu lu tamo wiyawi yahowaꞌi ne taꞌanesiya ape, fene loꞌu lowe lo werese ene are. Lu tamo iyape se sosu lu tamo iyape taꞌame, fene loꞌu lowe lo werese ene are.”
19 Sosu ane saꞌi eifariyai, sosu awei lo lu owane tutawe ape mo, lowe ai atuwei ne taꞌuweraiyei siyeye. Lowe ai lu werese lowe lo aiwawe aꞌi lai, ai lu tewi werese lowe lo aiwawe aꞌi meni owane ape fe hos hire sahe onusiya ape, sosu ai lu werese lo ape mo maꞌe ai atuwei ne taꞌuwerai. 20 Sosu lowe ai atuwei su, meni Owane Krais lai saꞌi eifariyai ereti lowe wafei se ti tawesiteye. Sosu le meni ape, peri wawero au teꞌeteye ape, aiwawe aꞌi ereti lowe wafei se ti tawesiteye. Meni wawero ape wiyawi erasi aꞌi saꞌi eifariyai lo nihe se taꞌaneteye. Le lu taune werese saꞌi eifariyai lo yaru leseye ape, sosu lu taune ape mo saꞌi eifariyai lo nihari hawese au nineꞌiteye ape, le lowe ne au areareteye. Owane Sitewi lai lowesi hepene se hare ite erasi yehe tisiya ape maꞌe, ani fu arowe. Hare ite erasi, yehe tisiya ape, tapiye salfa ti metesiya.l 21 Sosu Krais fe hos hire sahe onuteye ape, le ai lu tereꞌe werese meneꞌe se aine teraꞌe temeniyeye. Ipari meneꞌe ape ahi lo sahe henerai. Irowe werese ape mo loꞌu lowe lo ene ayei temeꞌeriyeye.