Owane Sitewi omo Babilon au luwaruweye.
18
Sosu aꞌi pe ane etiri werese ape siye tepaꞌasiye su, ane Owane Sitewi lo ipari tereꞌe niꞌarawe hire maꞌe itoraiyei siyeye. Le Owane Sitewi lo iyape kairefi le mase aiwawe itorai. Owane Sitewi lo ipari lo mi awei pani werese mitaiyeyei howeiye. 2 Le peri erasi aꞌi apou uteye,“Lu omo Babilon sahe weniteye ape,
Owane Sitewi lai omo ape au luwaruwe poꞌuteye.
Sepei luwaru aꞌi tomu neꞌese omo ape sahe iroteye.
Awei lihau unou aꞌi tereꞌe tereꞌe saro ahe aiwawe iroteye.
Sosu irowe luwaru unou aꞌi omo ape sahe iroteye.a
3 Lu taune omo omo pani werese sahe lowe omo ape lo tafaꞌe yo seni luwaru aꞌi tote umasinamiteye.
Awei lu owane tutawe omo omo pani werese sahe,
lowe le mase aiwawe tafaꞌe yo seni luwaru aꞌi ironamiteye.
Wiyawi lu owane werese lai etiri maꞌaru,
yo seni luwaru aꞌi lo se, ani lototeye.”
4 Sosu ane peri noꞌu tereꞌe niꞌarawe hire maꞌe apou ute wanuwe,
“Fene yo seni ano umasisiya ape,
fene omo ape arunatirowawe, nowe maꞌe henera.
Fene yo seni luwaru aꞌi lo aiwawe owe ape irote.
Fene yo seni luwaru aꞌi apou ape irowei su,
ane fene maꞌe fofowei erasi aiwawe aꞌi aurowa.b
5 Yo seni luwaru aꞌi lo niꞌarawe hire maꞌe ani atero wiye.
Owane Sitewi lai yo seni luwaru aꞌi lowe lo tote iꞌanerowata.c
6 Lu owane omo Babilon sahe iroteye ape,
lowe fene maꞌe fofowei erasi aꞌi au luwaruweye.
Serai fene lowe maꞌe fofowei erasi aꞌi aiwawe aꞌi itiyaꞌu aure.
Sosu lowe yo seni luwaru aꞌi, lowe ironamiteye ape,
fene lai fofowei erasi aꞌi lowe maꞌe itiyaꞌu aure.
Ei, fene lowe maꞌe fofowei erasi aꞌi ape wou meꞌiye tame wou aure.
Lowe lai yo seni luwaru aꞌi lowe lo ape fene tatai aniteye.
Serai fene lowe maꞌe fofowei erasi luwaru lohowei wou au ani atorore.d
7 Omo Babilon apou aiwawe aꞌi menitani yaꞌariyei owane ne.
Le me tutoꞌu tutawe onusiyawe topo ne apou totesiya,
‘Ane menitani yaꞌariyei owane tutawe ne.
Ane marepi orese aꞌi teriterowata.
Ane maꞌaru etiri tomu neꞌese taꞌuwe atorosiya.
Ane taune weiname taꞌama.
Ane marepi orese aꞌi mi mi weriyei ewiteyei erasi lurowata.’
Serai fene le maꞌe fofowei erasi marepi luwaru aꞌi itiyaꞌu fa aure!e
8 Owane Sitewi, yo seni luwaru werese aꞌi lo au hese ereirowa ape,
le kairefi uwateyeyei erasi aꞌi ne.
Le aꞌi lai marepi orese aꞌi menitani ape maꞌe aurowa.
Poweiye taꞌi ta su, marepi orese erasi aꞌi le maꞌe henerairowa.
U tahe erasi le maꞌe henerairowa.
Le luwei erasi aꞌi lurowa.
Sosu lau erasi henerairowa.
Yehe lei tirowa.”f
9 Sosu awei lu owane tutawe ape mo, lowe tafaꞌe yo seni le mase aiwawe ironamiteye ape, lowe yo seni luwaru le mase ironamiteye ape, lowe le ne lu ewiteyei erasi lunamiteye. Tahe lo yehe tiye su, lowe itomu siyeye su, lowe lu ewiteyei erasi lunamiteye.g 10 Lowe marepi orese aꞌi lo atoweiyeye. Serai lowe eyeri maꞌe teiteye, apou uteye, “Wirepuwe! Wirepuwe! Omo weniyei erasi ape ne. Tu naifa ne omo weniyei kairefi aꞌi iroteye. Nowe tewi taꞌi aꞌi su, Owane Sitewi lai yo seni luwaru aꞌi fene lo iroteye ape, au hese ereiye. Le aꞌi lai ne aine osoꞌosuwe fiyari poꞌuteye.”
11 Wiyawi lu owane werese omo omo pani irosiya ape, lowe le ne lu ewiteyei erasi iroteye. Lowe piyene lu ewitesiya awere? Le etiri lowe lo werese eterowata.h 12 Etiri ape mo tapiye gol, tapiye silva, tapiye tereꞌe tereꞌe nihari aiwawe wou ne, pereꞌi niꞌaripe wisere wou ne, ipari tahe wapo wisere aꞌi ne, ipari tahe ape witu hamau wou ne, ipari tahe loꞌu wisere wou ne. Me karu heneri wisere aꞌi wou ne, me tahe tereꞌe tereꞌe heneri wou ne, fe pi maꞌaru wapo wou ne. Kapa tereꞌe tereꞌe wou ne, tapiye potu erasi wou aꞌi ne.i 13 Eiwerai etiri werese nomo lo eterowa awere? Hari sao tahe, ireitepi, me mari towe heneri wou ne, etiri tereꞌe tereꞌe heneri wisere aꞌi wou ne, wain saꞌi wisere wou ne, me tuwai saꞌi heneri wisere wou ne. Nau taꞌase tereꞌe tereꞌe wisere wou ne. Fe bulmakau, fe sipsip, fe hos aiwawe, wai nihari tereꞌe tereꞌe wou ne. Lu taune wiyawi yahowaꞌi lowe eterowata. Owe lu werese etiri werese nomo lo eterowata. Serene lowe le ne lu ewiteyei iroteye. 14 Wiyawi lu owane le ne apou teꞌesiya. “Etiri werese wisere aꞌi, nihe no siye wisereyeye ape, poꞌuteye. Etiri, ayei, ipari tahe maꞌaru etiri werese Babilon lu taune marepi tote tawesiteye ape mo, maꞌaru etiri werese fene lo luwaruwe poꞌuteye. Mi mi weriyei fene etiri ape mo si tame anirowata.” 15 Wiyawi lu owane ape mo maꞌaru lo aniteye su, lowe maꞌaru tomu neꞌese taꞌuwe futeye. Serai lowe eyeri saro teiteye. Lowe fofowei erasi lo ape ne atoweiyeye. Luwei erasi ape ne, sosu ewite luwaru erasi lo ape ne, lowe atoweiye ironamiteye.j 16 Lowe apou utesiya, “Wirepuwe, wirepuwe. Nomo omo weniyei erasi ape ne, wirepuwesiya. Menitani ape ipari tahe wapo wisere aꞌi ani asiteye. Ipari tahe norohuwe, loꞌu aꞌi ani asiteye. Lowe tahe, mato towe ereti lowe lowe lo sahe au leseteye. Tapiye gol, tapiye nihari tereꞌe tereꞌe wisere aꞌi, sosu pereꞌi niꞌaripe waꞌareteye.k 17 Ahowa, nowe tewi taꞌi aꞌi se, maꞌaru etiri werese lo ape poꞌuteye.”
Sosu wai erasi lo lu owane, sosu wiyawi lu lowe lo aiwawe, sosu lu tereꞌe tereꞌe etiri ape mo saꞌi toneriyei ne eteteye ape, lowe eyeri saro teiteye.l 18 Lowe yehe itomu neꞌese omo weniyei ape ti meteteye ape, siyeye su, lowe apou uteye, “Omo weniyei erasi ape lai omo tereꞌe tereꞌe hi ani ararowe. Piye omo tereꞌe ta omo weniyei ape henerairowata.”m 19 Lowe yesi sapu tamo mato lowe lo sahe ani terosowe. Lowe ewite luwei erasi luteye, apou uteye. “Wirepuwe! Wirepuwe! Omo weniyei erasi le etiri werese nomo eteteye. Lowe le sahe etiri tomu tamo eteteye. Serai nomo maꞌaru etiri tomu neꞌese taꞌuwe futeye. Ahowa, nowe tewi taꞌi aꞌi se, omo weniyei erasi ape aine osoꞌosuwe poꞌuteye. Peri ape wiyawi lu owane ape mo teꞌe tepaꞌasiye.”
20 Owane Sitewi lai yo seni luwaru aꞌi lu taune omo weniyei iroteye ape, au hese ereiye. Serai fene niꞌarawe hire sahe irosiya ape, sosu fene Owane Sitewi lo peri umasiteye ape, sosu Jisas lo lu feni pefine aꞌi, sosu lu Owane Sitewi lo marepi au teꞌeteye ape, fene werese marepi erasi aꞌi tote nineꞌite.n
21 Sosu aꞌi pe Owane Sitewi lo ipari ta tapiye erasi ereti se aniyewe, saꞌi erasi maꞌe fu arosawi. Le apou uteye, “Babilon omo weniyei erasi ape, Owane Sitewi lai omo ape tapiye wou witane aꞌi hi ani ararorowa. Sosu omo ape ti paremiyaiye poꞌuterowa.o 22 Lu taune gita aineteye ape, lu taune tamo weni oso omoyawi ahi iroteye ape mo, lu taune meneꞌe oso oso aiwawe aꞌi, meneꞌe mapefuwe erasi aꞌi fateye ape, owe lu tamo noꞌu ape mo moꞌo wanurowata. Owe lu tamo wiyawi werese taꞌanerowata. Lowe werese poꞌuteye. Lu taune nau ote taineteye ape mo, owe lu tamo nau oteyei noꞌu ape wanurowata.p 23 Yehe erei lo mi ape mo, mitaiyerowata. Lu taune naituwei teꞌeteye ape mo, lowe naiturowata. Wiyawi lu owane ape mo, lowe maꞌaru etiri tomu neꞌese ani taꞌuwe futeye. Lowe omo omo pani tiyati sahe iyape erasi iroteye. Lu taune omo omo pani werese sahe, fene lai lowe maꞌe sinariteye. Sinariyei fene lo lowe maꞌe au areareteye.q
24 Menitani ape lai Owane Sitewi lo peri au teꞌe siye lu tamo, sosu lu taune Owane Sitewi lo peri umasiteye ape mo, sosu lu taune tereꞌe tereꞌe ape mo aiwawe aꞌi lowe aine teraꞌe temeniyeteye.” Serene Owane Sitewi lai omo ape au hese ereiteye, omo ape aine osoꞌosuwe poꞌuteye.r