Tafaꞌe menitani haru erasi luwaru aꞌi hire sahe onuteye.
17
Sosu aꞌi pe Owane Sitewi lo ipari taꞌi aꞌi, Owane Sitewi lo ipari ereti feni werese feni hesi ponei sahe iroteye ape, le ane maꞌe itoraiyewe, apou eiye, “Ne aiya! Ane ne maꞌe Owane Sitewi lo ai marepi menitani tafaꞌe yo seni luwaru aꞌi ironamiteye ape maꞌe, au hese ereiyei atuaturowa. Tafaꞌe yo seni menitani apou aꞌi omo ta saꞌi erasi pefine aꞌi tewiye maꞌe iroteye.”a 2 Awei lu owane tutawe ape mo, lowe tafaꞌe yo seni menitani ape mase ironamiteye. Le lowe werese maꞌe wain saꞌi luwaru aꞌi au ene aye. Lowe wain saꞌi ape ene aye su, lowe marepi meremereye aꞌi henerai. Wain saꞌi ape ne, peri anowe apou wou aꞌi tafaꞌe yo seni luwaru aꞌi lowe lo ne.b3 Owane Sitewi lo Hepene Waraꞌi aꞌi ane maꞌe etiri ape mo au atuatuwe su, Owane Sitewi lo ipari ta ane ipo eyeri erasi maꞌe heneti. Ane menitani ta saꞌi eifariyai loꞌu aꞌi hire sahe onuteyei siyeye. Saꞌi eifariyai lo tahe werese sahe iyape tomu neꞌese Owane Sitewi maꞌe, peri luwaru teꞌe narusiya ape, au leseye. Saꞌi eifariyai ape mato ereti feni werese feni hesi aꞌi iroteye. Sosu mato werese lo sahe paꞌare keraro ereti feni hesi (10) nowe maꞌe henerai.c 4 Menitani lo ipari tahe ape loꞌu aꞌi, sosu norohuwe aꞌi ani asiteye. Tahe lo sosu ipari tahe lo, le wafei gol, tapiye wisere tereꞌe tereꞌe ape mo se ani asiteye. Ereti lo sahe le siye auwe tapiye gol taꞌaneteye ape, aniteye. Siye auwe papu sahe wain saꞌi apou aꞌi ne, etiri luwaru aꞌi sosu tafaꞌe yo seni luwaru aꞌi siye awe ape papu temeꞌeriyeye.d 5 Mapine lo sahe lowe iyape fareyare lo ape leseye. Lowe apou leseye,
“Etiri fareyare aꞌi. Omo Babilon, ne omo erasi pefine aꞌi ne. Ne tafaꞌe yo seni luwaru aꞌi lo mai sitewi. Ne yo seni luwaru aꞌi lo sitewi ne.”
6 Sosu ane menitani ape yo seni meremereye aꞌi iroteye ape, siyeye. Menitani lo lu feni lu taune Owane Sitewi lo peri umasiteye ape, sosu lu taune Jisas lo iyape se temeniyeteye ape, lowe aine teraꞌeteye. Serai menitani ape fisaꞌi lowe lo ene ateyewe, meremereye aꞌi henerai.
Ane le siyeye su, ane hepene se suꞌariye.e 7 Ahowa, Owane Sitewi lo ipari ape ane maꞌe ei toweriye, “Ne piyene hepene se suꞌariye awere? Ane ne maꞌe menitani ape ne, sosu saꞌi eifariyai ne, mato ereti feni werese feni hesi aꞌi (7) irosiya ape, ane ne maꞌe peri fareyare aꞌi au teꞌe areiyerowa.f 8 Saꞌi eifariyai luwaru ape, ne siyeteye ape, le tu naifa hepene norohuwe iroteye. Sosu pereye nowe eite se le temeniyeye. Le awei fisiye yo, sitewi se taꞌame ape, nowe maꞌe wirairowa su, le hepene norohuwe irorowa. Owane Sitewi lai le aine teraꞌe temeniye osoꞌosuwe poꞌuterowa. Lu taune werese omo omo pani werese sahe iyape lowe lo hepene norohuwe lo one towe papu sahe, tu naifa nowe sitewi se, lese taꞌame ape, lowe saꞌi eifariyai ape ne hepene se suꞌariyei siyerowa. Piyene lowe hepene se suꞌarirowa awere? Saꞌi eifariyai tu naifa hepene norohuwe iroteye ape, sosu pereye nowe eite se temeniye poꞌuteye. Sosu nowe meꞌiye su hepene norohuwe anirowa.g
9 Ne etiri ape mo siye soꞌoruwerowa su, ne marepi wisere aꞌi tote etite. Eifariyai lo mato ereti feni werese feni hesi aꞌi apou aꞌi teꞌesiya. Lowe omo ereti feni werese feni hesi aꞌi menitani ape hire onusiya. 10 Omo ape mo sahe awei lu owane tutawe ereti feni werese feni hesi aꞌi (7) iroteye. Lu owane tutawe ereti feni werese temeniye poꞌuteye. Taꞌi ta saro meni owane wou saro irosiya. Sosu taꞌi ta nowe meꞌiye su henerairowa. Serai le henerairowa su, le nowe tewi oso aꞌi se meni owane wou saro irorowa. 11 Saꞌi eifariyai ape ne, le tu naifa hepene norohuwe iroteye ape, sosu pereye nowe eite se temeniyeye le norohuwe si tame sineye su, le meni owane toꞌu henerairowa. Ahowa, le nowe tu naifa meni owane pefine ta iroteye. Owane Sitewi lai le aine teraꞌe osoꞌosuwe poꞌuterowa.
12 Sosu paꞌare keraro ereti feni hesi (10) mato lo sahe tepiꞌo tei ereye ape mo, lowe lu Owane tutawe ape mo ne. Nowe meꞌiye su lowe lu owane henerairowa. Sosu lowe kairefi aꞌi aniyei su, lowe saꞌi eifariyai mase nowe tewi taꞌi aꞌi irorowa.h 13 Lowe marepi sitewi taꞌi aꞌi totesiya. Lowe kairefi lowe lo sosu iyape towafi lowe lo saꞌi eifariyai maꞌe lu taune au noweinoweiyei ne aurowa. 14 Lowe werese saꞌi eifariyai mase lai fe sipsip yene maꞌe ai atu tiyatirowa. Ahowa, fe sipsip yene lai lowe au ani araro poꞌuterowa. Fe sipsip yene lai meni owane lo lu owane werese aꞌi ne. Le Meni Owane tutawe lo lu owane tutawe werese aꞌi ne. Lu taune ape mo le mase irosiya ape, le tu naifa lowe ei ariariyeye. Lowe werese fe sipsip yene lo marepi tote umasinamisiya.”
15 Sosu Owane Sitewi lo ipari lai ane maꞌe eiye, “Saꞌi ape mo menitani tafaꞌe yo seni luwaru aꞌi sahe onuteye ape, lowe lu taune neꞌese aꞌi wou ne. Lu taune omo omo pani werese irosiya ape, lu taune niyene tereꞌe tereꞌe se, lu taune peri tereꞌe tereꞌe se, saꞌi ape, ne siyeye ape, saꞌi ape lu taune ape mo wou ne. 16 Sosu paꞌare keraro ereti feni hesi (10) mato lo sahe tepiꞌo tei ereye ape mo, ne siyeye ape, lowe sosu saꞌi eifariyai aiwawe aꞌi lowe menitani tafaꞌe yo seni iroteye ape, ai marepi totenamirowa. Lowe etiri werese lo taꞌarei anirowawe, sosu ipari tahe lo ani tahe ani ererowawe, le liye paꞌare ariye aꞌi irorowa. Lowe tahe loꞌu lo ene arowa. Sosu lowe le yehe se leirowa.i 17 Serene Owane Sitewi lai marepi toteyei topo lo awei lu owane maꞌe auwe. Serai lowe Owane Sitewi lo marepi ape umasirowa. Sosu lowe iyape kairefi lowe lo saꞌi eifariyai maꞌe aurowa. Nowe ape se Owane Sitewi lo peri wiyeme henerairowa su, saꞌi eifariyai lo kairefiyeyei poꞌuterowa. 18 Sosu menitani ape ne siyeye ape, le lu omo wesi weniyei erasi aꞌi wou ne. Le awei lu owane tutawe tereꞌe werese ape mo omo omo pani werese sahe au noweinoweirowa.”