Owane Sitewi lo ai marepi wahu sahe temeꞌeriyeye.
16
Sosu aꞌi pe ane Owane Sitewi lo peri noꞌu erasi wesi tutawe lo papu uteyei wanuwe. Le ipari ereti feni werese feni hesi aꞌi lo maꞌe eiye, “Fene ire! Fene wahu ereti feni werese feni hesi aꞌi, ai marepi ano temeꞌeriyesiya ape, hi awei maꞌe ani teroso arosawire.”2 Serai Owane Sitewi lo ipari tutawe wahu lo hi awei maꞌe ani teroso arowe. Wahu ani teroso arowe su, enite erasi fofowei aꞌi lu taune werese saꞌi eifariyai lo yaru, mapine sahe leseteye ape, sosu lu taune nihari lo hawese, au nineꞌi wisereyeteye ape, enite tomu neꞌese tahe lowe lo sahe henerai.a
3 Sosu Owane Sitewi lo ipari toꞌuresi wahu lo hare ite erasi werese aꞌi maꞌe ani teroso arosawi. Serai saꞌi werese ape mo meni temeniyeyei lo fisaꞌi wou henerai. Etiri werese werese, saꞌi papu iroteye ape, lowe werese temeniye tepaꞌasiye.
4 Sosu Owane Sitewi lo ipari faforu lai wahu lo saꞌi mai werese, sosu saꞌi pitomuwe maꞌe ani teroso arosawi. Saꞌi werese ape mo fisaꞌi wou henerai.b 5-6 Sosu lu luwaru aꞌi tamo lu taune yo seni no tote umasinamiteye ape, sosu lu ape peri pefine aꞌi no au teꞌe fiyari areiyeteye ape, aine teraꞌe temeniyeteye. Serai ne lowe maꞌe fisaꞌi ape itiyaꞌu au ayei ne auwe. Lu tewi ape mo maꞌe yo seni luwaru lowe lo iroteye ape, pereye nowe eite se ne lai lowe maꞌe fofowei erasi aꞌi itiyaꞌu auwe. Serene ane Owane Sitewi lo ipari ape, wahu saꞌi sahe ani teroso arosawi ape, wanuwe. Le Owane Sitewi maꞌe apou eiye.
“Ne ai marepi no saꞌi sahe ani teroso arosawi su, yo seni no wiyeme farere pefine aꞌi ne. Ne nowe tu naifa weriyei ironamiteye, sosu pereye nowe eite se ne ironamisiya. Ne aꞌi lai waraꞌi pefine aꞌi ne.”
7 Sosu ane peri ta tapiye wari sahe apou uteyei wanuwe. Le apou eiye,
“Pefine aꞌi ne. Owane Sitewi pefine aꞌi ne. Ne meni kairefi pefine aꞌi ne. Ne yo seni au hese ereiyei su, yo seni no farere pefine aꞌi ne.”c
8 Sosu Owane Sitewi lo ipari ororu wahu lo poweiye maꞌe ani teroso arosawi. Serai poweiye lo ai erasi aꞌi heneraiyewe, lu taune maꞌe yehe se itomuwe. 9 Poweiye lo ai erasi aꞌi lai lu taune maꞌe itomuwe su, lowe Owane Sitewi lo iyape maꞌe teꞌe naruteye. Piyene awere? Owane Sitewi lai lowe maꞌe etiri luwaru orese aꞌi ape mo eimawe arosai. Serai lowe yo seni luwaru aꞌi lowe lo meꞌiyeni maꞌe atati aru taꞌame. Lowe Owane Sitewi lo iyape ei ani arowe taꞌame.d
10 Sosu Owane Sitewi lo ipari erenawe lai wahu lo saꞌi eifariyai lo me tutoꞌu tutawe maꞌe ani teroso arowe. Serai awei pani werese saꞌi eifariyai au noweinoweiteye ape, pasi erasi aꞌi napetu howeiteye.
Serene lu taune marepi luwaru aꞌi teriteteyewe, sosu lowe sorowe towafi lowe lo ahi tomunamiteye. Sosu pi towafi lowe lo taꞌani tawesinamiteye.e 11 Sosu tahe lowe lo fofowei erasi aꞌi henerai. Sosu aiwawe enite tamo tahe lowe lo sahe henerai su, lowe Owane Sitewi niꞌarawe hire sahe ironamisiya ape maꞌe au teꞌe naruteye. Ahowa, lowe yo seni luwaru werese lowe lo meꞌiyeni maꞌe atati aru taꞌame.
12 Sosu Owane Sitewi lo ipari moruwene wahu lo saꞌi mai erasi iyape Yufretis ani teroso arowe. Serai saꞌi mai ape here poꞌuteye. Sosu yo mai ape awei lo lu owane tutawe ape mo omo pani poweiye wirai siye ape maꞌe farere aꞌi taꞌuweyei ne fa aiya.f 13 Sosu ane Sepei luwaru aꞌi hesi heta sou lo nihari wou siyeye. Taꞌi ta haru luwaru erasi lo ahi maꞌe henerai. Sosu taꞌi ta saꞌi eifariyai lo ahi maꞌe henerai. Sosu taꞌi ta meni ape, peri wawero au teꞌesiya ape, lo ahi maꞌe henerai. 14 Sou luwaru aꞌi ape mo lowe sepei luwaru aꞌi ne. Lowe wiyawi erasi pefine aꞌi tamo taꞌaneyei ne kairefiyeteye. Lowe awei lo lu owane tutawe ape mo maꞌe, omo omo pani werese iroteye ape, au teꞌe fiyariyei ne fi. Lowe omo pani werese maꞌe lu owane ape mo fa taꞌuweraire. Nowe ape se lowe werese taꞌuweraiyei su, lowe Owane Sitewi Pefine aꞌi maꞌe ai aturairowa.g
15 Jisas apou eisiya, “Wanure! Ane fene maꞌe taꞌarei meni wou henerairowa. Lu taune tamo nihe se siye ninaweteyei su, lowe marepi wisere aꞌi tote nineꞌirowa. Ipari tahe lowe lo fa taꞌuwe naneiteyei. Serai ane si tame itorairowa su, lowe ipari tahe lowe lo ani asi tepaꞌasirowa. Sosu lowe liye paꞌare ariye aꞌi neritase siyerowata.”h
16 Sosu sepei luwaru aꞌi hesi heta ape mo, awei lu owane werese omo pani ape sahe teꞌe taꞌuwerairowa. Omo ape Hibru lo peri iyape apou “Armagedon.”i
17 Sosu Owane Sitewi lo ipari toꞌu wahu lo niꞌarawe hire sahe ani teroso arosai. Sosu peri erasi ta Owane Sitewi lo wesi tutawe papu nowe maꞌe henerai. Peri erasi ape Owane Sitewi lo tutoꞌu tutawe maꞌe apou uteye, “Etiri werese ape mo nanei tepaꞌasiye.” 18 Peri ape teꞌe tepaꞌasiye su, meraꞌo mi erasi aꞌi mitaiye fiyari howeiye. Pesiyei noꞌu erasi peratiye. Awe erasi pefine aꞌi awei pani werese tei auseriyeye. Owe lu tamo tu naifa awe apou ape ta terite taꞌame ne. Awe ape erasi pefine aꞌi ne.j 19 Sosu awe erasi ape omo Babilon tewi hesi heta auseriye apuwase fiyariye. Omo omo lo wesi werese aine towesi fiyari poꞌuteye. Sosu Owane Sitewi lai yo seni luwaru aꞌi lu taune omo Babilon sahe iroteye ape, tote anite tawesiteye. Serai Owane Sitewi lai lowe werese maꞌe ai marepi erasi lo au arowa.k 20 Awe erasi ape omo kemere saꞌi saꞌi sahe iroteye ape, auseriyeteye. Sosu kemere werese ape mo saꞌi papu ito ereye. Omo werese apuwase fiyari howei ereye.l 21 Sosu saꞌi tapiye orese wou (50 kilogram) niꞌarawe maꞌe itoraiyewe, lu taune hire maꞌe winetairai. Lowe werese Owane Sitewi maꞌe peri luwaru teꞌe naruteye. Piyene awere? Owane Sitewi lai saꞌi tapiye orese erasi ape eimawe arosai. Serene lowe le maꞌe peri luwaru aꞌi au teꞌe naruteye. Etiri luwaru orese aꞌi ape erasi pefine aꞌi ne.m