Ipari wisere aꞌi tamo etiri orese aꞌi hi awei maꞌe ani teroso arosawi.
15
Sosu aꞌi pe ane yaru nihari tereꞌe ta niꞌarawe hire maꞌe heneraiyei siyeye. Yaru nihari ape erasi wisere pefine aꞌi ne. Owane Sitewi lo ipari ereti feni werese feni hesi aꞌi (7) etiri orese erasi aꞌi ereti feni werese feni hesi aꞌi (7) ani teroso itorai. Etiri orese yeꞌewi ape hi awei maꞌe ani terosowei su, Owane Sitewi lo ai marepi tote poꞌuterowa.2 Sosu ane lu taune ape mo, Jisas ne tote tawesi umasiteye ape, siyeye. Lowe saꞌi eifariyai lo yaru mapine towafi lowe lo sahe ani taꞌame. Ane lowe hare ite saꞌi tewiye sahe teiteyei siyeye. Ane hare ite erasi ta lutatei yehe ti mete wou taꞌaneteye ape siyeye. Lu taune ape mo saꞌi eifariyai ape, sosu nihari lo hawese metei sahe lese taꞌaneye ape, sosu iyape lo nawiteyei ape, lowe maꞌe ai atuwewe, hi ani ararowe ape, lu taune ape mo hare ite lutatei wou tewiye sahe teiteye. Owane Sitewi lai lowe werese gita ereti sahe aniteye ape, auwe. 3 Sosu lowe meni Moses lo weni oso omoyawi ahi wou au sineteye. Meni ape Owane Sitewi lo wiyawi meni pefine aꞌi ne. Sosu lowe fe sipsip yene lo weni oso omoyawi ahi wou au sineteye. Lowe apou au teꞌe sineteye.
“Owane Sitewi, ne meni kairefi pefine aꞌi ne. Yo seni werese no erasi wisere waraꞌi aꞌi ne. Ne lu taune lo yo seni au hese ereiyei su, ne meni farere pefine aꞌi ne. Peri werese no wiyeme pefine aꞌi ne. Ne mi mi pasi pasi weriyei meni owane tutawe ironamitorowa.a
4 Lu taune werese werese iyape no ei ani arowenamite. Owane Sitewi pefine, lowe ne maꞌe au taꞌane sine nineꞌi arowete. Ne aꞌi lai meni waraꞌi pefine aꞌi ne. Yo seni werese farere aꞌi no ape mo ne, lu taune werese werese siye soꞌoruwesiya. Serene lu taune omo omo werese sahe irosiya ape, ne maꞌe taꞌuwerairowawe, ne maꞌe au teꞌe nineꞌi wisereyenamirowa.”b
5 Sosu lowe weni oso omoyawi ahi au taꞌane sine tepaꞌasiye su, ane Owane Sitewi lo wesi tutawe niꞌarawe hire maꞌe siyeye. Tewi wesi waraꞌi aꞌi ape papu Owane Sitewi saro onunamisiya.c 6 Sosu Owane Sitewi lo ipari ereti feni werese feni hesi aꞌi (7) Owane Sitewi lo wesi ape papu nowe maꞌe henerai. Lowe Owane Sitewi lo ai marepi ani fu arosaiyei ne naneiteye. Lowe ipari tahe wapo pefine aꞌi ani asiteye. Lowe wafei gol se taꞌaneye ape, metete sahe ti nateteye. 7 Sosu etiri taꞌi ta hepene norohuwe hesiyo hesiyo, le lai Owane Sitewi lo ipari ereti feni werese feni hesi aꞌi (7) lowe maꞌe wahu ereti feni werese feni hesi aꞌi (7) Owane Sitewi lo ai marepi papu temeꞌeriyeye ape auwe. Le mi mi pasi pasi weriyei ironamitorowa. 8 Sosu Owane Sitewi lo wesi tutawe ape sahe Owane Sitewi lo mi erasi pefine aꞌi, sosu kairefi erasi lo wesi tutawe lo ape sahe temeꞌeriyeteye. Serai Owane Sitewi lo wesi tutawe papu yehe itomu temeꞌeriyeye. Serai owe meni ta wesi tutawe ape sahe wirowata. Owane Sitewi lo ai marepi ereti feni werese feni hesi aꞌi ani teroso tepaꞌasiye su, lowe faraꞌu wesi ape papu si wirowa.d