Fe sipsip lo yene, sosu lu taune 144 Tausen omo Saion sahe iroteye.
14
Sosu aꞌi pe ane Omo Saion siyeye. Fene siyere, fe sipsip lo yene, lu taune 144 tausen lowe le mase omo ape sahe iroteye. Lu taune ape mo Owane Sitewi lai fe sipsip yene lo iyape, sosu tai lo iyape aiwawe aꞌi mapine lowe lo sahe au leseteye. 2 Sosu ane peri erasi aꞌi saꞌi mesiyu erasi noꞌu wou maꞌe uteyei wanuwe. Sosu noꞌu ape pesiyei noꞌu erasi wou wanuwe. Peri noꞌu ape apou wou aꞌi ne. Lu neꞌese gita lo wafei se aineteye.a 3 Lu taune 144 tausen, lowe weni oso omoyawi heꞌi aꞌi ahi se. Lowe weni oso omoyawi ahi lowe lo ape se Owane Sitewi maꞌe me tutoꞌu onusiya ape, au teꞌeye. Sosu etiri hepene norohuwe hesiyo hesiyo, sosu yaꞌariyei meni ta werese hesiyo hesiyo maꞌe weni oso ahi lowe lo se au nineꞌiteye ape ororu tei ninaweteye. Owe lu tereꞌe tamo weni oso omoyawi ahi ape se soꞌoru taꞌama. Lu taune 144 tausen lowe aꞌi lai weni oso omoyawi ahi ape se soꞌoruwe au sineteye. Owane Sitewi lai lowe werese awei sahe iroteye su, lowe si ete hene aniye.b 4 Lu tewi ape mo lai lowe taune tafaꞌe yo seni luwaru aꞌi irote taꞌame. Ahowa, lowe werese yo seni aseyaro aꞌi ne. Lowe fe sipsip yene moꞌo umasititeye. Owane Sitewi lai lowe lu taune werese tiyati ponei sahe si ete hene aniye. Serai lu ape mo lowe lu tewi tutawe Owane Sitewi maꞌe, sosu fe sipsip yene maꞌe aiwawe aꞌi au hese ereiteye. 5 Lowe peri wawero ta ahi lowe lo sahe teꞌe taꞌame. Ahowa, yo seni lowe lo aseyaro aꞌi iroteye.Ipari wisere aꞌi hesi heta Krais lo peri heneruwe au teꞌe fiyariteye.
6 Sosu aꞌi pe ane Owane Sitewi lo ipari ta niꞌarawe ponei sahe sine uweiteyei siyeye. Le Owane Sitewi lo peri heneruwe nowe weriyei weriyei ironamitorowa ape, au teꞌe fiyariyei ne fai. Le lu taune maꞌe omo omo pani sahe irosiya ape, lu taune niyene tereꞌe tereꞌe se, sosu lu taune tahe tereꞌe tereꞌe se, sosu lu taune peri tereꞌe tereꞌe teꞌesiya ape, Owane Sitewi lo ipari ape lai lowe werese maꞌe au teꞌe fiyari areiyeyei ne fai. 7 Owane Sitewi lo nowe, le lu taune lo yo seni werese au hese ereiyei ape, ataheyeraiwa. Serai le peri erasi aꞌi apou uteye, “Owane Sitewi maꞌe marepi wisere aꞌi au nineꞌite. Iyape erasi lo ei ani arowete.”
8 Sosu Owane Sitewi lo ipari tutawe peri lo au teꞌe tepaꞌasiye su, Owane Sitewi lo ipari toꞌuresi moꞌo itoraiyewe, apou uteye, “Omo Babilon erasi pefine aꞌi ape winetai luwaruweye. Lu taune omo ape sahe iroteye ape, lowe yo seni luwaru aꞌi ironamiteye. Yo seni luwaru erasi lowe lo, iroteye ape lai lu taune omo tereꞌe tereꞌe iroteye ape mo, memeꞌi tatai aniteye. Serene lu taune omo omo werese iroteye ape mo, yo seni luwaru aꞌi lowe lo apou ape umasinamiteye.”c
9 Sosu Owane Sitewi ipari faforu moꞌo itoraiyewe, peri erasi aꞌi uteye. “Lu taune tamo eifariyai luwaru aꞌi sosu nihari lo hawese ape metei sahe taꞌaneye ape, lowe lowe uporo apeꞌi onuwewe, le maꞌe au nineꞌi wisereyerowa su, lowe Owane Sitewi lo ai marepi erasi aꞌi siyerowa. Aiwawe aꞌi lu taune tamo saꞌi eifariyai lo yaru mapine sahe piye ereti eyate feni sahe leserowa su, Owane Sitewi lai ai marepi kairefi erasi aꞌi lo se lowe maꞌe aiwawe aꞌi ani teroso arorowa.d 10 Owane Sitewi lo ai marepi lowe maꞌe heneraiyei su, le marepi feraferei wisere aꞌi lo aiwawe taꞌuwe toterowata. Owane Sitewi lai ipari werese lo, lo nihe se sosu fe sipsip yene lo nihe se lu taune ape mo maꞌe yehe tapiye aꞌi ti metesiya ape, sahe itomurowa. Lowe fofowei erasi teriterowa.e 11 Lu taune werese saꞌi eifariyai sosu tu nihari lo hawese metei sahe leseye ape, lowe lowesi maꞌe au nineꞌi wisereyeteye ape, lowe mi mi pasi pasi weriyei fofowei ti metenamitorowa. Lu taune ape mo saꞌi eifariyai lo iyape lo yaru ani leseye su, yehe lowe sahe fofowei ti metenamitorowa. Piye nowe se lowe mi mi pasi pasi fetane teriterowata.”f
12 Serai lu taune werese Owane Sitewi lo yo peri tote tawesi umasiteye ape mo, sosu lu taune Jisas ne tote tawesi umasiteye ape mo, ane fene maꞌe eisiya. “Fene mi mi pasi pasi tei kairefi uwateyenamite.”g
13 Sosu ane peri noꞌu niꞌarawe hire maꞌe uteyei aute wanuwe. Le ane maꞌe apou eiye, “Ne one towe ta sahe lesere. Pereye nowe eite se, sosu nowe meꞌiye se, lu taune werese Jisas ne tote tawesi umasiyei ape, ai lu tamo lowe aine teraꞌe temeniyerowa su, lowe marepi wisere aꞌi nineꞌinamirowa.”
Serai Owane Sitewi lo Hepene Waraꞌi aꞌi eiye, “Peri ape pefine aꞌi ne. Etiri luwaru orese aꞌi lowe maꞌe henerai ape, tepaꞌasiye su, lowe mi mi weriyei fetane aꞌi ironamitorowa. Lowe Owane Sitewi lo yo seni taꞌaneteye su, yo seni wisere ape mo lowe lo taꞌaneteye ape, lowe maꞌe aiwawe moꞌo umasitirowa.”
Owane Sitewi lai yo seni werese au hese ereirowa.
14 Sosu aꞌi pe ane hire maꞌe aute siyeye. Fene siyere! Ane aitu sapu wapo aꞌi niꞌarawe hire maꞌe siyeye. Meni ta apou wou meni ape Owane Sitewi hi awei maꞌe eimawe arosai ape, le aitu sapu ape sahe onusiya. Ane mato lo sahe mato tuhe tapiye gol taꞌaneye ape, ani asiteye ape, siyeye. Ereti lo sahe, le ipari meneꞌe ai aꞌi ta aniteye.h 15 Sosu Owane Sitewi lo ipari tereꞌe Owane Sitewi lo wesi tutawe maꞌe henerai. Le peri erasi meni ape aitu sapu onuteye ape, maꞌe apou uteye. “Nowe ape Owane Sitewi lai yo seni werese au hese ereiyei ape, heneraiwa. Awei lo etiri werese pereꞌeye tepaꞌasiye. Serai ne hi awei maꞌe itorowawe, etiri werese ape ipari meneꞌe se aine tou erere!” 16 Serai meni ape aitu sapu sahe onuteye ape, ipari meneꞌe se omo omo pani pani aine tou seꞌiyewe, ayei werese pereꞌeyeye ape, ani taꞌuwe aniteye.
17 Sosu Owane Sitewi lo ipari ta Owane Sitewi lo wesi tutawe niꞌarawe hire sahe irosiya ape, maꞌe henerai. Le aiwawe aꞌi ipari meneꞌe ai aꞌi ta ereti se aniteye.
18 Sosu Owane Sitewi lo ipari tereꞌe tapiye wari maꞌe fai. Owane Sitewi lo ipari ape yehe ape noweinowei siye meni topo. Le Owane Sitewi lo ipari tutawe maꞌe apou uteye, “Ne hi awei maꞌe itorowawe, wafei wain so werese aine tou erere! Wafei wain so werese ape mo pereꞌeyeye.”i 19 Serai Owane Sitewi lo ipari tutawe ape omo omo pani sahe ipari meneꞌe se wafei wain so aine tou ereye. Sosu le wafei wain so werese wesi papu ani teroso ereteye. Wesi ape wafei wain so ani teroso fiyariteye ape, wou Owane Sitewi lo ai marepi erasi pefine aꞌi ne. 20 Owane Sitewi lo omo, nowe maꞌe iroteye ape, sosu lowe wafei wain so lowe se ato ausiyewe, fisaꞌi lowe lo ape meni pite aꞌi ape lo nihe sahe hawese ariariyeye. Sosu saꞌi mai erasi pite wou aꞌi howeiye apou wou 300 kilomita.j