Sosu aꞌi pe ane saꞌi eifariyai erasi ta saꞌi papu wiraiyei siyeye. Le mato ereti feni werese feni hesi aꞌi (7) iroteye. Sosu le fe bulmakau lo paꞌare keraro ereti feni hesi (10) mato lo papu wirai. Fe bulmakau lo paꞌare keraro taꞌi taꞌi aꞌi hire sahe meni owane tutawe lo mato tuhe oso aꞌi onuteye. Mato werese lo ape sahe iyape ta, Owane Sitewi maꞌe au teꞌe naruteye ape, au leseye.^a 2 Saꞌi eifariyai ape, ane siyeye ape, apou wou aꞌi ne. You pusi erawe erasi lo nihari wou ne. Eifariyai lo lowe fe bea lo lowe aiwawe aꞌi ne. You pusi erawe erasi, fe Laion, lo ahi aiwawe aꞌi ne. Haru luwaru erasi ape lai eifariyai ape maꞌe kairefi topo lo auwe. Le me tutoꞌu erasi lo ape eifariyai maꞌe fa onuwei ne auwe. Iyape erasi aꞌi lo ape, le eifariyai ape maꞌe auwe. Serai eifariyai ape meni owane luwaru pefine aꞌi henerai.^b 3 Tu naifa eifariyai lo mato ta aine towesiyewe, le temeniyeye. Ahowa, enite tomu neꞌese lo ape foroꞌowe niyemaiyeye. Lu taune, omo omo werese iroteye ape, lowe enite niyame ape siyeye su, lowe hepene se suꞌariyewe, lowe le maꞌe tote umasiteye.^c 4 Haru luwaru erasi ape lai eifariyai maꞌe kairefi topo lo auwe su, lu taune werese haru ape au nineꞌi wisereyeteye. Sosu lowe eifariyai erasi ape ne au nineꞌi wisereyeteye. Lowe apou teꞌeye. “Eiwerai eifariyai ape wou aiwawe awere? Eiwerai le maꞌe ai atu tiyatirowa awere?”

5 Saꞌi eifariyai lai iyape topo lo ei ani aroweteye. Sosu le peri luwaru aꞌi Owane Sitewi maꞌe au teꞌe narunamiteye. Yame lu hesi werese ereti hesi aꞌi (42), eifariyai ape lai lu taune werese ne au noweinoweinamiteye.^d 6 Sosu eifariyai luwaru ape, Owane Sitewi maꞌe peri luwaru aꞌi au teꞌe narunamiteye. Le iyape pefine lo maꞌe, sosu omo niꞌarawe hire sahe irosiya ape maꞌe, sosu lu taune omo hire sahe irosiya ape mo maꞌe, le lowe maꞌe peri luwaru aꞌi au teꞌe narunamiteye. 7 Sosu saꞌi eifariyai ape Owane Sitewi lo lu taune ape mo maꞌe ai atu tiyatiyei ne fi. Sosu le lowe hi ani ararowe. Serai le lu taune werese omo omo pani werese sahe, lu taune tahe tereꞌe tereꞌe se, lu taune peri tereꞌe tereꞌe teꞌesiya ape, sosu niyene tereꞌe tereꞌe, le lowe werese ape ne au noweinoweiteye.^e 8 Sosu lu taune omo omo werese sahe irosiya ape, lowe eifariyai luwaru ape maꞌe au nineꞌi wisereyenamirowa. Lu taune werese ape mo, lowe iyape lowe lo one towe hepene norohuwe irosiya ape sahe, lese taꞌame. Lu taune werese fe sipsip lo yene temeniyeye ape, tote umasiteye su, Owane Sitewi lai nowe sitewi se iyape lowe lo one towe ape sahe leseye.^f

9 Lu taune apaniye irosiya ape lowe peri ape fa wanu etite. 10 Owane Sitewi apou toteye, lu taune ane kalabus wesi maꞌe henetiyei ne ariariyeye ape, lowe kalabus wesi maꞌe henetirowa. Sosu aiwawe aꞌi lu taune tereꞌe ane ipari meneꞌe se aine teraꞌeyei ne ariariyeye su, ai lu luwaru aꞌi lowe ipari meneꞌe se aine tou teraꞌerowa. Serai fene werese Jisas lo peri umasiteye ape, fene mi mi werese tei kairefiyete. Tote tawesiyei fene lo ape tei kairefi uwateyenamite.^g

11 Sosu aꞌi pe ane awei lihau luwaru erasi ta awei papu wirai ape siyeye. Awei lihau ape fe sipsip lo paꞌare keraro hesi aꞌi mato papu wirai. Le peri noꞌu haru luwaru erasi wou uteye. 12 Le eifariyai mase iroteye su, le eifariyai lo kairefi erasi werese ape iroteye. Serai le saꞌi eifariyai lo wiyawi taꞌaneteye. Le lu taune omo omo werese irosiya ape maꞌe, apou teꞌeye, “Fene werese eifariyai tutawe enite mato sahe foroꞌo niyemaiyeye ape ne, fu nineꞌi wisereyete.” Le lu taune maꞌe au teꞌeye. 13 Sosu awei lihau ape wiyawi erasi pefine aꞌi au taꞌanerowa. Aiwawe aꞌi lu taune werese aꞌi lo nihe se le yehe erasi niꞌarawe hire maꞌe awei sahe ei itorairowa.^h 14 Saꞌi eifariyai ape lai awei lihau ape maꞌe kairefiyeyei yaru erasi pefine aꞌi taꞌane auwe. Le etiri yaru erasi ape taꞌaneye su, le lu taune neꞌese awei pani iroteye ape areareteye. Awei lihau luwaru aꞌi ape lowe maꞌe apou eiye, “Saꞌi eifariyai ape mato sahe ipari meneꞌe se aine towesi temeniyeye ape, sosu si tame norohuwe sineye ape, fene nihari lo wou metei sahe lesere. Sosu moꞌo fene mi mi weriyei lowe uporo apeꞌi onurowawe, le maꞌe nineꞌi wisereyete.” 15 Awei lihau ape lai saꞌi eifariyai lo nihari hawese maꞌe metei sahe leseye ape, au eiye. Ne peri tamo au teꞌere. Sosu aiwawe aꞌi saꞌi eifariyai lo nihari metei sahe iroteye ape, le peri au teꞌeteye. Saꞌi eifariyai lo nihari metei sahe leseye ape, le lu taune werese wisereye nineꞌi taꞌame ape, lowe maꞌe aine teraꞌeyei ne au irorowa. 16 Awei lihau ape lu taune werese werese maꞌe apou eiye, “Fene werese yaru ta ereti eyate feni sahe piye mapine sahe fa au lesetire! Lu taune iyape se, sosu lu taune yahowaꞌi aꞌi, lu taune maꞌaru etiri se, lu taune wiyawi yahowaꞌi aꞌi ape mo, sosu lu taune marepi fetane, lowe werese yaru ape au lesere.” 17 Lu taune yaru ape ani taꞌame su lowe etiri werese tamo eterowata. Sosu aiwawe aꞌi lu tiyati ape mo etiri lowe lo ape eterowata. Yaru ape apou aiwawe aꞌi eifariyai lo iyape leseye sosu lowe iyape lo apou nawiteye.ⁱ

18 Serai lu taune marepi wisere aꞌi fa totenamite. Lowe eifariyai lo yaru leseye ape, fa siye soꞌoruwete. Lowe iyape lo ape nawiteyei su, yaru ape meni ta lo yaru aiwawe aꞌi ne. Nawiteyei ape wou moruwene, moruwene, moruwene.