Jon lai menitani ta sosu haru luwaru erasi ta siyeye.
12
Sosu aꞌi pe ane yaru erasi ta niꞌarawe hire maꞌe aute siyeye. Menitani ta ipari tahe lo poweiye mi wou ani asiteye. Le saro onuteyewe, lowe lo yame sahe atoteye. Mato lo sahe mato tuhe ani asiteye. Mato tuhe ape eiwariyemi ereti feni hesi lowe hesi aꞌi (12) taꞌaneye. 2 Menitani ape eimane tahe se iroteye. Sosu nowe ape se eimane auteiyei ne ataheyeyei su, le fofowei erasi aꞌi teriteye. Le peri erasi aꞌi uteye.aHaru luwaru erasi loꞌu aꞌi sepei Satan wou ne.
3 Sosu ane yaru erasi tereꞌe ta niꞌarawe hire maꞌe siyeye. Siyere! Ane haru luwaru erasi loꞌu aꞌi siyeye. Haru ape mato ereti fene werese feni hesi aꞌi (7) iroteye. Mato werese taꞌi taꞌi aꞌi sahe fe bulmakau lo tu keraro paꞌare wou ereti feni hesi (10) nowe maꞌe henerai. Haru lo mato werese sahe mato tuhe oso aꞌi hire sahe onuteye.b 4 Haru ape lai ini lo peipaiyeteye su, le eiwariyemi niꞌarawe hire irosiya ape, tewi taꞌi hi awei maꞌe sasari arosai. Eiwariyemi tewi hesi wiyeme iroteye. Sosu haru luwaru aꞌi ape menitani ape nihari sahe teiteye. Menitani ape meni eime auteiyei ne ataheyewa. Menitani ape meni eime auteiyei su, haru luwaru aꞌi ape meni eime lo a poꞌuteyei ne totesiya.c 5 Sosu menitani ape meni eime auteiye. Ahowa, Owane Sitewi lai meni eime ape ereti se witane aꞌi ani tepaꞌasi aniyewe, omo hire maꞌe le mase hene wiye. Sosu me tutoꞌu tutawe lo sahe aiwawe aꞌi onurowa. Meni eime ape meni Owane tutawe henerairowawe, lu taune omo omo werese irosiya ape, me au kairefi aꞌi se au noweinoweinamirowa.d 6 Sosu menitani ape meni eime autei tepaꞌasiye su, le ipo maꞌe iteroti. Owane Sitewi lai wesi ta le ne taꞌaneye. Iyu menei hesi heta yame moruwene omo ape sahe Owane Sitewi lai le au noweinoweiteye.
7 Sosu aꞌi pe ai atu lo noꞌu erasi niꞌarawe hire maꞌe henerai. Owane Sitewi lo ipari iyape Maikel, sosu ipari wisere tomu neꞌese lo aiwawe aꞌi lowe mo haru luwaru erasi ape, mase ai atu tiyatiteye. Haru luwaru ape sosu sepei luwaru aꞌi lo mase lowe ai atu tiyatiteye.e 8 Ahowa, Owane Sitewi lo ipari ape mo lai haru luwaru aꞌi ape hi ani ararowe. Serai lowe haru luwaru ape sepei neꞌese lo ape mase hi awei sahe eito maꞌe ani fu arosai. 9 Serai haru luwaru erasi ape iyape Satan. Le sepei luwaru pefine aꞌi ne. Owane Sitewi le hi awei maꞌe ani fu arosai. Tu naifa weriyei weriyei haru ape ironamiteye. Le lu taune neꞌese erasi au arearenamiteye. Serai Owane Sitewi lai haru ape hi awei se eito ani fu arosai. Sosu sepei luwaru werese aꞌi lo aiwawe aꞌi hi awei sahe ani fu arosai.f
10 Sosu ane peri noꞌu erasi ta niꞌarawe hire maꞌe apou uteye ape wanuwe,
“Pereye nowe eite se Owane Sitewi lai lu taune werese awei sahe eite mo si ete hene aniye. Owane Sitewi lo kairefi erasi aꞌi, omo niꞌarawe hire maꞌe irosiya ape, sosu Krais lo iyape erasi aꞌi amerame aꞌi henerai tepaꞌasiye. Piyene awere? Ipari luwaru aꞌi ape, Satan, Owane Sitewi lo lu feni werese maꞌe mi mi pasi pasi weriyei Owane Sitewi nomo lo maꞌe peri wawero apou au fu teꞌenamisiya ape, Owane Sitewi lai le hi awei sahe eito ani fu arosai.g
11 Lu taune Owane Sitewi lo peri umasiteye ape, lowe lai sepei luwaru ape ani ararowe. Fe sipsip lo yene, Jisas me tapeꞌi sahe temeniyeye su, fisaꞌi lo se lowe si ete hene aniye. Lowe peri pefine aꞌi lo lu taune maꞌe au teꞌe fiyariteye. Serene lowe sepei luwaru aꞌi ape ani ararowe. Lowe Owane Sitewi ne marepi erasi aꞌi tote wawesiyenamiteye. Serai lowe le ne ai atuteye su, lowe le ne temeniyeyei ne tote taꞌame.
12 Lu taune werese sosu etiri werese niꞌarawe hire maꞌe irosiya ape, fene nineꞌinamite. Ahowa, fene hi awei sahe irosiya ape, sosu saꞌi sahe irosiya ape, Weiyai! Sepei luwaru pefine aꞌi hi awei maꞌe itorai. Le ai marepi erasi aꞌi tote ironamisiya. Nowe lo le poꞌuteyei ape oso aꞌi irosiya. Le soꞌoruwe aꞌi ne. Serene le ai marepi erasi aꞌi totenamisiya.”h
13 Sosu haru luwaru ape, hi awei maꞌe ani fu arosai ape, siye soꞌoruweye su, le menitani ape, meni eime auteiye ape, moꞌo umasiti. 14 Ahowa, Owane Sitewi lai menitani ape maꞌe irowe yaruwapi lo haipi erasi auwe. Irowe yaruwapi lo haipi se le haru luwaru aꞌi ape arunatiyewe, ipo maꞌe sine wiye. Le wesi ape, Owane Sitewi lo taꞌaneye ape maꞌe, sine wiye. Wesi lo ape sahe Owane Sitewi lai menitani ape nowe iyu menei hesi heta, sosu yame moruwene au noweinoweinamiteye. Haru luwaru ape menitani ape au luwaruwerowata.i 15 Haru luwaru ape lo ahi sahe pisaꞌi erasi aꞌi saꞌi mai wou menitani ape meꞌiye topohosawi. Saꞌi heꞌi erasi howeirai su, le menitani ape saꞌi erasi ape hire fa fetaneyetiyei ne toteye. 16 Ahowa, awei ape lai menitani au pati anirai. Owane Sitewi lai awei ani tosowewe, saꞌi mai ape, haru lo ahi nowe maꞌe topohoteye ape, awei yo ape papu here itowe. 17-18 Sosu haru luwaru ape menitani ape maꞌe ai marepi erasi aꞌi totenamiteye. Serene le menitani ape lo eimane tape tereꞌe werese maꞌe ai atuwei ne fi. Sosu lu taune werese Owane Sitewi lo yo peri tote umasiteye ape, sosu lu taune werese Jisas lo peri au teꞌe fiyariteye ape, le aiwawe aꞌi lowe maꞌe ai atuwei ne fi.j