Owane Sitewi lai lu hesi au teꞌe areiyeyei ne eimawesai.
11
Sosu aꞌi pe Owane Sitewi lo ipari metei ta ane maꞌe wesi taꞌaneyei lo me hawese auwe. Le ane maꞌe eiye, “Ne sinere! Owane Sitewi lo wesi tutawe ape sahe metei se hawesere. Tapiye wari ape aiwawe metei se hawesere! Tapiye wari ape sahe lowe Owane Sitewi maꞌe fe loꞌu au hese aroweteye. Sosu lu taune wesi tutawe lo sahe, Owane Sitewi maꞌe au nineꞌisiya ape, au siye eti ninawere.a 2 Ahowa, ne wesi tutawe lo nepawe tewi sahe owe ape au hawesere. Awei tewi ape arure. Ane lai awei tewi ape lu taune, peri ano umasi taꞌame ape, auwe. Yame lu hesi werese ereti hesi aꞌi aiwawe, lowe Owane Sitewi lo omo weniyei waraꞌi aꞌi au ai atu araronamirowa.b 3 Sosu ane lu hesi peri pefine ano lowe maꞌe au teꞌe areiyeyei ne eimawesawirowa. Lowe tote ewiteyei lo peperi tahe lowesi lo sahe aniterowa. Lowesi peri pefine ano iyu menei hesi heta, sosu nowe tewi aꞌi au teꞌe fiyari areiyerowa. Nowe poweiye ape aiwawe aꞌi 1,260 nawiterowa.”4 Lu hesi ape lowe me oliv hesi aꞌi sosu yehe erei lo wari hesi aꞌi, wou irosiya. Meni Owane Pefine aꞌi lai lu taune omo omo pani werese sahe, au noweinoweinamisiya. Lowesi nihari lo sahe teisiya.c 5 Lu taune tamo lowesi au luwaruweyei ne toteyei su, yehe erasi ahi lowesi lo nowe maꞌe henerairowawe, lowe maꞌe ti seroꞌo poꞌuterowa. Serai lu taune tamo lowesi au luwaruweyei ne toteyei su, lowe lowesi aine teraꞌerowata.d 6 Ane lowesi maꞌe kairefiyeyei ta auwe. Sosu lowesi aitu sapu ti nateyei su, saꞌi itorairowata. Serai nowe ape se lowesi peri pefine au teꞌe fiyari areiyeteye su, saꞌi itorairowata. Ane lowesi maꞌe kairefiyeyei erasi auwe. Lowesi saꞌi saꞌi werese meni fisaꞌi wou ani aweto henerairowa. Lowesi omo omo pani sahe faraꞌu etiri luwaru orese aꞌi fa heneraiyei ne toteye.e
7 Sosu lowesi peri ano au teꞌe fiyari tepaꞌasirowa su, ipari luwaru aꞌi ape awei yo, sitewi taꞌame ape, papu lowesi maꞌe ai atuwei ne wirairowa. Le lowesi hi ani ararorowawe, lowesi aine teraꞌe temeniyerowa.f 8 Sosu tahe paꞌare lowesi lo yo mai omo erasi aꞌi sahe howei lotorowa. Omo erasi ape sahe lowe Meni Owane Pefine me tapeꞌi sahe aine teraꞌe temeniyeye. Omo erasi ape lu ape peri anowe iyape omo Sodom, sosu iyape tereꞌe apou teꞌesiya omo pani Isip.g 9 Poweiye hesi heta tahe paꞌare lowesi lo yo mai sahe howei lotorowa. Lu taune omo omo pani tereꞌe tereꞌe se ape lowesi siyenarairowa, lu taune niyene tereꞌe tereꞌe se, lu taune peri tereꞌe tereꞌe se lowesi siyenarairowa. Lowe apou teꞌeye, “Lowesi fisiye yo papu owe ape towasire.” 10 Sosu lowesi temeniyerowa su, lu taune omo omo pani werese, lowe temeniyeyei lowesi lo wanurowa su, lowe marepi nineꞌi wisereye irorowa. Marepi lowe lo fetane aꞌi teriterowa. Lowe lu hesi temeniyeyei wanurowa su, lowe taꞌuwe hereiyei erasi aꞌi irorowa. Piyene awere? Marepi tote nineꞌiyei lowe lo apou aꞌi ne, “Lu hesi ape lu taune omo omo pani werese sahe au luwaruwenamiteye.” 11 Poweiye hesi heta tewi oso aꞌi tepaꞌasirowa su, Owane Sitewi lai hepene norohuwe lowesi lo si tame taꞌane fate norohuwerowa. Sosu lowesi si tame taꞌane norohuwe sinerowa su, lu taune lowesi siyerowa su, lowe werese hepene se suꞌarirowa.h 12 Sosu lowesi peri erasi niꞌarawe maꞌe uteyei wanurowa. Peri ape apou eiye, “Fenesi hire eito maꞌe yanera.” Serai lu taune lo nihe se, lowesi niꞌarawe hire maꞌe aitu sapu ponei sahe yaneyei siye arowerowa.i 13 Nowe ape henerairowa su, awe erasi auseriyerowa. Omo erasi ape sahe wesi tomu neꞌese aꞌi winetai luwaruwerowa. Awe erasi ape sahe lu taune 7 tausen temeniyerowa. Lu taune tereꞌe tamo wiyeme iroteye ape, lowe atoweiye irotorowa. Serai lowe Owane Sitewi omo hire sahe ironamitorowa ape, lowe le maꞌe au teꞌe nineꞌi wisereyeteye.j 14 Wirepu nemeroru ape i tepaꞌasiye. Siyere! Wirepu faforu nowe luwaru lowe maꞌe iꞌero aꞌi henerairowa.k
Owane Sitewi lo ipari wisere aꞌi toꞌu meneꞌe mapefuwe au fateye.
15 Sosu aꞌi pe Owane Sitewi lo ipari toꞌu meneꞌe mapefuwe lo fateye. Sosu peri erasi tamo niꞌarawe maꞌe kairefi aꞌi apou uteye,
“Owane Sitewi nomo lo sosu meni ape le hi awei maꞌe eimawe arosai ape, lowesi lai yo seni luwaru aꞌi ape mo hi ani araro sasari pamoweteye. Lowesi meni Owane tutawe heneraiyewe, lu taune omo omo pani werese irosiya ape, au noweinoweinamitorowa.”l
16 Sosu yaꞌariyei lu meni ta werese hesiyo hesiyo me tutoꞌu lowe lo sahe onuteye ape, lowe Owane Sitewi maꞌe nihari lowe lo awei maꞌe apeꞌi onuwewe, le maꞌe nineꞌi wisereyeye. 17 Lowe apou teꞌeteye,
“Owane Sitewi, ne kairefi pefine aꞌi ne. Nomo ne maꞌe peri au teꞌe wisereyesiya. Tu naifa weriyei ne saro ironamiteye. Sosu pereye nowe eite se, ne ironamisiya. Ne kairefi erasi no aniye. Pereye nowe eite se Meni Owane tutawe heneraiyewe, lu taune werese au noweinoweinamisiya. Serai nomo ne ne au teꞌe wisereyesiya.
18 Ahowa, lu taune peri no wanu umasi taꞌame ape, lowe ne maꞌe ai marepi erasi aꞌi totenamirowa. Piyene awere? Nowe eite se ne yo seni luwaru aꞌi lowe lo au hese ereirowa. Nowe ape se awei lu owane werese lu taune aine teraꞌeteye ape ne, lowe werese maꞌe itiyaꞌu aine teraꞌe sasarirowa. Ahowa, nowe ape se aiwawe aꞌi, wiyawi lu taune werese no, lu ape mo, peri no au teꞌe fiyariteye ape, sosu lu taune ne maꞌe au teꞌe wisereye nineꞌiteye ape, sosu lu taune iyape no ei ani aroweteye ape, sosu lu taune iyape se iroteye ape, sosu lu taune iyape yahowaꞌi ape se, nowe ape se ne lowe werese maꞌe etiri wisere aꞌi auwei ne iꞌero aꞌi henerairowa.”m
19 Sosu Owane Sitewi lo wesi tutawe niꞌarawe hire sahe ironamisiya ape, yo tosowe. Ane omoto erasi wesi ape papu sahe siyeye. Me wari ape papu sahe ane Moses lo yo peri saro iroteye ape, siyeye. Sosu ane pesiyei meraꞌo erasi neꞌese me wari ape sahe heneraiyei siyeye. Peri noꞌu erasi aꞌi uteye. Awe erasi auseriyeye. Sosu saꞌi naretei aꞌi tapiye orese aꞌi wou itoraiyei siyeye.n