Owane Sitewi lo ipari one towe oso aꞌi ta ereti lo sahe aniteye.
10
Sosu aꞌi pe ane Owane Sitewi lo ipari kairefi aꞌi hire maꞌe itoraiyei aute siye aniye. Aitu sapu mase tahe paꞌare lo napetu ti tawesiyewe, itorai. Haru saꞌi ta mato lo hire iroteye. Nihari lo poweiye mi wou aꞌi ne. Lowe hesi lo wesi me tou wou aꞌi ne. Lowe hesi yehe mi wou ti etine wiye. 2 Ereti lo sahe one towe oso aꞌi ta, tosowe ape, aniteye. Sosu lowe eyate feni lo hare ite erasi hire sahe futeye. Sosu lowe epi feni lo omo pani hire sahe futeye. 3 Le peri noꞌu erasi apou uteye. You erawe apuwei pereꞌi erasi wou aꞌi iroteye. Le peri erasi uteye su, ane meraꞌo mi ereti feni werese feni hesi aꞌi (7) noꞌu erasi peratiyei, wanuwe. 4 Sosu meraꞌo ereti feni werese feni hesi aꞌi (7) niꞌarawe sahe peratiye su, ane one towe sahe peri lowe lo leseyei ne toteye. Ahowa, ane peri erasi ta niꞌarawe hire maꞌe apou uteyei aute wanuwe, “Peri ape mo, meraꞌo mi ereti feni werese feni hesi aꞌi (7) uteye ape, ne ti tawesite, one towe sahe owe ape lesere.”a5 Sosu ane Owane Sitewi lo ipari ape hare ite sahe omo pani hire sahe teiteyei siyeye ape, le ereti eyate feni lo niꞌarawe hire maꞌe ei ani aroweye.b 6 Le peri ta au teꞌe naneiye. “Ane Owane Sitewi lo iyape ei ani arowesiya. Le mi mi pasi pasi weriyei ironamitorowa ape, le etiri werese niꞌarawe hire sahe irosiya ape, etiri werese awei pani irosiya ape, sosu etiri werese saꞌi saꞌi papu irosiya ape, le etiri werese ape mo taꞌaneye. Peri teꞌe naneiyei lo ape wiyeme pefine aꞌi iꞌero aꞌi henerairowa. Nowe ape se henerai tepaꞌasiye. Le lu taune werese le ne meꞌiyeni maꞌe atati arunatiteye ape, lowe maꞌe au hese ereirowa. Le lowe maꞌe fofowei erasi aꞌi aurowa. 7 Nowe ape se Owane Sitewi lo ipari toꞌu meneꞌe mapefuwe lo faterowa su, Owane Sitewi lo marepi tu naifa tote fareyareteye ape mo, wiyeme pefine aꞌi henerai tepaꞌasiyei. Apou wou aꞌi le peri lo au teꞌe siye lu werese maꞌe tu naifa au teꞌe areiyeteye.”c
8 Sosu peri ape niꞌarawe hire maꞌe ane peri uteyei ta wanuwe ape, le ane maꞌe apou tame eiye. Owane Sitewi lo ipari ape saꞌi sahe omo pani sahe teiteye ape, ne one towe, tosonamiteye ape, ereti lo sahe aiseri.
9 Ane peri ape wanuwe su, ane Owane Sitewi lo ipari ape maꞌe one towe oso aꞌi ape ei toweriyei ne fi. Le ane maꞌe eiye, “One towe ape anirowawe, are. Ne ayei su, ai horuse erasi lire no maꞌe tawirawirowa. Ahowa, ahi no sahe neriyawe saꞌi wou teriterowa.”d
10 Sosu ane one towe ereti lo sahe aniyewe, ane aye. Ahi ano sahe neriyawe saꞌi piyoꞌu wou teriteye. Ahowa, lire papu wiye su, lire ano sahe horuse erasi aꞌi tawirawiye. 11 Sosu le ane maꞌe eiye, “Lu taune werese ne, Omo pani werese ne, peri tereꞌe tereꞌe tamo werese, sosu lu owane tutawe werese ne, ne peri ano lowe werese maꞌe au teꞌe fiyari areiyetite.”