Meneꞌe mapefuwe erenawe fateye.
9
Sosu aꞌi pe Owane Sitewi lo ipari erenawe meneꞌe mapefuwe lo fateye. Eiwariyemi ta niꞌarawe maꞌe hi awei maꞌe winetairai. Tapiye erasi potu aꞌi ta awei yo, sitewi taꞌame ape, yo ahi hire sahe ti tawesiteye. Owane Sitewi lai eiwariyemi ape maꞌe yo ape lo ahi au noweinoweiyei ne auwe.a 2 Eiwariyemi ape tapiye erasi potu aꞌi, yo ape lo ahi ti tawesiteye ape, le tapiye erasi potu aꞌi yo ape lo ahi ani erauwe. Awei yo ape sahe yehe itomu papaꞌu aꞌi ape wirai. Yehe itomu papaꞌu aꞌi ape yehe erasi wou henerai. Yehe itomu ape awei yo papu wirai ape niꞌarawe poweiye ti napetu tawesiteye. Serai niꞌarawe, poweiye pasi aꞌi henerai.b 3 Sosu haute tomu neꞌese yehe itomu ape papu henerai. Lowe omo pani werese napetu fiyari ereye. Owane Sitewi lai haute ape awei heripahari lo ai aiwawe aꞌi auwe.c 4 Sosu Owane Sitewi haute ape mo maꞌe eiye. “Fene senarepe, motowe, me etiri werese awei sahe irosiya ape, owe ape asakereiye erete. Ahowa, fene lu taune werese Owane Sitewi lo yaru mapine sahe lese taꞌame ape mo au luwaruwete.”d 5 Haute ape lu taune maꞌe yame ereti feni werese faraꞌu au luwaruweyei. Lowe lai lu taune ape maꞌe owe ape tomu teraꞌere. Lowe lu taune maꞌe tomuwei su, fofowei erasi heripahari lo tomusiya wou teriterowa. 6 Nowe ape se lu taune ape mo temeniyeyei ne nehirowa. Ahowa, lowe temeniyerowata. Temeniyeyei lowe sahe henerairowata.e7 Ane haute ape mo siyeye. Lowe ai atuwei ne naneiye. Lowe ai atuwei lo ipari tahe ani asiteye. Mato lowe lo sahe mato tuhe tapiye gol taꞌaneteye ape iroteye. Nihari lowe lo lu nihari wou ne.f 8 Mato towe lowe lo pitase aꞌi ne. Taune lo mato pitase aiwawe aꞌi ne. Pi lowe lo you erawe lo pi aiwawe aꞌi ne.g 9 Lowe ereti epi feni se tiye ta aniteteye. Haipi lowe lo lo noꞌu fe ai noꞌu erasi wou irowe.h 10 Lowe heripahari lo ini aiwawe aꞌi ne. Heripahari lo ini lai lu taune tomuwei su, lowe fofowei tawirawiyei erasi teriterowa. Yame ereti feni werese heripahari lo ai lu taune tomuwei su, tawirawiyei erasi teriterowa. 11 Ipari luwaru tutawe ape meni owane tutawe wou ne. Le awei yo, sitewi taꞌame ape, au noweinoweinamisiya. Le haute ape mo au noweinoweinamisiya. Ipari luwaru aꞌi lo owane lo iyape peri Hibru apou teꞌesiya. “Abadon.” Sosu iyape peri Grik aiwawe aꞌi apou teꞌesiya. “Aporiyan.” Peri eite lo sitewi aiwawe meni ta etiri werese au luwaruwe poꞌuteteye siye meni.
12 Sosu aꞌi pe etiri orese tutawe ape mo tepaꞌasiye. Siyere! Etiri orese erasi hesi aꞌi tamo henerairowa.
13 Sosu aꞌi pe Owane Sitewi lo ipari moruwene meneꞌe mapefuwe lo fateye. Sosu ane peri noꞌu erasi wanuwe. Tapiye wari, tapiye gol taꞌaneteye ape sahe, fe bulmakau lo paꞌare oriye sahe lototeye. Tapiye wari ape Owane Sitewi lo me tutoꞌu tutawe sahe iroteye. 14 Peri noꞌu ape Owane Sitewi lo ipari moruwene maꞌe apou eiye, “Satan lo ipari luwaru hesiyo hesiyo Owane Sitewi lai lowe wafei se ti tawesiteye ape, ne lowe erau arosawire. Lowe saꞌi mai erasi Yufretis saro ironamiteye.” 15 Owane Sitewi lai nowe ape se lowe erau arosawiyei ne ariariyeye. Lowe erau arosawiyei su, lowe lu taune tewi taꞌi aꞌi ape mo aine teraꞌerowa. Lu taune tewi hesi tereꞌe ape mo, lowe wiyeme irorowa. Serai nowe ape se, Owane Sitewi lai ariariyeye ape, henerai su, le ipari lo ape ipari luwaru hesiyo hesiyo erau arosawiyei ne eimawesawi.i 16 Sosu aꞌi pe ipari luwaru ape mo ai atu siye lu tomu neꞌese, 200 milion, fe hos lo meꞌiyeni sahe onuwei ne taꞌuwerai. Ane nawiteyei lowe lo, wanuwe. 17 Ane etiri ape mo suwou se siyeye. Ane fe hos sosu ai atu siye lu ape mo fe hos lo meꞌiyeni sahe onuteye ape mo, siyeye. Ai lu ape mo lai lowe ai wafei uperi ape mo ani asi ereye. Ai atu wafei uperi ape mo nihari tereꞌe tereꞌe se taꞌaneye. Lowe yehe mi loꞌu wou, sosu tapiye norohuwe wou, sosu tapiye aꞌi wou taꞌaneye. Fe hos lowe lo tu paꞌare nihari apou aꞌi ne. You pusi erawe laion lo nihari wou aꞌi ne. Ahi lowe lo sahe yehe, sorowe itomu aꞌi, sosu itomu wareme aꞌi nowe maꞌe henerai. Itomu apou irowe hote uwase heneri somusiya wou aꞌi ne. 18 Etiri hesi heta lu taune maꞌe henerai su, lowe lu taune tewi taꞌi temeniyeye. Yehe itomu sosu itomu aꞌi, fe hos lo ahi sahe, henerai ape, lowe lu taune weneri tewi taꞌi aine teraꞌeye. Lu taune weneri tewi hesi ape mo wiyeme aꞌi iroteye. 19 Fe hos ape lo kairefi ahi, ini lo sahe irosiya. Ini lowe lo ape haru mato wou ne. Fe hos lo ini haru mato wou irosiya ape, lai lu taune tomu na fofowei luwaruweteye.
20 Lu taune tewi hesi tereꞌe etiri luwaru aꞌi aine teraꞌe temeniye taꞌame ape, lowe yo seni luwaru lowe lo meꞌiyeni maꞌe atati aru taꞌame. Yo seni luwaru ereti se iroteye ape, sosu lowe ipari luwaru aꞌi maꞌe au nineꞌinamiteye ape, sosu god wawero lowe tapiye gol, tapiye silva, tapiye iwise norohu aꞌi, sosu metei taꞌaneteye ape, god wawero werese lowe lo apaniye se wanurowata, sosu lowe uweirowata.j 21 Sosu lu ape mo lu taune weneri tereꞌe aine teraꞌeteye. Lowe lu taune weneri tewi tereꞌe ape sinari temeniyeteye. Lowe tafaꞌe yo seni luwaru aꞌi ironamiteye. Aiwawe lowe etiri tamo tiyati taꞌarei aniteye. Lowe yo seni apou ape mo iroteye su, lowe yo seni apou ape meꞌiyeni maꞌe atati aru taꞌame.