3 Sosu Owane Sitewi lo ipari wisere aꞌi tereꞌe ta tapiye wari me tutoꞌu tutawe saro ahe teirai. Ereti lo sahe le siye awe, tapiye gol taꞌaneteye ape, aniteye. Owane Sitewi lai me mari towe heneri erasi pefine aꞌi ape le maꞌe auwe. Lu taune Owane Sitewi maꞌe teꞌe toweriteye su, Owane Sitewi lo ipari me mari towe aiwawe aꞌi tapiye wari ape sahe yehe ti meteye.^a 4 Me mari towe lo itomu heneri wisere aꞌi ape, sosu aiwawe lu taune werese Owane Sitewi ne tote tawesiteye ape, lowe le maꞌe au teꞌe toweriteye. Peri lowe lo ape mo siye awe, papu iroteye ape, Owane Sitewi maꞌe itomu siye aroweteye. 5 Sosu Owane Sitewi lo ipari ape lai siye awe, tapiye gol taꞌaneteye ape, ereti lo sahe aniteyewe, yehe harite siye awe papu fuwe. Sosu le yehe harite ape hi awei pani pani sahe ani teroso fiyari arosawi. Yehe harite ani teroso fiyari arosawi su, moꞌo pesiyei noꞌu erasi perati fiyari howeiye. Meraꞌo mi ape aiwawe pani pani mitaiyeyei howei aruwe. Sosu nowe ape se awe erasi omo pani werese tei auseriyeye.^b

6 Sosu Owane Sitewi lo ipari ereti feni werese feni hesi aꞌi meneꞌe mapefuwe ereti feni werese feni hesi aꞌi ereti se aniteyewe, ahi maꞌe fateyei ne fuwe.

7 Owane Sitewi lo ipari tutawe, le meneꞌe mapefuwe ape fateye. Siyere! Owane Sitewi lai saꞌi naretei tapiye wou ani fu arosai. Sosu yehe erasi meni fisaꞌi mase aiwawe aꞌi hi awei sahe ani terososai. Serai omo pani tewi taꞌi ape ti seroꞌo poꞌuteye. Omo pani werese sahe, tewi hesi wisere aꞌi iroteye. Me werese omo pani tewi taꞌi iroteye ape, ti seroꞌo poꞌuteye. Me werese omo pani tewi hesi tereꞌe wiyeme iroteye. Sosu senarepe, me towe, etiri werese ape mo omo pani tewi taꞌi sahe iroteye ape, ti seroꞌo poꞌuteye. Senarepe, me towe, etiri ape mo, omo pani tewi hesi aꞌi sahe iroteye ape wiyeme aꞌi iroteye.^c

8 Owane Sitewi lo ipari nemeroru, le meneꞌe mapefuwe fateye. Siyere! Owane Sitewi lai yehe omo erasi aꞌi saꞌi saꞌi erasi papu ani fu arosawi. Serai saꞌi tewi taꞌi fisaꞌi wou henerai. Saꞌi tewi hesi tereꞌe wiyeme aꞌi iroteye. 9 Etiri werese ape mo, hepene norohuwe iroteye ape, saꞌi tewi ape sahe iroteye ape, werese temeniyeye. Sosu aiwawe aꞌi wai erasi, saꞌi tewi ape sahe iroteye ape, aine aporuwe.

10 Owane Sitewi lo ipari faforu meneꞌe mapefuwe lo fateye. Siyere! Eiwariyemi erasi ta omo hire maꞌe winetairai. Yehe erei mi wou mitaiye itorai. Eiwariyemi ape saꞌi mai omo pani tewi taꞌi iroteye ape, sosu saꞌi paserou oso aꞌi omo pani ape sahe itoraiteye. Saꞌi mai, sosu saꞌi paserou omo pani tewi hesi tereꞌe sahe iroteye ape, wiyeme aꞌi iroteye. 11 Eiwariyemi erasi ape lowe lai iyape apou teꞌesiya. Etiri luwaru horuse ai aꞌi ne. Etiri horuse ai aꞌi ape saꞌi tewi taꞌi sahe winetaiye. Serai saꞌi werese omo pani tewi taꞌi ape sahe horuse ai aꞌi henerai. Lu taune werese saꞌi ape ene aye su, lowe temeniyeye.^d

12 Sosu Owane Sitewi lo ipari ororu ape meneꞌe mapefuwe lo fateye su, sosu siyere! Poweiye, yame, eiwariyemi ape mo nowe tewi taꞌi ape sahe tei tamo aine noruweye, pasi wou henerai. Nowe tewi hesi aꞌi tei noruweye su, poweiye mi tewi mitaiyeye. Sosu aiwawe aꞌi yame, eiwariyemi nowe tewi taꞌi ta tewi mitaiyeteye.^e 13 Sosu ane irowe yaruwapi niꞌarawe unahi sine uweiteyei siyeye. Le apou uteye, Wirepu, Wirepu, Wirepu. Lu taune awei pani sahe irosiya ape, fene. Weiyai! Owane Sitewi lo ipari tereꞌe mo meneꞌe mapefuwe fateyei su, etiri orese erasi aꞌi fene sahe henerairowa.^f