Owane Sitewi lu taune neꞌese, 144 tausen, si hene taꞌuwe aniye.
7
Sosu moꞌo aꞌi pe ane Owane Sitewi lo ipari wisere aꞌi hesiyo hesiyo siyeye. Taꞌi ta poweiye wiraisiya ape maꞌe teiteye, taꞌi ta poweiye itorisiya ape maꞌe, teiteye, sosu heta eyate feni maꞌe, heta epi feni maꞌe teiteye. Lowe fiyaru hesiyo hesiyo awei sahe henerai ape, anite tawesiteye. Serai owe fiyaru ta, omo pani werese, saꞌi saꞌi werese, me etiri werese sahe faterowata.a 2 Sosu ane Owane Sitewi lo ipari wisere aꞌi poweiye wiraisiya ape maꞌe siye aniye. Le Owane Sitewi norohuwe aꞌi lo yaru ereti lo sahe aniteye. Le peri kairefi erasi aꞌi Owane Sitewi lo ipari hesiyo hesiyo ape mo maꞌe uteye. Owane Sitewi lai lowe maꞌe kairefi pani pani werese, saꞌi saꞌi werese ape mo luwaruweyei ne auwe. 3 Le lowe maꞌe uteye. Fene ninawete! Fene omo pani, saꞌi saꞌi werese, me etiri werese owe ape au luwaruwete. Tu Owane Sitewi lo wiyawi yahowaꞌi aꞌi siye lu taune ape mo, nomo mapine lowe lo sahe Owane Sitewi nomo lo yaru au leserowa. Nomo yaru lo lowe maꞌe au lese tepaꞌasiyei su, sosu fene etiri werese faraꞌu au luwaruwere!bOwane Sitewi Israel lo lu tewi, 144 Tausen, ariariyeye.
4 Lu taune Owane Sitewi lo yaru aniye ape ne, ane apou wanuwe. Lu taune 144 tausen taꞌuwe hene aniye. Owane Sitewi lai Israel lo lu tewi werese maꞌe ei taꞌuwe aniye.c
5 Juda lo lu tewi, 12 tausen, Owane Sitewi lo yaru aniye.
Ruben lo lu tewi, 12 tausen,
Gat lo lu tewi, 12 tausen,
6 Aser lo lu tewi, 12 tausen,
Naptali lo lu tewi, 12 tausen,
Manase lo lu tewi, 12 tausen.
7 Simeon lo lu tewi, 12 tausen,
Levi lo lu tewi, 12 tausen,
Isakar lo lu tewi, 12 tausen,
8 Sebulun lo lu tewi, 12 tausen,
Josep lo lu tewi, 12 tausen,
Benjamin lo lu tewi, 12 tausen.
Lu taune ape mo Owane Sitewi lo yaru aniye.
Lu taune neꞌese nowe ape se etiri luwaru erasi aꞌi henerai ape, maꞌe fai.
9 Sosu moꞌo aꞌi pe ane lu taune neꞌese siyeye. Owe meni ta lowe nawiterowata. Lowe omo omo werese maꞌe fai. Niyene niyene werese maꞌe fai. Sosu tahe tereꞌe tereꞌe maꞌe fai. Sosu peri tereꞌe tereꞌe aiwawe aꞌi taꞌuwerai. Lowe werese me tutoꞌu tutawe sahe, sosu fe sipsip lo yene nihari teirai. Lowe ipari tahe pitase wapo aꞌi ani asiteye. Lowe ereti lowe lo sahe siye towe tamo anite aiwaweyeteye. 10 Serai lowe peri erasi aꞌi apou uteye,
“Owane Sitewi nomo lo me tutoꞌu tutawe sahe onunamisiya ape, sosu fe sipsip lo yene aiwawe lowesi yo seni luwaru aꞌi ani sasari pamoweyewe, nomo maꞌe marepi hepene heꞌi aꞌi auwe.”d
11 Sosu Owane Sitewi lo ipari wisere werese aꞌi, sosu yaꞌariyei lu meni ta werese hesiyo hesiyo, sosu etiri hepene norohuwe aꞌi hesiyo hesiyo, me tutoꞌu tutawe tei yose aperayesiya. Lowe werese aꞌi nihari lowe lo sahe, lowe uporo apeꞌi onuwewe, le maꞌe au teꞌe wisereye nineꞌinamiteye. 12 Lowe peri erasi apou uteye,
“Etiri pefine aꞌi tene! Nomo ne maꞌe au teꞌe nineꞌisiya.
Iyape no erasi pefine aꞌi ne. Marepi no wisere erasi aꞌi ne. Ne kairefi werese lo sitewi. Ne kairefi erasi pefine aꞌi ne. Ne etiri werese hi ani araronamisiya. Serene nomo ne maꞌe mi mi pasi pasi weriyei au teꞌe wisereye nineꞌinamitorowa. Peri ape pefine aꞌi tene!”e
13 Sosu yaꞌariyei taꞌi ane maꞌe itiyaꞌu ei toweriye. “Lu taune ipari tahe wapo pitase aꞌi ani asiteye ape, lowe eiwerai awere? Lowe piye omo maꞌe fai awere?” 14 Sosu ane le maꞌe itiyaꞌu apou eiye, “Meni Owane, ne soꞌoruwe tene! Ne ane maꞌe teꞌere.”
Sosu le ane maꞌe eiye, “Lu taune ape mo lowe nowe ape se etiri luwaru erasi aꞌi henerairowa ape, teriteyei su, lowe tote tawesiyei lowe lo tei kairefiyerowa. Lowe Owane Sitewi lo lu feni aꞌi ne. Fe sipsip lo yene temeniyeye su, fisaꞌi lo yo seni luwaru aꞌi lowe lo au hu sasari pamowe tepaꞌasiye. Ipari tahe lowe lo wapo aseyaro aꞌi henerai.f 15 Serene lowe Owane Sitewi lo me tutoꞌu tutawe taꞌuwerai. Lowe le maꞌe mi mi pasi pasi weriyei wiyawi wesi tutawe lo sahe au taꞌanenamisiya. Sosu Owane Sitewi lai lowe maꞌe au noweinoweinamirowa. 16 Lowe lau erasi teriterowata. Saꞌi wawe teriterowata. Aiwawe aꞌi poweiye lai lowe maꞌe ti fofowei erasi aꞌi teriterowata. Poweiye lo ai tahe lowe lo ti fofowei teriterowata. Piyene awere?g 17 Serene fe sipsip lo yene lai me tutoꞌu tutawe ponei sahe iroteye ape, le lowe werese au noweinoweinamitorowa. Le lowe maꞌe saꞌi waraꞌi aꞌi hepene norohu aꞌi aunamisiya ape, henetirowa. Sosu Owane Sitewi lai nihe saꞌi werese lowe lo au ani taineterowa.”h