Me unere lo fito ani erau fiyariteye.
6
Sosu aꞌi pe ane fe sipsip lo yene me unere lo fito tutawe, ani erau fiyariye ape, siyeye. Sosu etiri norohu taꞌi aꞌi ape peri erasi aꞌi pesiyei noꞌu erasi wou uteye. Ane peri lo apou wanuwe. “Aiya.”a 2 Sosu ane etiri ta siyeye. Siyere! Fe hos wapo aꞌi ta siye aniye. Meni ta fe lo ape meꞌiyeni hire onuteye. Ereti lo sahe inapi ta aniteye. Meni ta le maꞌe meni owane tutawe lo mato tuhe ta ani asiyei ne auwe. Sosu lowesi iteye su, ai atuwei ne toteye. Lowesi ai lu werese ape mo aine na araroteye.3 Sosu fe sipsip lo yene me unere lo fito nemeroru ani erau fiyariye su, ane etiri norohu nemeroru peri ta wanuwe. Le apou eiye, “Aiya!” 4 Sosu fe hos tereꞌe ta teirai. Tahe lo farufaru aꞌi yehe loꞌu wou aꞌi ne. Meni ape fe hos lo meꞌiyeni hire sahe onuteye ape, le kairefi pefine aꞌi iroteye. Lowesi iteye su, marepi fetane aꞌi omo omo pani werese sahe sasari poꞌutenamiteye. Ereti lo sahe meneꞌe pite erasi aniteye. Lu werese tiyati maꞌe ai atu fiyarititeye su, lowe aine teraꞌeye.
5 Sosu fe sipsip lo yene me unere lo fito faforu ani erau fiyariye. Ane etiri hepene norohu faforu peri ta wanuwe. Le apou eiye, “Aiya!” Ane fe hos iwise aꞌi siye aniye. Meni ape fe hos meꞌiyeni hire sahe onuteye ape, ereti lo sahe niye opo hesi aꞌi aniteye.b 6 Sosu ane peri noꞌu ta etiri hepene norohu hesiyo hesiyo ponei sahe iroteye ape, wanuwe. Le apou eiye, “Lau teriteyei nowe henerairowa. Lowe wiyawi esi ere mo sine taꞌaneye apou aꞌi neriwei henerairowa. Sosu lowe maꞌaru tewi aꞌi aniyei. Serai lowe ayei tewi aꞌi eterowa. Ahowa, ne me oliv, sosu wain saꞌi wafei owe ape au luwaruwere. Lowe so wisere fa taꞌere.”c
7 Fe sipsip lo yene me unere lo fito ororu ani erau fiyariye su, ane peri noꞌu, etiri hepene norohu aꞌi peri erasi uteye ape, wanuwe. Le apou eiye, “Aiya!” 8 Ane fe hos wareme aꞌi ape siye aniye. Meni ape fe hos lo meꞌiyeni hire sahe onuteye ape, iyape lo aiwawe aꞌi temeniyeyei meni. Sosu meni tereꞌe ta iyape, “Awei Fisiye Yo,” le maꞌe moꞌo umasiteye. Owane Sitewi lai lowesi maꞌe kairefiyeyei auwe. Lowesi omo omo pani fiyari iteye su, lowesi lu taune tomu neꞌese ape weneri hesiyo hesiyo apou aiwawe au hese ereiye. Weneri taꞌi ta, lowesi lai lu taune werese aine teraꞌeye. Lu tewi tamo meneꞌe se aine tou ereye. Lu tewi tamo lau lai temeniye ereye. Lu tewi tamo u tahe se temeniye ereye. Sosu lu tewi tamo you erawe lai lowe tomu teraꞌe ereye. Serai lu taune weneri taꞌi ape mo werese sahe temeniye poꞌuteye.d
9 Sosu fe sipsip lo yene me unere lo fito erenawe ani erau fiyariye su, ane lu taune lo hepene wari ape unahi sahe, lowe aine teraꞌeye ape, lo hepene wari ape unahi sahe iroteyei, siyeye. Lu taune ape mo Owane Sitewi lo peri au teꞌe fiyariteye su, sosu yo seni waraꞌi aꞌi lo au atuatu fiyariteye su, lu tereꞌe tamo lowe werese aine teraꞌeteye. 10 Lowe werese peri erasi se apou uteye, “Nowe eiwerou su, Meni Owane kairefi aꞌi, ne ninawe ninawetorowa awere? Ne waraꞌi pefine aꞌi ne. Peri werese no wiyeme pefine aꞌi ne. Eiwerou su ne lu ape mo maꞌe, nomo aine teraꞌeteye ape, itiyaꞌu aine teraꞌerowa awere?” 11 Sosu Owane Sitewi lai lowe werese maꞌe taꞌi taꞌi aꞌi ipari tahe wapo pitase aꞌi au ani asiteye. Le lowe maꞌe eiye, “Fene nowe oso aꞌi fa tei ninawete. Lu taune tereꞌe tamo peri ano tote umasiteye ape, lowe lu tewi ano aine teraꞌe temeniye ape mo, tepaꞌasiyei su, ane faraꞌu fene ne lowe maꞌe itiyaꞌu aine teraꞌe ererowa.”e
12 Sosu aꞌi pe fe sipsip lo yene me unere lo fito moruwene ani erau fiyariye. Sosu ane awe erasi aꞌi awei sahe tei auseriye siyeye. Poweiye ape pasi wou henerai. Ipari tahe papaꞌu aꞌi fe meme lo towe taꞌaneteye ape, wou aꞌi ne. Yame ape loꞌu farufaru aꞌi henerai, fisaꞌi wou aꞌi ne.f 13 Eiwariyemi tamo hi awei sahe winetai ereye, me owarape so wou aꞌi ne. Fiyaru aiyeyei su, me owarape so pereꞌe ape mo werese lirine winetai ereraisiya.g 14 Sosu niꞌarawe perati fiyari poꞌuteye apou wou meni ta hawaiye towe ani noweritiye. Sosu omo pani werese sosu omo kemere lowe werese omo sitewi lowe lo ape arunatiyewe, fiyari howeiye.h 15 Lu owane tutawe werese, yaꞌariyei lu owane werese, ai lu lo lu owane werese, lu kairefi aꞌi werese, lu yahowaꞌi werese, sosu lu taune tereꞌe tereꞌe, lowe werese omo erasi lo tapiye patewi papu onu fareyare ereye. Sosu tapiye erasi ape papu lowe onu fareyare ereye.i 16 Lowe omo tapiye mo maꞌe apou uteye, “Tapiye omo, Fene winetaira! Nomo sahe napetu fareyarera. Nomo Owane Sitewi lo nihari, me toꞌu tutawe sahe onusiya ape ne, atoweiyesiya. Aiwawe fene fe sipsip lo yene lo ai marepi ape ne, nomo maꞌe napetu fareyarete.”j 17 Nowe ape se ai marepi erasi aꞌi lowesi lo lu taune werese maꞌe henerai tepaꞌasirowa. Ai marepi lowesi lo ape lu taune ape mo piye sahe tei kairefiye uwateyerowata.k