Jon one towe ta, ti tawesiteye ape, siyeye.
5
Sosu aꞌi pe ane, meni ape me tutoꞌu tutawe sahe onuteye ape, siyeye. Ereti eyate feni lo sahe one towe ta aniteteye. One towe ape feni se feni se peri tamo leseteyei siyeye. Me unere lo fito ereti fene werese feni hesi aꞌi (7) one towe ape nate tawesiteye.a 2 Sosu ane Owane Sitewi lo ipari wisere kairefi aꞌi ta siyeye. Le peri erasi apou uteye. “Piye meni wisere waraꞌi aꞌi lai faraꞌu me unere lo fito ape ani eraurowa awere? Sosu eiwerai one towe eite siye teꞌeyei ne tosorowa awere?” 3 Ahowa, lu werese omo hire maꞌe irosiya ape, sosu hi awei saro irosiya ape, sosu hi awei papu irosiya ape, lu werese werese me unere lo fito ani eraurowata. Lowe peri ape mo eiwerou siye teꞌerowata. 4 Sosu lowe meni wisere waraꞌi aꞌi ta siye nehiteye su, lowe meni wisere waraꞌi aꞌi siye taꞌame. Ahowa, lowe werese one towe ape papu siye teꞌeyei ne ani toso eraurowata. Serene ane luwei erasi aꞌi iroteye. 5 Yaꞌariyei meni owane ta ane maꞌe eiye. “Luwei sawa!” Meni kairefi aꞌi ta niyene lo iyape Laion, Juda lo lu feni maꞌe henerai. Le aꞌi lai meni Owane Devit lo yaꞌariyei lu tewi pefine aꞌi ne. Meni kairefi aꞌi ape yo seni luwaru aꞌi ape mo atu ani ararowe. Serai meni ape one towe ape lo me unere lo fito, nateteye ape, faraꞌu erau tosorowa. Le faraꞌu me unere lo fito ereti feni werese feni hesi aꞌi (7) ani toso eraurowa.b6 Sosu me tutoꞌu tutawe sosu etiri norohuwe hesiyo hesiyo, sosu yaꞌariyei lu meni ta werese ereti hesiyo hesiyo, ponei sahe iroteye ape, ane fe sipsip lo yene saro teiteyei siyeye. Fe sipsip lo yene ape, iyape Jisas, lu tamo tu naifa le aine teraꞌeye. Ahowa, Owane Sitewi lai le marepi hepene si tame taꞌane norohuwe sineye. Fe sipsip lo yene mato sahe paꞌare ereti feni werese ereti feni hesi aꞌi henerai. Nihe ereti feni werese feni hesi aꞌi (7) mato lo sahe iroteye. Nihe ape mo lowe Owane Sitewi lo ipari ereti feni werese feni hesi aꞌi ne (7). Owane Sitewi lai lowe omo omo werese maꞌe eimawe fiyarisawi.c 7 Sosu fe sipsip lo yene ape, le meni maꞌe, me tutoꞌu tutawe sahe onuteye ape, faiyewe, one towe ape ereti eyate feni lo aniteteye ape, aniye. 8 Sosu le one towe ereti se aniteye su, etiri norohu hesiyo hesiyo ape mo, sosu yaꞌariyei lu owane meni tawerese ereti feni hesiyo hesiyo (24), lowe fe sipsip lo yene maꞌe lowe uporo apeꞌi onuwe. Lowe werese etiri ta wafei se irapaneteye ape noꞌu wisere aꞌi henerai. Lowe etiri ape mo ereti sahe aniteteye. Sosu lowe siye auwe, tapiye gol taꞌaneteye ape, aiwawe ereti se aniteteye. Siye auwe ape mo papu me mari towe sahe temeꞌeriyeyei siyeye. Me mari towe yehe tiyei su itomu heneri wisere aꞌi hire maꞌe aroweteye. Yehe itomu ape apou wou Owane Sitewi lo lu taune ne teꞌe towerisiya.d 9 Lowe omoyawi heꞌi aꞌi sinesiya, apou teꞌesiya.
“Ne meni owane waraꞌi aꞌi ne. Ne faraꞌu one towe ape lo me unere lo fito, nate tawesiye ape, faraꞌu erau toso fiyarirowa. Tu naifa lu tamo ne aine teraꞌeye. Sosu lowe ne aine teraꞌeye su, fisaꞌi no lu taune werese ne si ete hene aniye. Lu taune ape mo Owane Sitewi lo lu taune pefine henerai. Lu taune omo omo werese maꞌe ete hene aniye. Lu taune peri tereꞌe tereꞌe se ape mo ete hene aniye. Lu taune tahe tereꞌe tereꞌe se ape mo maꞌe ete hene aniye. Sosu lu taune niyene werese ape mo maꞌe ete hene aniye.e
10 Owane Sitewi lai lowe werese lu tewi pefine lo heneraiyei ne irowe. Lowe lu taune owane heneraiyei su, lowe Owane Sitewi lo wiyawi taꞌanenamiteye. Sosu lowe lu taune omo omo werese au noweinoweinamirowa.”f
11 Sosu ane siyeteyewe, Owane Sitewi lo ipari wisere tomu neꞌese me tutoꞌu tutawe yose aperayeteyei siyeye. Lowe etiri norohu ereti feni hesiyo hesiyo, sosu yaꞌariyei lu owane, meni ta werese ereti feni hesiyo hesiyo (24) yose aperayeteye. Ane peri noꞌu erasi aꞌi lowe lo wanuteye. Sitewi lo ipari wisere ape mo owe meni ta lowe nawiterowata.g 12 Lowe peri erasi aꞌi apou uteye,
“Fe sipsip lo yene waraꞌi pefine aꞌi ne. Lu tamo le aine teraꞌeye. Ne kairefi sitewi aꞌi ne. Ne meni iyape erasi aꞌi ne. Ne etiri werese lo sitewi aꞌi ne. Sosu ne marepi wisere pefine aꞌi ne. Nomo iyape no maꞌe ei ani arowesiya. Nomo ne maꞌe au wisereyenamisiya. Ahi nomo lo ne maꞌe au teꞌe nineꞌisiya.”
13 Sosu ane etiri werese Owane Sitewi lo omo hire maꞌe, sosu etiri omo omo pani pani irosiya ape mo, sosu etiri werese awei unahi papu irosiya ape, sosu etiri werese saꞌi saꞌi sahe irosiya ape mo, ane lowe werese omoyawi ta apou teꞌeteye ape, wanuwe. “Meni Owane Sitewi me tutoꞌu tutawe sahe onusiya ape, fe sipsip lo yene aiwawe aꞌi, nomo lowesi maꞌe mi mi pasi pasi weriyei peri wisere aꞌi au teꞌe nineꞌinamisiya. Nomo iyape pefine aꞌi lowe lo ei ani arowenamisiya. Nomo lowesi ne au teꞌe wisereye nineꞌinamisiya. Lowesi kairefi pefine aꞌi ape weriyei weriyei ironamisiya.” 14 Sosu etiri norohuwe aꞌi hesiyo hesiyo lowe apou teꞌeye. “Peri werese ape mo wiyeme pefine aꞌi ne.” Sosu yaꞌariyei lu owane meni ta werese hesiyo hesiyo (24) lowe lowesi maꞌe lowe uporo maꞌe apeꞌi onuteyewe, lowesi maꞌe peri wisere aꞌi au teꞌe nineꞌiteye.