Jon lai Owane Sitewi lo omo, hire sahe irosiya ape, siyeteye.
4
Sosu moꞌo aꞌi pe Owane Sitewi lo omo hire maꞌe irosiya ape, ane yo tosowei siyeye. Sosu peri ape tutawe ane wanuteye ape, erasi kairefi aꞌi ane maꞌe meneꞌe mapefuwe wou uteteye. “Ne ane maꞌe sato wira! Ane etiri tomu neꞌese, moꞌo henerairowa ape, ne maꞌe au atuaturowa.”a 2 Witane aꞌi Owane Sitewi lo Hepene Waraꞌi aꞌi marepi ano maꞌe wirai. Sosu siyere! Ane Owane Sitewi lo me tutoꞌu tutawe omo hire sahe saro siyeye. Meni ta me tutoꞌu ape sahe onuteye.b 3 Sosu meni ape me tutoꞌu ape sahe onuteye ape, hepene nihari lo mitaiyeyei apou ape wou aꞌi ne. Mitaiyeyei lo ape tapiye norohuwe wou aꞌi ne. Sosu tapiye loꞌu aꞌi wou aꞌi ne. Haru saꞌi erasi aꞌi ape me tutoꞌu tutawe ape maꞌe yosetiteye. Haru saꞌi lo mitaiyeyei ape tapiye motowe norohu wou aꞌi ne.c 4 Me tutoꞌu oso aꞌi ape mo meni ta werese ereti saꞌonare hesiyo hesiyo (24) me tutoꞌu tutawe ape onu yose atatiteye. Me tutoꞌu ape mo sahe yaꞌariyei lu owane meni ta werese ereti saꞌonare hesiyo hesiyo (24) saro onuteye. Lowe ipari tahe wapo aꞌi lowe lo ani asiteye. Sosu ane lowe meni tutawe lo mato tuhe tapiye gol se taꞌane ape, mato lowe lo sahe ani asiteye siyeye.d 5 Pesiyei meraꞌo mi ape tewiye tewiye maꞌe me tutoꞌu tutawe maꞌe heneraiteye. Noꞌu erasi ape nowe maꞌe fiyari howeiteye. Me tutoꞌu tutawe lo nihari sahe yehe erei ereti feni werese ereti feni hesi aꞌi (7) tei mitaiyeteye ape, saro teiteye. Yehe erei ereti feni werese ereti feni hesi aꞌi ape mo, lowe Owane Sitewi lo Hepene Waraꞌi aꞌi ereti feni werese feni hesi aꞌi ne.e 6 Sosu aiwawe me tutoꞌu tutawe lo nihari sahe hare ite erasi saro howeiteye. Hare ite ape apou wou glas taꞌaneteye. Saꞌi ape aseyaro waraꞌi aꞌi ne.Ponei saro iroteye ape, etiri hepene norohu aꞌi hesiyo hesiyo me tutoꞌu tutawe lo nihari sahe iroteye ape, lowe nihe tomu neꞌese mato meꞌiyeni sahe sosu tu nihari sahe iroteye.f 7 Etiri hepene norohu aꞌi neme you erawe erasi lo nihari wou iroteye. Etiri hepene norohu aꞌi nemeroru fe bulmakau lo nihari wou iroteye. Etiri norohuwe faforu meni nihari wou iroteye. Etiri hepene norohu aꞌi ororu ape irowe yaruwapi lo nihari sine fiyariteye. 8 Etiri hepene norohuwe aꞌi werese ape mo irowe haipi ereti feni werese feni taꞌi aꞌi (6) iroteye. Tahe paꞌare werese lowe lo nihe tomu neꞌese iroteye. Irowe haipi unahi nihe tamo aiwawe aꞌi iroteye. Mi mi pasi pasi lowe peri ape apou utenamiteye, “Waraꞌi! Waraꞌi! Waraꞌi aꞌi ne! Owane Sitewi pefine waraꞌi aꞌi tene! Tu naifa nowe sitewi weriyei se le saro ironamiteye. Sosu pereye nowe eite se, le saro ironamisiya. Sosu nowe yeꞌewi se le saro ironamitorowa.”g
9 Etiri hepene norohu aꞌi ape mo Owane Sitewi maꞌe marepi wisere aꞌi au teꞌeyei su, lowe iyape lo ei ani aroweyei su, sosu peri wisere aꞌi au uteyei su, 10 Yaꞌariyei lu owane ape mo meni ta werese ereti saꞌonare hesiyo hesiyo (24) Owane Sitewi maꞌe me tutoꞌu tutawe onuteye ape, lowe uporo apeꞌi onuteyewe, le maꞌe au teꞌe wisereyenamisiya. Owane Sitewi lai mi mi pasi pasi weriyei ironamitorowa. Sosu lu ape mo lowe mato tuhe towafi lowe lo ape ani tahe aniyewe, me tutoꞌu tutawe ape sahe lotowe. Lowe apou teꞌeye,h
11 “Ne Meni Owane Tutawe Pefine aꞌi ne. Ne Meni Owane Pefine aꞌi, Owane Sitewi nomo lo ne. Lu taune werese ne maꞌe fa au nineꞌinamite. Nomo iyape no maꞌe weriyei weriyei ei ani arowete. Kairefi no se lowe ne maꞌe au wisereyenamite. Ne aꞌi lai etiri werese au taꞌane henerai. Marepi no se etiri werese iroteye. Ne aꞌi lai marepi hepene norohu aꞌi lowe maꞌe auwe.”