Meni ape Owane Sitewi lo ipari wisere aꞌi ereti feni werese feni hesi aꞌi (7) au ironamisiya ape, sosu eiwariyemi ereti feni werese feni hesi aꞌi (7) ereti lo sahe anitesiya ape, le lowe maꞌe au teꞌesiya.

‘Ane wiyawi, fene taꞌanesiya ape, siye soꞌoruwesiya. Lu taune yo seni fene lo siyesiya su, lowe fene ne apou totesiya. Fene marepi hepene norohuwesiya. Ahowa, fene marepi hepene fene lo temeniyeye. Fene yo seni ano umasi taꞌame.^a

2 Serai fene nihe petanere. Etiri aseyaro aꞌi, fene irosiya ape, au kairefiyere. Etiri aseyaro werese ape mo temeniyeyei ne ataheyewa. Ane yo seni fene lo siye etiteyewe, fene maꞌe eisiya. Owane Sitewi ano lo nihe se, fene yo seni luwaru aꞌi ironamisiya.

3 Serai peri wisere aꞌi, fene tu naifa wanuwe ape, fene peri werese ape mo tote anite tawesire. Fene yo seni luwaru aꞌi fene lo meꞌiyeni maꞌe atati arunatire. Fene nihe petane taꞌame su, ane fene maꞌe witane se fareyare aꞌi aiyerowa. Taꞌarei meni wou pasi eresene aꞌi aiyerowa. Ane fene maꞌe itorairowa su, nowe ape se fene soꞌoru taꞌama. ane fene maꞌe aiyeyei su, ane fene maꞌe fofowei erasi aurowa.^b

4 Ahowa, lu taune tamo, peri ano umasisiya ape, Omo Sadis sahe irosiya ape, lowe yo seni luwaru aꞌi tamo iro taꞌame. Aiwawe aꞌi ipari tahe lowe unou se taꞌama. Serai yo seni lowe lo waraꞌi wisere aꞌi iroteye su, lowe faraꞌu ipari tahe wapo ani asirowawe, ane mase aiwawe uweinamirowa.^c

5 Lu taune yo seni luwaru aꞌi hi ani araronamirowa ape, ane lowe maꞌe ipari tahe wapo wisere aꞌi tamo au ani asirowa. Ane iyape lowe lo one towe norohuwe, iroteye ape sahe, irosiya ape, au sasarirowata. Sosu ane iyape lowe lo tai ano maꞌe au teꞌe areiyerowa. Sosu Owane Sitewi lo ipari wisere aꞌi ape maꞌe aiwawe aꞌi iyape lowe lo au teꞌe areiyerowa. Ane lowe maꞌe apou eirowa. Lu taune ape mo ane ne umasinamiteye.^d

6 Owane Sitewi lo Hepene Waraꞌi aꞌi lu taune, Owane Sitewi lo peri ape mo maꞌe, tote tawesinamisiya ape, au teꞌe fiyarisiya. Fene werese peri lo ape wanu umasite.’

Iyape ano Jisas. Yo seni werese ano, waraꞌi pefine aꞌi ne. Sosu peri werese ano ape pefine aꞌi ne. Ane lai Devit lo wesi tepaiyei yo sahe teinamisiya. Ane tepaiyei ape metete maꞌe ani awetowe su, lu tereꞌe eiwerou meꞌiyeni maꞌe ani awetorowata. Sosu aiwawe aꞌi ane tepaiyei ape meꞌiyeni maꞌe ani awetowei su, lu tereꞌe eiwerou metete maꞌe ani awetorowata. Ane peri ape fene maꞌe apou teꞌesiya.^e

8 Ane yo seni fene lo siye soꞌoruwe areiyesiya. Wanure! Ane fene ne yo tepaiyei ape metete maꞌe ani awetowe. Sosu lu tereꞌe tamo yo tepaiyei ape meꞌiyeni maꞌe ani awetorowata. Fene werese iyape se taꞌama. Fene peri ano weriyei tote umasinamisiya. Fene iyape ano meꞌiyeni maꞌe atati aru taꞌame.^f

9 Wanure! Lu taune sepei Satan lo marepi tote umasisiya ape, lowe apou teꞌeye, nomo Juda lo lu tewi pefine aꞌi ne. Ahowa, lowe peri wawero aꞌi ne. Wanure! Ane lu tewi ape mo fene maꞌe lowe uporo apeꞌi onuwei ne irorowa. Serai lowe apou siye soꞌoruwerowa. Ane lai fene marepi erasi aꞌi tote wawesiyenamisiya.^g

10 Fene peri pefine ano mi mi weriyei tote tawesi umasinamiteye su, ane tote tawesiyei fene lo au kairefiyerowa. Etiri luwaru aꞌi fene maꞌe heneraiyei su, ane fene ne au noweinoweirowa. Etiri luwaru aꞌi ape mo lu taune werese werese maꞌe nowe iꞌero ataheyewa. Etiri luwaru orese aꞌi heneraiyei su, lowe marepi hepene lowe au luwaruweyei. Serai fene etiri luwaru aꞌi lo au luwaruweyei. Serai fene etiri luwaru aꞌi ape mo teriterowata.^h

11 Wanure! Ane fene maꞌe witane aꞌi aiyerowa. Serai fene ane ne tote tawesinamite. Fene ane ne tote tawesisiya su, lu tereꞌe tamo hepene norohu heꞌi aꞌi fene lo taꞌarei anirowata.

12 Lu taune yo seni luwaru aꞌi hi ani araronamirowa ape, ane lowe Tai ano Owane Sitewi lo wesi tutawe lo wesi me tou wou au teirowa. Serai lowe mi mi weriyei Owane Sitewi lo wesi tutawe teinamirowa. Ane Owane Sitewi ano lo iyape pefine aꞌi lowe sahe leserowa. Sosu ane Owane Sitewi ano lo omo lo iyape, Jerusalem heꞌi aꞌi, Owane Sitewi maꞌe itorairowa ape, lowe sahe leserowa. Sosu ane iyape heꞌi aꞌi topo ano lowe sahe leserowa.ⁱ

13 Owane Sitewi lo Hepene Waraꞌi aꞌi lu taune, Owane Sitewi lo peri ape mo maꞌe, tote tawesinamisiya ape, au teꞌe fiyarisiya. Fene werese peri lo ape wanu umasite.”

Ane meni ape apou eisiya. Pefine aꞌi ne. Ane Owane Sitewi lo peri pefine mi mi weriyei au teꞌe areiyenamisiya. Etiri werese werese, Owane Sitewi taꞌaneye ape, ane lai sitewi aꞌi ne. Ane fene maꞌe teꞌesiya.

15 Yo seni werese fene lo irosiya ape, ane siye soꞌoruwesiya. Fene tapiye herito ai wou taꞌama. Aiwawe aꞌi fene tapiye naretei wou taꞌama. Marepi toteyei ano fene ne apou aꞌi ne. Fene tapiye herito wou aꞌi fa irote. Fene tapiye naretei wou aꞌi fa irote. Tote tawesiyei fene lo tewi pa tewi oso aꞌi totesiya.^j

16 Fene herito, naretei oso aꞌi aiwawe irosiya. Fene herito erasi taꞌame su, sosu fene naretei erasi taꞌame su, ane lai fene werese ahi ano maꞌe au orisawirowa.

17 Fene apou teꞌesiya. Ane etiri maꞌaru erasi se ne. Nomo etiri tamo ariye iro se taꞌame. Ahowa, fene marepi hepene towafi fene lo soꞌoru taꞌama. Fene lu luwaru aꞌi ne. Fene lu afofo aꞌi ne. Fene maꞌaru etiri se taꞌama. Fene nihe pokoweyei lu taune ne. Fene liye paꞌare ariye aꞌi ne.^k

18 Ane fene maꞌe kairefi se au teꞌesiya. Tapiye gol yehe sahe leiye su, ape wisere pefine aꞌi henerairowa. Fene tapiye gol ano ape eteraire. Fene tapiye gol ano eteyei su, fene lu taune maꞌaru etiri erasi aꞌi henerairowa. Fene ipari tahe wapo aꞌi ano eite eteraire. Fene ipari tahe ano eite eterowawe, sosu ani asirowa su, fene liye paꞌare fene lo ani asi fareyarerowa. Serai fene neritase teriterowata. Fene nihe maresin anirowawe, nihe sahe ani teinere. Fene nihe fene lo nihe maresin ani teineyei su, fene etiri werese siye areiyerowa.^l

19 Lu taune werese ane ne marepi erasi aꞌi tote wawesiyesiya ape, lowe yo seni luwaru aꞌi irowei su, ane lowe ne ai marepi totesiya. Sosu ane yo seni luwaru aꞌi lowe lo au ani fareraiyesiya. Serai fene tote tawesiyei fene lo tote uwateyenamite. Fene yo seni luwaru werese aꞌi ape mo meꞌiyeni maꞌe atati tei arunatite.^m

20 Wanure. Ane marepi hepene lo yo sahe teisiyawe, yo tewiye sahe aine taꞌarusiya. Ane lowe maꞌe peri utesiya. Lu taune tamo peri ano wanurowawe, marepi hepene lowe lo tosowei su, sosu ane marepi hepene lowe lo papu wirowa. Sosu ane lowe maꞌe aiwawe aꞌi isafiye tiyatinamitorowa.ⁿ

21 Lu taune yo seni luwaru aꞌi hi ani araronamirowa ape, ane lowe me tutoꞌu tutawe ano ape sahe ane mase onuwei ne au irorowa. Apou aiwawe aꞌi tu naifa ane lai etiri werese hi ani araroteye. Sosu ane tai ano me tutoꞌu sahe le aiwawe aꞌi onunamisiya. Meni Owane Pefine aꞌi lai peri eite ane maꞌe au teꞌeye.

22 Owane Sitewi lo Hepene Waraꞌi aꞌi lu taune, Owane Sitewi lo peri tote tawesinamisiya ape, mo maꞌe au teꞌe fiyarisiya. Fene werese peri lo ape wanu umasite.”