Meni ape eiwariyemi ereti feni werese feni hesi aꞌi (7), ereti eyate feni sahe anitesiya ape, meni ape yehe erei lo wari oso oso aꞌi, tapiye gol se taꞌane ape, wari oso oso aꞌi ereti feni werese feni hesi aꞌi (7) ponei sahe uweisiya ape, meni ape apou au teꞌe areiyesiya.^a

2 Ane wiyawi werese fene lo siye soꞌoruweye. Fene Krais lo peri umasiteye su, fene fofowei erasi teriteteye. Etiri luwaru aꞌi fene maꞌe heneraiteye su, mi mi werese tote tawesiyei fene lo kairefi aꞌi teinamiteye. Lu luwaru werese aꞌi wiyawi luwaru aꞌi lowe lo iroteye su, fene lowe meꞌiyeni maꞌe atati aruteye. Lu tamo apou au teꞌeteye su, ‘Nomo Owane Sitewi lo au teꞌe siye lu pefine aꞌi ne.’ Fene wiyawi lowe lo siye etiteye. Ahowa, lu ape mo peri areare teꞌeteye. Lowe Owane Sitewi lo yo seni waraꞌi aꞌi umasi te taꞌame. Lowe lu areareyei aꞌi ne. Ane fene yo seni ape iroteye ape siye soꞌoruweye.^b

3 Fene mi mi weriyei kairefi teinamiteye. Fene peri ano tote tawesi umasinamiteye su, fene fofowei erasi teriteye. Serai fene ane meꞌiyeni maꞌe atati aru taꞌame.

4 Ahowa, ane yo seni taꞌi aꞌi fene lo ai marepi tote teꞌesiya. Tu naifa fene Krais lo peri wanu tote tawesi umasiteye su, fene Krais, sosu lu feni werese lo ne marepi erasi aꞌi tote wawesiyeteye. Ahowa, pereye nowe eite se fene Krais ne marepi tote wawesiyeyei ape tote iꞌanesiya.

5 Yo seni ape fene lo tote tawesi etite. Fene marepi wawesiyeyei ape Krais fene maꞌe au atuatuteye ape, arunatiteye. Serai fene yo seni luwaru aꞌi ape meꞌiyeni maꞌe atati arute. Yo seni waraꞌi aꞌi fene tu naifa iroteye ape, fene yo seni waraꞌi apou ape aꞌi tame atati ironamite. Fene yo seni luwaru ape meꞌiyeni maꞌe atati aru taꞌame su, ane fene maꞌe aiyerowawe, ane yehe wari fene lo eiro maꞌe teiteye ape, sosu ani tareꞌesawiyei. Sosu fene werese yehe omo maꞌe irowa.^c

6 Ahowa fene yo seni taꞌi wisere aꞌi irosiya. Yo seni luwaru aꞌi lu taune meni Nikolas umasisiya ape, fene ai marepi totenamisiya. Ane aiwawe aꞌi yo seni luwaru aꞌi lowe lo ai marepi totenamisiya.

7 Owane Sitewi lo Hepene Waraꞌi aꞌi lu taune maꞌe Owane Sitewi lo peri tote tawesinamisiya ape mo, maꞌe au teꞌe fiyarisiya. Fene werese peri lo ape wanu umasite. Lu taune yo seni luwaru aꞌi ani araronamirowa su, ane lowe maꞌe meso fi wisere aꞌi, hepene norohuwe iroteyei ape, au arowa. Me ape Owane Sitewi lo taꞌaneyei awei hire maꞌe irosiya.”^d

Ane meni tutawe sosu ane meni nowe yeꞌewi se ironamitorowa. Tu naifa ane temeniyeye. Sosu ane pereye nowe eite se hepene norohu heneraiyewe, mi mi weriyei weriyei ironamitorowa.

9 ‘Etiri luwaru aꞌi fene teritesiya ape, ane siye soꞌoruwesiya. Fene maꞌaru etiri werese ariye aꞌi ne. Ahowa, fene Owane Sitewi lo etiri tomu neꞌese irosiya. Lu taune tamo lai apou teꞌesiya, Nomo Juda lo lu tewi aꞌi ne. Ahowa, lowe fene maꞌe peri luwaru aꞌi au teꞌe naruteye. Ahowa, lowe sepei Satan lo lu tewi aꞌi ne.^e

10 Nowe iꞌero aꞌi fene tamo fofowei erasi aꞌi teriteyei. Fene atoweiye sawa! Wanure. Sepei Satan fene tamo kalabus wesi maꞌe henetiyei. Le lowe ne siye soꞌoruweyei ne toteye. Tote tawesiyei lowe lo winetairowa awere? Serene fene poweiye ereti feni hesi aꞌi kalabus wesi maꞌe iroteyei. Mi mi weriyei tote tawesiyei fene lo ape tei kairefi uwateyeyei su, nowe ape se fene temeniyeyei ape, ane fene maꞌe etiri wisere aꞌi aurowa. Etiri ape apou aꞌi ne. Fene mi mi pasi pasi weriyei Owane Sitewi lo omo hire sahe ironamitorowa.^f

11 Owane Sitewi lo Hepene Waraꞌi aꞌi lu taune maꞌe Owane Sitewi lo peri tote tawesinamisiya ape mo au teꞌe fiyarisiya. Fene werese peri lo ape wanu umasite. Lu taune yo seni luwaru aꞌi ani araronamirowa su, tahe paꞌare weriyei lowe lo temeniyerowa. Sosu nowe yeꞌewi se, hepene lowe lo temeniyerowata. Lowe fofowei teriterowata.’”^g

Ane meni ipari meneꞌe ai se feni se feni se irosiya ape, fene maꞌe teꞌesiya.

13 ‘Omo ape, fene irosiya ape, ane soꞌoruwe tene! Omo ape sahe sepei Satan me tutoꞌu tutawe saro onusiya. Sepei Satan lu taune werese au noweinoweiyei ne totesiya. Ahowa, tote tawesiyei fene lo tei kairefi aꞌi ironamisiya. Fene iyape ano tote iꞌanenati te taꞌame. Fene ane ne meꞌiyeni maꞌe atati tei taꞌame. Meni ape Antipas, le peri ano au teꞌe areiye fiyarinamiteye su, le mi mi weriyei kairefi teinamiteye. Lowe meni ape Satan lo omo sahe aine teraꞌe temeniyeye. Ahowa, nowe ape se tote tawesiyei fene lo kairefi aꞌi ironamiteye.

14 Ahowa, etiri tamo ne, ane fene maꞌe ai marepi totesiya. Lu taune tamo fene ponei sahe irosiya ape, meni Balam lo marepi luwaru aꞌi ape, tote umasiteye. Tu naifa weriyei le meni tereꞌe iyape, Balak, maꞌe marepi topo lo au atuatuteye. Le lai Israel lo lu tewi maꞌe Owane Sitewi lo yo seni waraꞌi aꞌi ti tawesinamiteye. Lowe fe loꞌu, god wawero maꞌe au heseteye ape, sosu lowe maꞌe au ene ateye. Sosu tafaꞌe yo seni luwaru aꞌi irowei ne au teꞌeteye.^h

15 Lu taune tamo fene ponei sahe irosiya ape mo aiwawe aꞌi, lowe yo seni luwaru aꞌi apou ape tote umasinamisiya. Lowe meni Nikolas lo marepi ape tote tawesi umasiteye.

16 Serene fene yo seni luwaru apou ape fene meꞌiyeni maꞌe atati tote iꞌanete. Fene etiri luwaru ape meꞌiyeni maꞌe atati tote iꞌane taꞌame su, ane fene maꞌe witane aꞌi aiyerowa. Sosu ipari meneꞌe ai feni se feni se, ahi ano sahe hene-raisiya ape, ane fene maꞌe ai aturairowa.ⁱ

17 Owane Sitewi lo Hepene Waraꞌi aꞌi lu taune maꞌe Owane Sitewi lo peri tote tawesinamisiya ape, au teꞌe fiyarisiya. Fene werese peri lo ape wanu umasite. Lu taune yo seni luwaru aꞌi ani araronamirowa su, ane lowe maꞌe Owane Sitewi lo ene ayei fareyare tamo aurowa. Iyape mana. Ayei ape mo tote tawesiyei fene lo au kairefiyerowa. Ane lowe maꞌe tapiye wapo aꞌi ta aurowa. Tapiye ape sahe iyape heꞌi au leserowa. Lu taune werese werese iyape heꞌi ape soꞌoru taꞌama. Meni ape tapiye anirowa ape, le aꞌi iyape topo lo ape soꞌoruwerowa.’”^j

Ane, Owane Sitewi lo meni eime aꞌi ne. Nihe ano yehe mi erasi wou aꞌi ne. Lowe hesi ano ape loꞌu aꞌi ipari meneꞌe yehe sahe lei farufaruwe wou aꞌi ne. Ane fene maꞌe teꞌesiya.^k

19 Ane wiyawi fene lo, fene taꞌanesiya ape, siye soꞌoruwe tepaꞌasiye. Fene lu taune tereꞌe maꞌe marepi tote wawesiyeteye. Tote tawesiyei fene lo mi mi weriyei tei kairefiyeteye. Etiri orese aꞌi lu taune maꞌe henerai su, fene lowe au pati ferafereiteye. Etiri luwaru aꞌi fene maꞌe henerai su, fene mi mi weriyei tei kairefiyeteye. Wiyawi fene lo pereye nowe eite se wiyawi erasi pefine aꞌi ne. Sosu wiyawi fene lo, tu naifa taꞌane iroteye ape, oso aꞌi ne.

20 Ahowa, ane etiri ta ne fene maꞌe ai marepi totesiya. Menitani ta iyape Jesebel, fene yo seni luwaru aꞌi lo ape tote tawesi umasisiya. Le fene maꞌe apou teꞌesiya. ‘Ane Owane Sitewi lo peri au teꞌe siye menitani.’ Ahowa, menitani ape peri wawero aꞌi ne. Piyene fene menitani ape lo peri einami taꞌame awere? Le wiyawi lu taune ano marepi lowe lo tote aniteye. Serene lowe yo seni luwaru aꞌi ape umasisiya. Lowe tafaꞌe yo seni luwaru aꞌi ironamisiya. Sosu lowe god wawero maꞌe fe loꞌu au hesesiya su, lowe fe loꞌu ape ene aye.^l

21 Sosu ane menitani ape ne ninawe ninaweteye. Ahowa, menitani ape yo seni luwaru aꞌi lo meꞌiyeni maꞌe atati arunati taꞌama. Le tafaꞌe yo seni luwaru aꞌi arunati wou taꞌama.

22 Wanure! Ane menitani ape maꞌe u tahe erasi pefine aꞌi aurowa. Le fofowei erasi teritenamirowa. Lu tamo le maꞌe tafaꞌe yo seni luwaru aꞌi irowei ape, ane lowe maꞌe etiri luwaru aꞌi aurowa. Serai lowe menitani lo yo seni meꞌiyeni maꞌe atati aru taꞌame su, lowe fofowei erasi aꞌi teritenamirowa.

23 Sosu lu taune werese menitani ape lo yo seni luwaru ape umasinamiyei su, ane lowe werese maꞌe aine teraꞌe temeniyerowa. Serai lu taune Owane Sitewi lo peri umasisiya ape, lowe ane siye soꞌoruwerowa. Ane lu taune lo marepi sosu yo seni siye eti areiyesiya. Sosu fene yo seni apou ape irowei su, ane fene maꞌe taꞌi taꞌi aꞌi etiri orese aꞌi aurowa.^m

24 Ahowa, ane fene maꞌe eisiya, lu taune tereꞌe Omo Taitaira sahe irosiya ape, lowe yo seni marepi apou ape tote umasi taꞌame. Lowe sepei Satan lo marepi fareyare aꞌi wanu soꞌoruwe umasi taꞌame. Lu tamo Satan lo marepi ape ne apou aꞌi teꞌesiya, Satan lo marepi werese orese aꞌi ne. Serai ane fene maꞌe etiri orese tereꞌe aꞌi au taꞌame.

25 Serai marepi yo seni waraꞌi aꞌi fene irosiya ape, ane si tame aiyerowa su, fene etiri ape mo anite tawesinamite.ⁿ

26 Lu taune yo seni luwaru aꞌi hi ani araronamirowa ape, lu taune wiyawi waraꞌi aꞌi ano taꞌanenamirowa ape, nowe yeꞌewi se ane lowe maꞌe lu taune omo pani tewi tamo iroterowa ape, kairefi aꞌi se au noweinoweiyei ne aurowa.

28 Sosu ane lai eiwariyemi, esi pasi tei mitaiyerai ape, lowe maꞌe aurowa.^o

29 Owane Sitewi lo Hepene Waraꞌi aꞌi lu taune, Owane Sitewi lo peri tote tawesinamisiya ape, mo maꞌe au teꞌe fiyarisiya. Fene werese peri lo ape wanu umasite.”