Kamapim Tok Hait
Peri Fareyareyei Jisas Krais lai au Teꞌe Areiyeteye
Peri tutawe.
1
Tu naifa peri eite topo sahe iro fareyareteye. Owane Sitewi lai peri lo eite Jisas Krais maꞌe amerame aꞌi wiyawi lu yahowaꞌi maꞌe au teꞌe areiyeyei ne auwe. Etiri ape mo iꞌero aꞌi fa henerairowa ape ne, Jisas lai Owane Sitewi lo ipari wisere aꞌi ane Jon wiyawi yahowaꞌi maꞌe etiri werese ape mo au teꞌe areiyeyei ne eimawesai.a 2 Ane Jon Owane Sitewi lo peri pefine aꞌi ape siye areiyeye. Sosu ane Jisas Krais lo peri wanu areiyeye. Ane etiri werese ape mo siye areiyeye. Serai ane peri werese ape au teꞌe areiyesiya. Peri werese ape mo pefine aꞌi tene! 3 Etiri werese ape mo iꞌero aꞌi henerairowa. Serai lu taune tamo peri ape siye teꞌeyei su, lu taune tamo peri ape moꞌo henerairowa ape, wanuwei su, sosu lu taune peri ape one towe sahe irosiya ape, tote tawesi umasiyei su, lowe marepi wisere aꞌi au nineꞌirowa.bJon Krais lo lu feni maꞌe au teꞌe eritesawi.
4-5 Lu taune Owane Sitewi lo peri wanu umasiteye ape mo maꞌe omo ereti feni werese feni hesi aꞌi pani Esia sahe irosiya ape, ane Jon, one towe eite fene maꞌe lese ausawisiya. Owane Sitewi lai nowe sitewi weriyei ironamiteye. Sosu pereye nowe eite se le ironamisiya. Sosu nowe meꞌiye weriyei ironamitorowa. Owane Sitewi lo Hepene Waraꞌi aꞌi ne, le Hepene Waraꞌi aꞌi ereti feni werese feni hesi aꞌi aiwawe wou aꞌi ne.c Le mi mi pasi pasi weriyei Owane Sitewi lo nihari sahe me tutoꞌu sahe onunamitorowa. Sosu Jisas Krais, lowe marepi ferafereiyei, sosu marepi fetane aꞌi fene maꞌe ausawisiya. Jisas Krais mi mi weriyei Owane Sitewi lo peri pefine aꞌi au teꞌe fiyarinamisiya. Le temeniyeye su, Owane Sitewi lai le si tame taꞌane norohuwe sineye. Le meni tutawe Owane Sitewi lai le fisiye papu si taꞌane norohuwe sineye. Le lu owane tutawe, awei sahe iroteye ape mo, au noweinoweinamisiya. Serai nomo le ne marepi erasi aꞌi au teꞌe wisereye nineꞌinamite.
Le nomo ne tote wawesiyenamisiya. Le temeniyeyewe, fisaꞌi lo tahe paꞌare lo maꞌe teroso arosai su, fisaꞌi lo ape yo seni luwaru werese aꞌi nomo lo au hese sasariye.d 6 Serai nomo le ne tote tawesiteye su, le nomo omo pani lo hire maꞌe irosiya ape, hene ani wirowa. Sosu nomo le mase etiri werese au noweinoweinamitorowa. Nomo Owane Sitewi lo wesi lu owane pefine aꞌi henerai. Owane Sitewi lai Jisas lo aite pefine aꞌi ne. Serai le nomo wiyawi lo fa taꞌaneyei ne ariariyeye. Mi erasi pefine aꞌi lo, sosu kairefi erasi lo le maꞌe ironamitorowa. Serai nomo le maꞌe marepi erasi aꞌi au teꞌe nineꞌinamite.e
7 Fene werese siyere! Le aitu sapu ponei mase itorairowa. Le si itorairowa su, lu taune werese pani pani irosiya ape mo, le siye anirowa. Lu ape mo le me tapeꞌi sahe aine tawere teraꞌeye ape, lowe aiwawe aꞌi le siye anirowa. Lu taune pani pani werese sahe irosiya ape, le ne lu ewiterowa. Etiri werese ape mo pefine aꞌi henerairowa. Pefine aꞌi tene!f
8 Ane Owane Sitewi, ane Meni Owane Pefine aꞌi lai apou teꞌesiya, “Ane nowe sitewi weriyei ironamiteye, Sosu ane pereye nowe eite se ironamisiya, sosu ane nowe meꞌiye su weriyei weriyei ironamitorowa. Ane meni tutawe, sosu ane meni nowe yeꞌewi aꞌi ne. Ane kairefi werese erasi pefine aꞌi ne.”
Jon lai Krais suwou se siyeye.
9 Ane Jon, kaiyemo fene lo, ane fene aiwawe aꞌi Jisas lo peri tote tawesi umasinamisiya. Nomo werese etiri luwaru orese aꞌi teriteteye. Aiwawe aꞌi nowe meꞌiye su nomo werese Owane Sitewi unahi onurowawe, sosu le nomo werese au noweinoweinamitorowa. Nomo, nowe henerairowa ape, ne ninawenamitorowa. Ane Owane Sitewi lo peri, sosu Jisas lo peri pefine aꞌi lu taune maꞌe au teꞌe areiyeteye su, ai lu tamo ane omo kemere Patmos sahe kalabus wesi henetai. 10 Nowe tutawe ape se, Sande, Owane Sitewi lo Hepene Waraꞌi aꞌi ape marepi hepene ano papu wirai. Ane peri uteyei noꞌu erasi aꞌi meꞌiyeni maꞌe wanuwe. Peri noꞌu erasi ape lai piteꞌe meneꞌe mapefuwe noꞌu erasi wou aꞌi fateye. 11 Peri uteyei noꞌu ape apou teꞌeye, “Etiri werese ape mo, ne siyeyei ape, one towe sahe au lesere. Ne one towe sahe lese tepaꞌasiyei su, ne lu taune maꞌe Owane Sitewi lo peri tote tawesi umasiye ape mo, omo ereti feni werese feni hesi aꞌi irosiya ape ausawire. Ne one towe ape omo Efesus, omo Smerna, omo Pergamum, omo Taitaira, omo Sadis, omo Filadelfia, sosu omo Leodisia maꞌe irosiya ape, ausawire.”
12 Sosu aꞌi pe ane peri uteyei noꞌu ape wanuwe su, ane peri ape siyeyei ne atati tei awetowe. Ane atati tei awetowe su, ane wari oso oso aꞌi ereti feni werese feni hesi aꞌi (7) siyeye. Wari oso oso aꞌi ape mo tapiye gol taꞌaneye ape, yehe erei ereti feni werese feni hesi aꞌi (7) ponei sahe au teiteye. 13 Wari oso oso aꞌi ereti feni werese feni hesi aꞌi (7) ponei sahe irosiya ape, meni ta teiteye.
“Meni ape meni pefine omo hire maꞌe itorai ape, wou aꞌi ne.” Dan 7:13; 10:5
Le ipari tahe pitase aꞌi lowe lo sahe napetuteye ape, ani asiteye. Wafei aꞌi ipari tahe metete sahe ti tawesiteye. 14 Mato sosu mato towe lo irowe nemaiye towe wapo wou aꞌi ne. Aitu sapu wapo wou aꞌi ne. Nihe lo yehe mitaiyeyei erasi wou aꞌi ne.g 15 Lowe hesi lo ape loꞌu aꞌi henerai, ipari meneꞌe yehe sahe lei farufaruwe se wou aꞌi ne. Peri uteyei lo saꞌi mesiyu noꞌu erasi wou aꞌi ne. 16 Ereti eyate feni lo sahe, le eiwariyemi ereti feni werese feni hesi aꞌi (7) aniteye. Peri uteyei lo ape wou ipari meneꞌe ai feni se feni se aiwawe aꞌi ahi lo papu henerai. Tu nihari lo poweiye mi erasi wou aꞌi ne. Ane etiri tomu neꞌese ape mo siyeye.h 17 Sosu ane le siyeye su, ane lowe lo atahe sahe hi awei maꞌe winetaiye. Temeniyeyei meni wou winetaiye. Le ereti eyate feni lo ane maꞌe isawe aniteyewe, ane maꞌe eiye, “Atoweiye sawa! Ane meni tutawe aiwawe aꞌi. Sosu ane meni nowe yeꞌewi henerairowa.i 18 Ane marepi hepene norohuwe irosiya. Tu naifa ane temeniyeye. Sosu ne ane siyere! Ane mi mi weriyei weriyei marepi hepene norohu aꞌi ironamitorowa. Serai Owane Sitewi lai ane si taꞌane norohuwe sineye su, ane meni kairefi aꞌi ne. Ane temeniyeyei ape hi ani ararowe. Lu taune werese temeniyeye ape, ane lai faraꞌu lowe si taꞌane norohuwe sinerowa. 19 Serai etiri werese ne siyeye ape, ne one towe sahe lesere! Etiri werese pereye nowe eite se irosiya ape, sosu etiri werese nowe yeꞌewi se moꞌo henerairowa ape, ne one towe sahe lesere! 20 Sosu eiwariyemi ereti feni werese feni hesi aꞌi (7) ne, ne ereti eyate feni ano sahe siyeye ape, peri anowe ape tu naifa lu taune maꞌe fareyareteye. Peri anowe ape lo sitewi ape apou ne. Eiwariyemi ereti feni werese feni hesi aꞌi, lowe Owane Sitewi lo ipari wisere aꞌi ereti feni werese feni hesi aꞌi ne. Lowe lu taune Owane Sitewi lo peri tote tawesi umasiteye ape, au noweinoweinamisiya. Sosu wari oso oso aꞌi tapiye gol se taꞌaneye ape, lowe lu taune Owane Sitewi lo peri umasisiya ape, omo ereti feni werese feni hesi aꞌi (7) irosiya ape, apou aꞌi ne.”