2 “Kè Awaji irọ inu ije ijaan̄ me lek kinyi, mè ikeek inyan̄a ibot kan̄ melek kè Ebereyam, mè Ajiki, mè Jekọp, ebi ikwaan̄ kan̄ ìgbegbe utoon̄-ejit. 3 Kè ọmọ inyi otutuuk kinyi ejit isasa ikitọbọ ebum inyi ọmọ, mè ikirọ nkeek kan̄ me ejit ònyenye mè ata ejit. 4 Kè ọmọ ichili ejit kinyi, inyi enyi ekesun̄ ikan kan̄, mè ekerọ inu îtọbe ibe erọ, mè inyi si enyi esuuk. 5 Kè ọmọ inọ uriaak kinyi, mè itele nrọ-nlọ kinyi inyi enyi, mè ikajit enyi ìtele me mgbọ ufialek. 6 Eji ba mêkiriaak uriaak me ibot kinyi me ere keyi mgbọ keyi.

7 “Mgbọ Demetirọs orebe ubọọn̄, me acha efit mè akọp gweregwen mè onaan̄ge, eji ebi Ju mîge ikpa ijet enyi, ikikpa uga ukwook eji ekupbe me emen inyi enyi, eyi ògọọk me udun̄ mgbọ Jason melek ebi ogbo kan̄ esabe mkpaka-ibot igwaka inan̄a me ama mbuban melek mkpulu ama kiji, 8 mè itap ukan̄ iwọp otunchit Uwu Mbuban, mè ikpan̄ ene ebi kperọ inu geege ilọ. Eji eneniriaak uriaak igwen Okumugwem, inọnọ. Eji esasa akpa ekọkọk igwa ngwugwa, mè imin mkpukan̄ Uwu Mbuban, mè iyiyik si Fituru Isi Awaji me irek. 9 Eya orọ, mgbọ keyi, enyi ikalọlọ isusun̄ ijọk Uwu Nlak me onyan̄ Kisilep, me acha efit mè akọp jeeta mè jeeta.”

10 “Ebi Jeruselem, mè Judia, melek ebi Oru Ido ebi Ju mè Judas ege ikpa inyi Arisitobulọs, ogwu òjeen̄ ogwu ubọọn̄ Tolemi inu, mè ire ogwu owot iman ebi ngwugwa etọkọbe aran̄ me ibot, mè ige si inyi ebi Ju ìkup me Ijipiti, mè ikitọp enyi amọn, mè ikibe lek kinyi inye.

11 “Akarake Awaji osan̄abe eji isibi me ikpele mfat ke eji ekinyi ọmọ ikpele itọn̄, mije, îje me isi inyi eji, kubọk ebi ìbesi akọn̄ me lek ogwu ubọọn̄. 12 Îre ọmọ orieen̄ ebi ìnu akọn̄ me lek ama mbuban isan̄a. 13 Mije, mgbọ ogwu ibot kiban̄ orebe Pesia melek urum akọn̄ kan̄ òkup kubọk kpekọkọt itap isi me lek, ebi òban yọk Nania efifit ọmọ ifiọk, mè ibak ọmọ okpọkọ okpọkọ me emen uwu yọk ya. 14 Antiọkus ìsasa ebi une kan̄ melek kan̄ inu inifiaan̄ ibe ọmọ ìbonikaan̄ Nania ya me lek nwa. Ekiket kan̄ ìre ikpukpulu inu ubọọn̄ yọk ya okaan̄be me lek mkpukpe ibot olom. 15 Mgbọ ebi òban yọk ekpulube inu ubọọn̄ cha iwele, Antiọkus osasa ibot ene inen me lek ebi melek kan̄ inin̄ emen àwa ya. Antiọkus ininin̄ emen àwa ya, egwugwuk isotu ikwek, 16 mè ichili nlelet isotu òkup me ebek uwu egbakabe, mè isa ewuuk itoon̄ ọmọ, ogwu ibot ya, mè ebi melek kan̄ ikpan̄ isan̄a, mè ibak ema, mè isọp ibot kiban̄ itoon̄ igwook inyi ebi ìkup me oyet. 17 Itọn̄ ikup inyi Awaji kiji me emen inu geelek, ogwu ònyinyi ebi kperiọọn̄ ọmọ osusut.”

18 “Mije eji eberọ orirọ igwọgwọk Uwu Mbuban me òso akọp usen iba mè go me onyan̄ Kisilep, eji mîmun̄ ibe ke îgbe irọrọ ibe enyi eriọọn̄, ufuna enyi erie ijọk Uwu Nlak mè ijọk eyi ukan̄ òsisibi mgbọ Neyemaya, ogwu ònama Uwu Mbuban melek ntook, ogwabe ngwugwa. 19 Mije, mgbọ ekikpulu ebi nte kiji me usun̄ akọn̄ ifon Pesia, ebi ngwugwa mgbọ ya, ebi ìtetet Awaji inye, mîlọbọ ukan̄ ònan̄a me isi ntook, mè inween̄ lek ilet me emen udọn̄ mun̄ òchachat, mè ichit ere ya ijaan̄, inyi ene geege ikariọọn̄. 20 Ire, mgbọ owuwa acha orakabe me lek, me mgbọ înemebe Awaji, ogwu ubọọn̄ Pesia oneniria Neyemaya isi Jeruselem. Neyemaya oraria ebi owot iman ebi ngwugwa ebi ìlelet ukan̄ ya ibe esi esan̄a ukan̄ ya esibi. Ire, ema enenilook eji ibe ke ema kpemun̄ ukan̄, ire, ke emun̄ mun̄ òkup agbagbak agbagbak. Neyemaya ònyinyi ida ibe ekọbọ me lek esa enu. 21 Mgbọ eneen̄be otutuuk inu ngwugwa isun̄ isan̄a, Neyemaya onyinyi ebi ngwugwa ida ibe egigen̄e usini me lek mun̄ ya me lek iye cha melek inu ngwugwa òkup me inyọn̄ iye cha.

22 Mgbọ erọbe ikeya isan̄a, sọnja mgbọ iraraka, ura onanan̄a me udun̄ oduku inyọn̄ isibi, mè ibum itoon̄, mè ikira, ikpele ukan̄ oseseme me lek ngwugwa ya wòi, mè ike otutuuk ene chieen̄. 23 Mgbọ ukan̄ ya okinwọ inu ngwugwa ya, ebi ngwugwa melek otutuuk ebi melek ebi ngwugwa erariaak uriaak. Jonatan okigo uriaak, Neyemaya mè ebi ene ekekibọkọ otu. 24 Uriaak ya ìje ikeyi:

“Jei Okumugwem, Okumugwem Awaji, ogwu òrorom inu geelek, ogwu òkup ukpook ukpook, mè ikaan̄ unye, mè ikirọ inu ònenen, mè ikaan̄ ejit nsan, owu gaalek ore ogwu ubọọn̄, mè ire si ogwu òkaan̄ ata ejit, 25 ogwu òkichili ubọk iche inu inyi ene, ogwu ọmọ gaalek okirọ inu inen, ogwu òkaan̄ unye geelek mè ogwu òkiluluk mgbọ geelek, ogwu òkinyan̄a ebi Ijeren isibi me ufialek, ogwu òsasa ebi nte kiji irọ ebi egobobe mè isun̄ me mbuban, 26 soso, bọkọ ngwugwa keyi me ibot otutuuk ebi kwun̄ ebi Ijeren, mè bem ebi okaan̄be me ìrot, mè sun̄ ema me mbuban. 27 Gbaan̄ otutuuk ebi kiji ìyiyiyala ikana titiin̄, san̄a ebi ìkup me uwu usun̄ me etete ebi kperiọọn̄ Awaji sibi, rọ ata inu nyi ebi ejitbe mè ikpọ isiki chieen̄, mè rọ ibe ebi kperiọọn̄ Awaji eriọọn̄ ibe ke owu ore Awaji kiji. 28 Sulu ebi ìkitutuku eji osusut, mè ebi ìkigumu lek inye chieen̄ inyi eji. 29 Wop ebi kwun̄ kam me lek ijọn̄ mbuban ya, ike Mosis ochieekbe use.”

30 “Ebi ngwugwa enenikikọt okwa. 31 Mgbọ ukan̄ otakabe otutuuk ngwugwa cha iriọk, Neyemaya onyinyi ida ibe eben mun̄ agbagbak ya òsisik egwook me lek ikpele ewuuk cha òkup me ere ya. 32 Mgbọ egwookbe isan̄a, ukan̄ oseseme wòi. Ire, mgbọ ukan̄ eyi lek ntook ya okpọkbe iseme, ukan̄ keyi oniniin̄ dìp. 33 Mgbọ etip inu yi òrọrọ otaan̄be ikana, ogwu ubọọn̄ ebi Pesia onenigọọk inọ ibe ke mun̄ îsibi me ere ebi ngwugwa ebi ekpulube me usun̄ akọn̄ eletbe ukan̄, ke ìre mun̄ ya ke Neyemaya mè ebi kan̄ esa iwọp inu ngwugwa, 34 ogwu ubọọn̄ oneniwọlọ inu ya iriọọn̄ atikọ òkup me lek, mè iniwak ogọ ikana ere ya, mè isun̄ ere ya me mbuban. 35 Ogwu ubọọn̄ oneniche owuwa ata inu inyi ebi ìneneme ọmọ. 36 Neyemaya mè ebi kan̄ egwegwen mun̄ ya ‘nefita’, eyi òsibi ‘igwọgwọk lek’, ire, owuwa ene ekekigwen mun̄ ya ‘nafita’.”