4 “Ikpa ya îben si ibe ke ogwu nriran ya înyi ida, inan̄a me nriran ejeen̄be ọmọ, ibe eben Akpatan̄ Mbuban mè okop inyan̄a-ibot esa egọọk ọmọ mgbọ îsibe isi inene ogoon̄ ya Mosis onenebe, mè ikup imun̄ ijọn̄ Awaji obonyi ema me ìrot. 5 Mgbọ Jerimaya orebe inyọn̄ ogoon̄ ya, imumun̄ nkororok ge, mè iben Akpatan̄ Mbuban mè okop inyan̄a-ibot melek ntook nsensi itap me ere ya, mè ichọkọ otu nkororok ya ichit ikam. 6 Usini ebi melek kan̄ enunu ibenitap òriọọn̄ me oniin̄ ya, ire, kpekọt imun̄ oniin̄ ya. 7 Mgbọ Jerimaya onọbe inu ya ema erọbe, ikakan̄ inu inyi ema, mè ibe, ‘Ere ya ìbokup nlelet, kpeberiọọn̄, mege ire mgbọ Awaji môgbaan̄be ebi kan̄ ikpọk ititiin̄, mè ijeen̄ ema nsan kan̄. 8 Mgbọ ya, Okumugwem mônenichili inu chi ibook, ujamgbugbo eyi Okumugwem melek oduku inyọn̄ mônenisibi ikeke kubọk îsibibe me ukot kè Mosis, mè mgbọ Solomọn oriaakbe uriaak ibe Ere Mbuban ikup me mbuban òjot òjot.’

9 “Mîge si ike Solomọn osabe me iriọọn̄-inu îkaan̄be igwa ngwugwa isasa igbana Uwu Mbuban me mgbọ enamabe isan̄a. 10 Ike Mosis oriaakbe uriaak igwen Okumugwem, ukan̄ onan̄abe me emen inyọn̄ initaka ngwugwa, ikeya si ke Solomọn oriaak, ukan̄ obubumu isibi me akpabin inyọn̄ initaka ngwugwa ewọwọp ya iriọk. 11 Mosis ìtumu ibe ke îre bak me lek kperie ngwugwa ijo inu ya orọ ewọpbe itaka iriọk. 12 Ikeya si, Solomọn ìsun̄ ijọk ya usen jeeta.”

13 “Mîge inu chi si me emen ikpa mfufuk mè emen ikpa Neyemaya ogebe ofolek ugwem kan̄. Mîge si ibe ke Neyemaya îkaan̄ uwu isun̄-ikpa, mè ititiin̄ ikpa ofolek ebi ubọọn̄ mè ebi nriran, mè inu Debit ogebe, mè ikpa ebi ubọọn̄ egebe ofolek ngwugwa, isun̄ me ere ya. 14 Ikeya si, Judas îtitiin̄ otutuuk ikpa echi akọn̄ òrọrọn̄ ikeme eji oyiyalabe isun̄ iso. Otutuuk ikpa cha òwa me ubọk kiji. 15 Ire ikaan̄ eyi enyi eweekbe me lek, ìria ene ìnu, inyi inibọkọ ijet enyi.”

16 “Mgbọ keyi, eji mênibene ijọk igbagbama lek Uwu Mbuban. Eya orọ, eji ekige ikpa ijet enyi ikibeek ibe enyi egọọk eji erie ijọk ya me usen cha. 17 Îre Awaji onyan̄a otutuuk ebi eyi kan̄, mè inyi ema otutuuk ene ìrot, mè iyaka irek ubọọn̄ kiban̄, mè irek ebi ngwugwa, mè irek ebi esun̄be me mbuban, inyi ema, 18 ike îchieekbe use me emen Ikan kan̄. Eji mîtoon̄ ejit me lek Awaji, ibe ke ìkpofiin̄ mgbọ, môkaan̄ eji nsan me lek, mè isa eji me ere geelek me irak isinyọn̄ inigbaan̄ ititiin̄ me Uwu Mbuban kan̄. Mije, înyan̄a eji isibi me owuwa ikpele ufialek, mè igwọk Uwu Mbuban itana.”

19 Jason ogwu Sairini îge mfufuk ofolek lek kè Judas Makabiyọs mè ebi ngwan̄, mè igwọgwọk ikpele Uwu Mbuban ya, mè igbagbana ntook, 20 melek akọn̄ etimbe me lek kè Antiọkus Epifanes mè ogwu gwun̄ Yupatọ, 21 mè inu ijejeen̄ ònan̄a me emen inyọn̄ inirọ inyi ejit inye ebi ìtitim akọn̄ mije ubọk iriaak Awaji ebi Ju, eyi òrọrọ inyi ema ebọkọ otutuuk ido, mè elilaba urum akọn̄ ebi kperiọọn̄ Awaji cha esan̄a, ubọk geelek ema erebe ene inen mè inen gaalek, 22 mè ebọkọ Uwu Mbuban ya òtataan̄ etip ikana otutuuk linyọn̄, mè etim akọn̄ ebọkọ Jeruselem, mè ekpọk erọ ikan egwakbe isan̄a cha, inye. Okumugwem okekirọ ema nnwọn sa me ata ejit îsabe ikitap ubọk inyi ema. 23 Otutuuk inu kechi, echi Jason ogwu Sairini ogebe me emen ikpa go, ke eji ebesa lek igege itap me ikpa emen ge gaalek. 24 Mije ufialek ebi ìkiweek irọriọọn̄ mfufuk ekikaan̄, bak me lek otu ifuk inu egebe kubọk inu òrọrọ, mè ubọk îyọtbe ikọkọt ifuk otutuuk mfufuk cha, bak me lek inu cha omabe lek iwa, 25 eji ekaan̄ ekiket itatap ubọk inyi ebi ìkiweek ifufuk inu cha, mè irọrọ ibe ifet me lek ebi ìweweek itetet inu cha ikaan̄ me ibot, mè irọrọ ibe ene geelek òfufuk ikaan̄ si oruru me lek. 26 Eji ebi ìbeben uyọt uyọt ikwaan̄ ichichichiki inu chi ige, ìkare sọntiik ikwaan̄ okup inyi eji, îre egwurugwu mè itop-chieen̄. 27 Ìyọt kubọk itoto ijọk inorie mè miin̄, mè inyi ene geelek inu òkitat ogwa me lek. Ire, eji mîbele ejit ibọbọkọ ukwook irọ ikwaan̄ môtopbe ebi ene me lek. 28 Eji mêtele ikpakpa me ntuun̄ me ntuun̄, eya ìkup inyi ogwu ògege ikpa cha. Ire, eji etap efuuk me ichichiki echi òrere ibot ibot ikọ ige. 29 Ogwu usọ inama-uwu ìkikpọ chieen̄ me lek ubọk otutuuk ayaya uwu ekinama obokup. Ire, ogwu òkiken agba ìkikpọ chieen̄ agba òbogbe isasa ibala uwu ya. Ikeya si ke ikwaan̄ kiji okup. 30 Irọriọọn̄ ibot ibot inu ekitumu, mè ikpakpa inu òrọrọ me agan̄ geelek, mè igọgọọk me ntuun̄ me ntuun̄, ìre mbubek ogwu òge mfufuk. 31 Ire, ogwu òbogobo ibot ibot ikọ ige, mêtele ibe imọnọ ikọ cha me ufieek, mè itele igọgọọk me ntuun̄ me ntuun̄. 32 Eya orọ, eji mêbene mgbọ keyi ikpakpa mfufuk cha, kpebetap inu isọkọ me lek eyi eji etumube iraka, mije, ìkponwọn ire eji ige inu ofolek mfufuk ijọn̄ọ, mè iyaka inifieek mfufuk ya me lek kan̄ igbidim.