4 Ire, ogwu enerieen̄ ge ekigwen Saimọn, ogwu otoko kè Benjamin,^a ogwu etobe me ibot ikwaan̄ Uwu Mbuban, onenikaan̄ gọlọgọlọ melek ogwu òban Awaji òfo me lek ikan òkikpulu ewe ama Jeruselem. 5 Bak me lek Onias ikachieekge ìnyi ọmọ, isisi lek kè Apoloniọs gwun̄ kè Tirasiọs. Me ike mgbọ ya, Apoloniọs okikpulu ido Kole-Siria mè ido Fonisia. 6 Saimọn okpakpa inyi Apoloniọs ibe ke ikpoko ìjojot uwu isun̄-ikpoko me Jeruselem, ke ikpoko îwa ire lek kperiọọn̄ otu ifuk, ke ìkakup me lek ikpoko ekisa igwa ngwugwa, ke ikpoko cha môkọt ikup me irak ogwu ubọọn̄, inyi ikitọ ikọ me lek.

7 Mgbọ Apoloniọs ochichinibe melek ogwu ubọọn̄, ikpakpa inu ofolek ikpoko ya inyi, ubọk ekpabe inyi ọmọ. Ogwu ubọọn̄ ogogobo Eliodorọs, ogwu ibot ebi ikwaan̄ kan̄, iria, mè inyi ida ibe isi ikpulu ikpoko cha isa inu. 8 Eliodorọs ojijibi ije mgbọ yaage, mè ifiaan̄ irọ kubọk ọmọ ìbosi ikpọ ido Kole-Siria mè ido Fonisia, ire, ìbosi irọ inu ya ogwu ubọọn̄ oriabe.

9 Mgbọ îrebe Jeruselem, ogwu òban Awaji mè ebi ama ebọbọkọ ọmọ itap. Mgbọ ebọkọbe ọmọ itap isan̄a, itotolek inikpa inu òfo me lek etip ya enube inilook, mè inikpọk mbum ibot ije kan̄, mè inido ibe mè ìre inu ya ìre ikeya ubọk ema enọbe. 10 Ogwu òban Awaji okpakpa ibe ke îkaan̄ ikpoko esun̄be inyi ebi nwakpa mè ebi kpà-nte, 11 mè ikaan̄ si echi òre echi kè Irikanus gwun̄ kè Tobayas, ogwu òkup me irek ile, ke ikpoko cha otutuuk ìsibi efit obop ikpoko alata okuket ini mè efit obop ikpoko alata araran̄ iba gaalek, ke ìkawa kubọk Saimọn ogwu ijo ene ya obenbe ikikpa ikana. 12 Îtumu si ibe ke ìkafefet mgbọ geege ibe ke ene geege môrọ inu ikatatge me lek ebi ife cha ìsasa ere yi itoon̄ ejit ibe ìre ere òkup mbuban, mè ikpọ chieen̄ ibe ke kpeberọ inu geege òbofiat umin Uwu Mbuban ya eyi otutuuk ebi linyọn̄ ekinyi ulibi.

13 Ire, bak me lek ida ogwu ubọọn̄ onyibe, Eliodorọs otutumu ifieek ibe ke mêbọkọ ikpoko cha isa isi itap me uwu ekisun̄ ikpoko ogwu ubọọn̄. 14 Isusun̄ usen, mè inin̄ Uwu Mbuban, inyi ọmọ ikpọ chieen̄ me lek ubọk ebefuk ikpoko cha.

Otutuuk ama odidimi, mè isisik enenen bak me lek inu ya. 15 Ebi ngwugwa esasa ofọnti mbuban me lek irọn̄ inyana me isi ntook ikigwen Awaji ogwu òkup me akpabin inyọn̄, ogwu ònyinyi ikan ofolek isusun̄ ikpoko cha, ibe isun̄ ikpoko cha inyi ebi ìtatap, mè geege ikanan̄a me lek. 16 Ike ogwu òban Awaji osabe isibi inu okpukpukpuku ejit otutuuk ene igwook isan̄a kpai, isi kan̄ mè akpalek kan̄ înwene enenen, mè ikijeen̄ uga ofaak òkup me ibot ejit kan̄. 17 Ukpook ìninin̄ iso ọmọ lek, lek kan̄ okekiran, eya okekijeen̄ uga ufiak òkup ọmọ me ejit. 18 Ebi ene egbugbuku isibi, mè igwook me oyet, mè igbaan̄ ititiin̄ ikibeek Awaji mbeek, mije ke mênijijaka umin Uwu Mbuban. 19 Ebibaan̄ esasa ukpọk lek, mè itobo ekwut ufieejit me otu ebe, mè isibi igwook ichit lek oniin̄. Nsabọn ibaan̄ ebi ekitap ibia me uwu ibe ekasibi oyet, ekekigbọọk ikana ere, usini kiban̄ elibi ifon otunchit, usini efon lek mgban ama, sà usini ekup me emen uwu ikitaak ebek itibi otu nruruk. 20 Otutuuk ene ebebene ubọk ifo inyọn̄ ikibeek Awaji mbeek. 21 Ubọk ebi ama esabe igbaan̄ irurọn̄ọ inyana ichit ijọn̄, mè ike ogwu òban Awaji osabe ijin lek me uga ofaak îkupbe me emen, okakaan̄ njijin me lek iraka iman̄.

22 Mgbọ otutuuk ebi ene ekitaan̄ ukpo ikigwen Okumugwem Ogwu Òkaan̄ Unye Geelek ibe isun̄ ikpoko cha ikam inyi ebi ìtatap, mè inu geege ikare lek, 23 Eliodorọs okekije inyi isi ikirọ inu ebe ọmọ inirọ. 24 Ire, mgbọ ọmọ mè ebi ìkibem ọmọ erebe uwu isun̄-ikpoko ya, Awaji, Ogwukaan̄ otutuuk erumun̄ geelek, mè Ogwukaan̄ otutuuk unye geelek ojejeen̄ ikpele inu ijejeen̄, eyi òtetet otutuuk ebi ìkakat ejit igọọk ọmọ ije ukpook enenen, mè igọm ema uga, mgbọ ema emun̄be unye eyi Awaji. 25 Inyinya ge ekenbe lek ijaan̄ enenen îkana isibi me isi kiban̄, mè iben ogwu ene ge òmimin inyirinya me lek. Ogwu òkikọp inyinya ya okwakwaan̄ nroon̄ akọn̄ òkup ukpook ukpook me lek. Inyinya ya olilibi fiàm inin̄ lek kè Eliodorọs, mè ibene ubọk iba kan̄ ikaan̄ isa igon ọmọ gbei. 26 Ofifi nsabọn irieen̄ iba ìkakaan̄ unye enenen, mè ijaan̄ uja enenen, mè ibala lek òrirọ òrirọ, ekakana isibi mgbọ yaage, mè ikeke me agba agan̄ iba kè Eliodorọs, mè ikpọkpọ ikigon ọmọ nnaan̄ nnaan̄, kpetetele ubọk. 27 Eliodorọs onanan̄a irọn̄ me ijọn̄ gbài, ekpuk udun okakana ichit ọmọ bùk. Ebi kan̄ ebeben ọmọ itoon̄ me inyọn̄ m̀kpata, 28 mè iben ọmọ akpan akpan isa ije. Ene keyi, ogwu mgbọ mgbọ keyi mege, òraraka inin̄ uwu isun̄-ikpoko Uwu Mbuban melek owuwa ene mè ebi ìkibem ọmọ, ìkayaka ìkaan̄ unye ìtap ubọk ìnyi lek kan̄. Otutuuk kiban̄ etotolek iniriọọn̄ unye Awaji ogwu òkaan̄ inyọn̄ mè ijọn̄ okaan̄be.

29 Mgbọ Eliodorọs olaakbe ibia, ìkayaka ìkọt ìsan̄a amọn, ìkakakaan̄ si ikpọchieen̄ geege ìbe lek kan̄ mônye, bak me lek chinichini eyi Awaji ochichinibe ọmọ, 30 ebi Ju ekekitọn̄ Okumugwem ogwu òrọrọ uyeke inu isa imin ere mbuban kan̄. Uwu Mbuban, eyi uga ukpook mè okput onin̄be sọntiik mgbọ òraraka, ojojot mgbọ keyi me unwọọn̄ mè ubelejit, mije inu ijejeen̄ eyi Okumugwem Ogwu Òkaan̄ Unye Geelek ojeen̄be.

31 Usini ebi melek kè Eliodorọs egwagwat lek ibeek Onias ibe inye lek iriaak Ogwu Òbebene Ichit, ibe itap ugwem me emen ogwu ibot kiban̄ ya, ogwu ekpọọk obenebe ikigọt me ejit. 32 Ogwu òban Awaji ofefieek owot ibe ke ogwu ubọọn̄ môkeek ibe ke îkaan̄ inu ema erọbe Eliodorọs. Eya orọ, igwagwa ngwugwa isa ibeek ibe lek kan̄ inye. 33 Mgbọ ogwu òban Awaji okigwa ngwugwa esuuk ya, nsabọn irieen̄ iba cha yaage si ekakana isibi me isi kè Eliodorọs, melek ofọnti cha me lek, mè ikeke me agba lek kan̄ itumu ibe, “Tọn̄ Onias ogwu òban Awaji enenen, mije, îre sa me lek kan̄ ke Okumugwem otele ugwem kwun̄ inyi owu. 34 Owu, ogwu òbọbọkọ osusut ònan̄a me emen inyọn̄, mun̄ ibe ke otumu ikpele unye eyi Awaji isibi inyi otutuuk ebilene.” Itutumu ikeya isan̄a, ema enininiin̄ ichep.

35 Eliodorọs onenigwa ngwugwa inyi Okumugwem, mè inyan̄a ibot enenen inyi Awaji ogwu òsusun̄ ọmọ ugwem, mè inibe Onias iriọọn̄ ubọk ikup, mè ijibi urum akọn̄ kan̄ isa igwu ikom ifo isi lek ogwu ubọọn̄. 36 Mgbọ îrebe, ikekikpa ikwaan̄ Awaji ogwu ògagak otutuuk awaji geelek orọbe, echi ọmọ osabe chieen̄ kan̄ gaalek imun̄, inyi otutuuk ene.

37 Mgbọ ogwu ubọọn̄ odobe Eliodorọs ojelek ogwu ògbegbe ibe eria esi Jeruselem òso mgbọ iba, ifọfọọk ibe, 38 “Ire okaan̄ ogwu ochicha, mè ìre ogwu ònyenye ibot inyi mkpulu kwun̄, ria ogwa si. Isisulu ọmọ jakajakajaka isan̄a, môka inu, mè ire ikọkọt ika. Mije, îkaan̄ nke nke unye Awaji òkup me ere ya. 39 Îre Ogwu Òluk Me Emen Inyọn̄ me lek kan̄ okibem ere ya, mè ikitap ubọk inyi ebi ere ya. Ogwu geelek òsisi ibosi itap unan me ere ya, ọmọ ìbotọtọbọ ene ya ito, mè ojijaka òsan̄a.” 40 Ikeya ke ije kè Eliodorọs mè ike Awaji osabe ikput lek uwu isun̄-ikpoko obọkọ irek.