7 Mgbọ Seliyukọs okwube, Antiọkus ogwu ekigwen si Epifanes, oraraka irek ubọọn̄. Jasin, ngwan̄ kè Onias osasa me ngan ibọkọ irek ogwu òban Awaji. 8 Îsi lek ogwu ubọọn̄, mè ichieek use ibe ke ọmọ mônyi ogwa efit obop ikpoko alata araran̄ ita mè akọp obop gweregwen, mè ofifi akọp obop ikpoko alata araran̄ jeeta òbonan̄a me esese akpa isibi. 9 Îchieek si ibe ke ọmọ môkpe si ofifi efit mè akọp ikpoko alata araran̄ go, ire ogwu ubọọn̄ ichieek ibe ọmọ isa me unye ogwu ubọọn̄ ichili oyet ifit ile, mè iteen̄ ogbaragbat nsabọn ebi ìbekifit ifit me ere ya, mè ọmọ itaak ebi Jeruselem erieen̄ isa irọ ebi Antiọk. 10 Mgbọ ogwu ubọọn̄ ochieekbe inyi, Jasin omọmọnọ irek, mè isa mgbọ yaage irọ ebi ido kiban̄ ekerọ orọmijọn̄ ebi Giris.

11 Jasin îda otutuuk ata inu geelek ebi ubọọn̄ erọbe inyi ebi Ju sa me ubọk kè Jọn, nte kè Yupolemọs, ito. Yupolemus ore ogwu eriabe isi lek ebi Rom, òsisi igọọk ineen̄ irek unene mè mgbaan̄-mbọp. Jasin îjijaka si orọmijọn̄ ekisa iluk ugwem igọọk me lek Ikan ebi Ju, mè inisa aya orọmijọn̄, òlọlọ me lek Ikan, inu. 12 Jasin îgen ibak inama oyet ifit ile ya me ebon orioon̄ uwu mgban akọn̄ okekebe me inyọn̄, mè irọ ibe ogbaragbat nsabọn irieen̄ ìsisibi isi ekekwuun̄ okpibot ebi Giris ekikwuun̄ me oyet ifit. 13 Mije Jasin orebe ene ikpak, ìkariọọn̄ Awaji kubọk ge, ìkarere si atata ogwu òban Awaji, orọmijọn̄ ebi Giris melek orọmijọn̄ ebi ofifi ido ojojot ido ebi Ju, 14 mè ikpan̄ ulọk ebi ngwugwa me lek ikwaan̄ inyọn̄ ntook ngwugwa. Ebi ngwugwa ekekijit Uwu Mbuban, mè ikikpọ chieen̄ ilọ me lek ngwugwa. Ire, isinyinyi ulook ibe enetọbọ ǹtọbọ, ema mîra igwat lek ilibi igọọk ikitap àlo, mè ikigọọk ifit ifit cha echi Ikan ebi Ju ogbanbe. 15 Ema ekpọkpọ inu geelek ebi nte kiban̄ esun̄be me unye otu ewe isiki chieen̄, mè inimọnọ inu geelek òrere eyi ebi Giris kubọk inu òkup me unye otu ewe ichit. 16 Mije keyi, ikpele ufialek orọrọn̄ ikeme ema. Ebi ema ekitọn̄ orọmijọn̄ kiban̄ cha, mè ikikpọ inu me ubọk irọ cha, ekpọkpọ igwu ikom inikana ebi ochicha inyi ema, mè ikitutuku ema. 17 Ikpọkpọ Ikan Awaji ilọ chieen̄ ìkare sọntiik inu. Inu òrọrọ me mgburudun̄ îkpọk mbum ibe ke îre ikeya.

18 Mgbọ ifit ekifit mgbọ ge me acha ini okupbe me ijọn̄ me Taya, eyi ogwu ubọọn̄ ogọọkbe inu inikpọ, 19 Jasin, ogwu ijo ene ya, ogogobo ene iria isi, mè irọ kubọk ife cha ìre ebi Antiọk ìnan̄a me Jeruselem, mè inyi ema efit ikpoko alata okuket ita ibe esa egwa ngwugwa enyi yọk ebi Giris eyi ekigwen Erekules. Ire, ebi înyibe ikpoko ya ekekeek ibe ke ìkatat ibe efiat ikpoko ya me lek ngwugwa, mè itumu ifieek ibe ke mêfiat isa irọ ofifi inu. 20 Eya orọ, ikpoko ya enyibe ibe esa egwa ngwugwa enyi Erekules, ebi ìsasa ikpoko ya inu esasa me nkeek kiban̄ iben isa inama uji akọn̄.

21 Me ike mgbọ ya, Antiọkus oneniria Apoloniọs gwun̄ kè Menesitiọs isi Ijipiti ibe isi orirọ etobe Filometọ ubọọn̄. Antiọkus oneninọ ibe ke Filometọ îje ikeme mkpulu kan̄. Mgbọ înọbe etip yi, iweweek ubọk ọmọ obosa ikup me utelelek. Eya orọ, ibebene ije ije isi Jeruselem, mè ije itibi Jọpa. 22 Mgbọ îrebe Jeruselem, Jasin melek ebi ama ebọbọkọ ọmọ itap òrirọ òrirọ, mè ibeen̄ ukan̄ nlak ikaan̄ me ubọk isa ikidimi ere ibọkọ ọmọ itap me ama. Eya iraraka, isasa urum akọn̄ kan̄ igbaalek iraka ifo Fonisia.

23 Mgbọ acha ita orakabe, Jasin oneniria Menelọs ngwan̄ kè Saimọn ogwu etumube ikọ ibak ya, ibe iben ikpoko ijet ogwu ubọọn̄, mè ido nkeek kan̄ me lek owuwa inu òkup me uyọt. 24 Ire, mgbọ esabe Menelọs inijeen̄ ogwu ubọọn̄, Menelọs otutumu ikọ itọn̄ ogwu ubọọn̄ isa imin lek kan̄ kubọk ogwu òkup me ikpele irek, mè ichieek ogwu ubọọn̄ efit obop ikpoko alata okuket ita iwa igak ubọk Jasin ochieekbe, mè isa me ikeya ibọkọ irek ogwu òban Awaji ikaan̄. 25 Mgbọ Menelọs obọkọbe ikpa unye ogwu ubọọn̄ onyibe isa irọ ọmọ aya ogwu òban Awaji, ikaka. Ire, kpunu inu geege me ugwem kan̄ òkijeen̄ ibe ọmọ ìre ogwu òban Awaji. Ọmọ ìre ogwu uyok-ejit, mè ogwu ikpak òkituk ene, mè ogwu òkinaan̄ ejit ijo ijo kubọk anam oron. 26 Sa me ikeya, ike Jasin obọkọbe ogwu ngwan̄ irek me unye, ofifi ene si obọbọkọ ọmọ irek ya, ererieen̄ ọmọ kubọk ogwu mkpat akọn̄ ifo ido ebi Amọn. 27 Menelọs onenikup me irek òban Awaji. Ire, otutuuk ikpoko cha îchieekbe ogwu ubọọn̄, ìkakikpe geege me mgbọ ògbegbe ibe ikpe. 28 Îre Sọsitaratọs ogwu ibot akọn̄ me uwu mgban akọn̄ ore ogwu òkibọkọ otitip ogwu ubọọn̄ geelek. Ire, Sọsitaratọs îdo otitip ya igak, Menelọs ìkakikpe. Eya orọ, ogwu ubọọn̄ ogwegwen ema ene iba inu me isi kan̄. 29 Mgbọ ema ebeje, Menelọs ototo Lisimakọs ogwu ngwan̄ ibe ikpọ chieen̄ me lek irek ogwu òban Awaji iban ọmọ. Sọsitaratọs ototo si Keretes, ogwu ibot urum akọn̄ ebi Saipọrọs, ibe ikup me otuchieen̄ kan̄.

30 Mgbọ inu kechi okije inyi isi, ebi Tasọs mè ebi Malọs ebebene ikpaka ibot, mije ogwu ubọọn̄ osabe ama kiban̄ iche inyi Antiọkus, ogwu ugan kan̄. 31 Ogwu ubọọn̄ ogwagwat lek ije isi ibosi ineen̄ inu ya isun̄, mè isa Andọrọnikọs, ene ge me lek ebi ibot ikwaan̄, ito me otuchieen̄ kan̄. 32 Menelọs onenimọnọ ibe ke irek îsibi inyi ọmọ, mè ichiin̄ nroon̄ ikwaan̄ echi alata araran̄ me Uwu Mbuban isa isi inyi Andọrọnikọs, mè inyam echilọ inyi ebi Taya mè ebi ama ìkup me agan̄ ya. 33 Mgbọ Onias onọbe inu ya òrọrọ ijaan̄ lek, isisi ilet me ama Dafine òkup iriaak Antiọk, mè ikup me ere ya ikpọk mbum otutuuk inu Menelọs orọbe ijeen̄ otutuuk ene. 34 Eya orọ, Menelọs onwenween̄ lek itọt inyi Andọrọnikọs ibe ikpan̄ Onias. Andọrọnikọs onunu me lek kè Onias, mè inisa ofiaan̄ ofiaan̄ ileke ogwa, mè inyan̄a ibot inyi ibe ke ogwugwu ìre une kan̄, mè isa me ikeya inwene ogwa ejit. Ubọk geelek ibe ke ejit kè Onias ìkanye, inanan̄a si me ere îletbe ya isibi inu, Andọrọnikọs okpakpan̄ ọmọ ifiin̄ mgbọ yaage, ìkakekeek mè ìre îtat mè ìre ìkatat.

35 Mkpa kè Onias ìkanaan̄ ebi Ju gaalek, owuwa ebi ofifi ido mîfieek ejit, mè inaan̄ ejit me lek mkpa ya ekpan̄be Onias me ikpak. 36 Mgbọ ogwu ubọọn̄ onan̄abe me agan̄ Silisia ika, ebi Ju ìkup me uga ama Antiọk mè ebi Giris ebi ijo inu ya ojọbe ejit, esisi ibeek mbeek ofolek mkpa ikagbege ya ekpan̄be Onias. 37 Antiọkus si ofefieek ejit enenen, njijin ojojot ọmọ ejit, itoto ito mije ubọk Onias, ogwu òkwukwu ya, okisiki lek irọ inu, mè ikaan̄ ata eru. 38 Antiọkus onanaan̄ ejit, mè iwọọk ofọnti irio irio ebi ubọọn̄ isan̄a Andọrọnikọs me lek, mè igwak ọmọ ofọnti me lek, mè inisa ọmọ ikeya ikana ama okokop inire akpat ere îkpan̄be Onias, mè ikpan̄ ọmọ, ogwu ònwọ eje ene ya, ifiin̄ me ere yaage. Ikeya ke Okumugwem okpe Andọrọnikọs mkpukpe ògbegbe ọmọ.

39 Me ike mgbọ ya, Menelọs okekitap ubọk inyi ngwan̄ kan̄, Lisimakọs, inyi ichiin̄ owuwa nroon̄ ikwaan̄ alata araran̄ melek owuwa ofifi inu òkup me Uwu Mbuban me Jeruselem. Mgbọ etip inu chi otaan̄be ikana ere, urum ebi ama ejijibi inin̄ Lisimakọs lek. 40 Mgbọ urum ebi ene cha enaan̄be ejit, mè ikiweek itatap uyọrọlek, Lisimakọs oraria obop ene ita melek nroon̄ akọn̄ me ubọk isi lek kiban̄. Ogwu òje me isi ebi akọn̄ cha ìre ogwu ekigwen Awuranọs, ene òkakan me otu ifuk acha, mè ikan si me mbubut. 41 Mgbọ urum ebi Ju cha eniriọọn̄ inu ya Lisimakọs okirọ, usini kiban̄ eteteen̄ ewuuk, usini eteen̄ m̀gbele, sà usini egwọ ntọn̄ òkup me ere cha ijot ubọk, mè ikitọọn̄ Lisimakọs melek ebi kan̄ furufurufuru, 42 mè isak unan me lek owuwa ene me etete ife cha, mè ikpan̄ usini kiban̄, mè irieen̄ ema otutuuk isan̄a, mè ikpan̄ Lisimakọs, ogwu inọ Uwu Mbuban ya me lek kan̄, me agba lek uwu isun̄-ikpoko Uwu Mbuban.

43 Mije inu yi orọrọ, eninin̄ oyerebet me ibot kè Menelọs. 44 Mgbọ ogwu ubọọn̄ onube ama Taya, ene ita ebi oru ama esan̄abe, ekpakpa otu ikọ kiban̄ me isi kan̄. 45 Ire, mgbọ Menelọs omun̄be ibe ke oyerebet môtip ọmọ, ichechieek ogwu unene ogwu ubọọn̄ ge, òrere Tolemi gwun̄ kè Dorimenes, ikpoko òmimin ire môkọt irọ inyi ogwu ubọọn̄ igọọk ọmọ ikeke. 46 Tolemi onenisa ogwu ubọọn̄ isibi isi emen ogwe ge, kubọk ebesi igwele efet, mè irọ inyi ogwu ubọọn̄ inwene ejit. 47 Ogwu ubọọn̄ ofifiin̄ ikọ etoon̄be Menelọs, ogwu òsasa ufialek geelek isibi, mè itip ebi ìkup me isi ikọ ya oyerebet mkpa. Ikerere ibe ke mesa ikọ ya isi me isi ebi Sikitia, ebi ìkirọ ikpak enenen, ikọ ya kè ònwọn ebi isi ikọ cha. 48 Sa me ikeya, ekpakpan̄ ife cha ìtutumu ikọ ibot uga ama mè ibot asabọn ama, mè ibot nroon̄ ikwaan̄ mbuban, ifiin̄ me ekalọge inu geege. 49 Eya orọ, owuwa ebi Taya si enanaan̄ ejit enenen bak me lek ijo inu ya, mè iriọọn̄ ubọk ifuun̄ ebi ife cha ijaan̄ lek. 50 Ire, bak me lek chieen̄-ile ebi mkpulu ekaan̄be, etetele ibe Menelọs ibia me irek ikwaan̄ kan̄. Itetet lek inye ikirọ inu ikpak ifo isi, mè ikana ujat ujat ogwu ochicha inyi ebi ido kan̄.