5 Ofiaan̄ ofiaan̄ etip ge onenikitaan̄ ikana ibe ke Antiọkus îkwu. Jasin otititiin̄ inu òbet lek obop ene, mè ibene akọn̄ me Jeruselem me uwuuk lek. Mgbọ îbieen̄be ebi akọn̄ ìkup me inyọn̄ mgban ama ikpebe, mè ibobọkọ ama, Menelọs olilibi inin̄ emen uwu mgban akọn̄ isi ilet. 6 Ire, Jasin okpọkpọ ikikpan̄ ebi ama kan̄, ìkato nsan, mè ikimọnọ ibe ke ọmọ ìkititiin̄ inu mêsabe ikimin ọmọ me lek ọmọ otimbe ikpan̄ ebi ochicha, ìkare ebi ama kan̄. Ìkariọọn̄ ibe ke isasa ebi ama ene ibene ukot itaan̄ etip ìre inu môkọtbe isa ùrioon̄ òfefieek ichit ijet ene. 7 Ire, Jasin ìkakọt ìbọkọ ibot mkpulu ìkup. Òta kan̄, ijo otitọt îtọtbe osasa esip ijet ọmọ. Ikpọkpọk ilibi ifo ido ebi Amọn, 8 mè ikup me ere ya ikwu mkpa ufieejit. Aretas ogwu ubọọn̄ ebi Arabu otap ọmọ me mkpọn igon ikam. Mgbọ îsibibe, ikekilibi inan̄a me ama ge ifo ofifi ama, otutuuk ene ekekililaba ọmọ ikana, mè icha ọmọ kubọk ogwu òfiat ikan, mè ijọ ejit me lek kan̄ kubọk ogwu òkpan̄ ido kan̄ mè ebi ido kan̄. Ibeben ekot ilibi ifo Ijipiti. 9 Mgburudun̄ kan̄, ogwu òlililaba owuwa ene isan̄a me ido kiban̄ olilibi si ifo ofifi ido isi ikup ikwu, me mgbọ îlibibe ifo Sipata, ikpọ chieen̄ ibe, ike ebiba erebe ngwan̄ ebi Ju, ke mêbọkọ ọmọ itap. 10 Ọmọ ogwu òlililaba owuwa ene, inyi esi ekwaan̄ mkpa, kpefuun̄, ọmọ si okwukwu mkpa unọn, kpunu ogwu òninin̄ uwu ito inyi ọmọ, kpefufuun̄ si ọmọ, ìkaninin̄ si me emen udọn̄-ufuun̄ ebi nte nte kan̄.

11 Mgbọ ogwu ubọọn̄ Antiọkus onọbe etip inu ya òrọrọ me Jeruselem, imọmọnọ ibe ke otutuuk ido Judia ire eya òbebene ikpaka ibot inyi ọmọ. Eya orọ, inanaan̄ ejit enenen, mè ijibi akọn̄ inan̄a me Ijipiti isi inin̄ imeen̄ Jeruselem kubọk efet egwijo. 12 Inyinyi ebi akọn̄ kan̄ ida ibe, ene geelek ebi echichinibe, echo efiin̄, ekato nsan. Ebi geelek ìlilibi inin̄ uwu kiban̄ isi ilileek, egwugwu kubọk ekigwu anam. 13 Eya orọ, ejijijaka ugane mè gwun̄ aya igwook, mè isọp ebibaan̄ mè nsabọn igwook, mè ibak obaak nsabọn ibaan̄ mè nsek nsabọn itutọmọ. 14 Me egwe ita gaalek, akọp obop ene jeeta ekwakwaan̄, akọp obop ini enin̄ me akọn̄ ubọk ubọk, sà ìkeke otu ifuk keya si ke enyam itaak me usun̄.

15 Inu yi Antiọkus orọbe ìkajot ọmọ owot, igegen ibak ije inin̄ emen Uwu Mbuban òkukup mbuban ichit me otutuuk linyọn̄. Menelọs, ogwu ònyanyam Ikan Awaji, mè inyam si ido kan̄ igbaalek, osa ọmọ ije. 16 Antiọkus osasa ubọk kan̄ cha mbuban ochakabe me lek ikpulu nroon̄ ikwaan̄ mbuban, mè isa filafila ubọk kan̄ cha ikwọọk inu ebi ubọọn̄ kechilọ cha echebe inyi Uwu Mbuban, inyi uwu ya ikaan̄ umin mè ulibi, isak. 17 Ejit obebele Antiọkus enenen ibe ke inu înwọn ọmọ. Ìkariọọn̄ ibe ke Okumugwem ìnanaan̄ ejit sọntiik mgbọ mije ijo inu ebi Jeruselem erọbe, ke ìre eya orọ îkpọbe Uwu Mbuban ilọ chieen̄. 18 Mebe ebi Ju kperọ owuwa ijo inu, kè esulu Antiọkus èjat akpa mgbọ yaage înube, mè ekput ọmọ, inyi ikarọ belebele inu ya îrọbe, kubọk esulube Eliodorọs mgbọ ogwu ubọọn̄ Seliyukọs oriabe ibe inikpọ uwu isun̄-ikpoko Uwu Mbuban. 19 Inu òkup me lek ìre ke Okumugwem ìkabak me lek Uwu Mbuban ìgobo ebi kan̄, ìbak me lek ebi kan̄ isun̄ Uwu Mbuban. 20 Mije keya ke ijo isi òtetet ebi ene otet Uwu Mbuban igbaalek. Me mgburudun̄ si, uwu ya îgọọk imun̄ nnwọn ebi ene emun̄be. Ogwukaan̄ Inyọn̄ mè Ijọn̄, ikpele Ogwukaan̄-ene, îjit uwu ya mgbọ ejit onaan̄be, mè ikpọk ineen̄ si isun̄ me òjot òjot uja kan̄, mgbọ unaan̄-ejit kan̄ osuukbe.

21 Antiọkus onenikpulu efie mè efit obop ikpoko alata okuket jeeta me Uwu Mbuban isa igwat lek ilibi ifo Antiọk. Ikekibene lek, kubọk ke ọmọ môkọt ikọp uji awala me inyọn̄ ijọn̄, mè isa ukot ukot ije isaba okwaan̄. 22 Sabum înije, îto ebi otuchieen̄ mkpulu ibe eketutuku ebi ene. Me Jeruselem, ìto Filip ogwu Firijia, ogwu òfefieek me eru igak ogwu ubọọn̄ me lek kan̄, ogwu òtoto ọmọ. 23 Me Gerijim ke îto Andọrọnikọs. Isan̄a me lek kè ebibi, Menelọs ogwu òtututuku ebi ido kiban̄ igak ebiba, ọmọ òwa si okupbe. Antiọkus îsa me ijo ejit îkaan̄be me lek ebi Ju, 24 iria Apoloniọs, ogwu ibot ebi akọn̄ ebi Misia, melek urum akọn̄ akọp obop ene iba mè obop iba inu me Jeruselem, mè inyi ida ibe ekpan̄ ebirieen̄ geelek ìmimin inin̄ ene, mè enyam ebibaan̄ mè nsabọn etap me usun̄. 25 Mgbọ Apoloniọs orebe Jeruselem, irọrọ kubọk ọmọ ìnu me esuuk, mè ikup mege ire Usen Mbuban. Imumun̄ ibe ke ebi Ju ekiwọ efuuk me usen ya, kpesi ikwaan̄, inyinyi ebi akọn̄ kan̄ ida ibe eteen̄ nroon̄ akọn̄ ejibi enin̄ emen ama. 26 Usini ebi ene enanan̄a isibi inikikpọ ema. Ife cha esasa oge akọn̄ ikpan̄ ebiba otutuuk isan̄a, ọmọ melek urum ebi akọn̄ kan̄ elilibi inin̄ emen ama, mè isọp ene igwook owuwa owuwa.

27 Ire, Judas, ogwu ekigwen si Makabiyọs, melek ebi melek kan̄, èsoso ene onaan̄ge, ekpekpebe lek ifo emen èwê isi ikiluk me inyọn̄ ogoon̄ kubọk anam oron. Ema ekirie inu ònan̄a me lek uti oron, inyi ema ekagọọk ìfifila lek kiban̄.