Antiọkus îtutuku ebi Ju mije ubọk iriaak Awaji kiban̄
6
Sọnja mgbọ iraraka, ogwu ubọọn̄ Antiọkus oraria ogwu ugane ge ogwu Atens ibe inisa unye ubọk itet ebi Ju, ufuna eyaka orọmijọn̄ ebi nte nte kiban̄ eto, mè ekayaka ìluk ugwem ìkpọ me lek Ikan Awaji. 2 Ofifi kan̄, ìbe si mè ene ya ififila Uwu Mbuban òkup me Jeruselem, mè isa irọ uwu mbuban eyi yọk ekigwen Jewus òkiluk me inyọn̄ ogoon̄ Olimpus, mè isa uwu mbuban eyi òkup me inyọn̄ ogoon̄ Gerijim irọ uwu mbuban eyi yọk ekigwen Jewus Unene Ebi Ichen, kubọk ebi ìluk me ere ya ebeekbe.3 Tukutuku ya omimin enenen ire lek ebi ene, kpeyaka ikọt ibeme. 4 Ebi ofifi ido mîsa Uwu Mbuban irọ ere ema ekinin̄ ijot ikup inwọ miin̄ isa, mè ikirọ ugwem ten̄ten̄. Ema ekibubat ikana melek ebi òje oyet, mè ikililam ebibaan̄ ikana me emen oyet egep mbuban ya, mè ikisa ochichaka inu inigwa ngwugwa me uwu ya. 5 Ochichaka inu cha echi Ikan Awaji ogbanbe ke ema ekigwook ijot inyọn̄ ntook ngwugwa. 6 Kpechieek ibe ene geege isun̄ Usen Mbuban, mè ìre irọ orọmijọn̄ ijọk echi ebi nte nte kiban̄ ekirọ, kpechechieek si ibe ene geege itutumu ibe ke ọmọ ìre ogwu Ju.
7 Onyan̄ geelek ekirọrọ orirọ usen iman ogwu ubọọn̄, mè èketet ebi Ju me ijo unye-ubọk ibe egọọk etaka nkat owot anam esabe igwa ngwugwa. Ikeya si, usen ekirie ijọk inyi yọk ekigwen Dayọnisọs, ekitetet si ema me unye ibe ekwuun̄ ọgbọn ajakajak me ibot, esa ekegọọk eje me onineen̄, ekenyi yọk ya umin.
8 Inan̄a me lek mbeek ebi ama Tolemayas ebeekbe, mîtap ikan inyi ama ebi Giris cha òkukup iriaak, ibe erọ ebi Ju ìluk me ama cha chieen̄ inu yaage, mè etet ema me unye, inyi egọọk erie inorie ngwugwa cha, 9 mè ekpan̄ ebi geelek ebi kpechieek inwenwene ikana igọọk orọmijọn̄ ebi Giris. Inenibook otutuuk ene chieen̄ ibe ke ùrioon̄ òkinu. 10 Kubọk inu ijejeen̄, mîtet ebibaan̄ iba ebi ìfefieek bọn kiban̄ afi isa inu me isi ebi ene. Enenisa ebibaan̄ cha, melek nsabọn kiban̄ cha etobobe ijijen me lek ebe kiban̄ ikididen̄ ikana ama ikijeen̄ ebi ene, mè inibieen̄ ema me inyọn̄ mgban ama itọbọ ikpan̄ me ijọn̄. 11 Usini ebi Ju etititiin̄ me emen nkororok ilet ikup ikirọ orirọ Usen Mbuban. Ebi ene emumun̄, mè iben inikpa inyi Filip. Egbagbaan̄ ema otutuuk iwọp itaka iriọk. Mije ulibi ema ekaan̄be me lek usen ya òrere usen òkup mbuban ichit, ema kpetim etim inyan̄a ugwem kiban̄.
Inu òrọrọ Awaji okinyi ebi Ju osusut
12 Mgbọ yi, ǹkibebeek ogwu geelek òkifuk ikpa yi ibe ikafieek ejit bak me lek ùrioon̄ chi geelek. Ire, iriọọn̄ ibe ke Awaji ìkanyi osusut isasa ijijaka ebi kiji isan̄a, ke ìsa itaba ema ubọk me utọn̄, inyi enọ lek. 13 Me atikọ, osusut isigwat lek igọọk ijo inu, ìkijeen̄ ikpele ata ejit. 14 Ire me lek ebi ofifi ido, Ogwukaan̄-ene ìkimeme ikikpọ ibe ema erọ ijo inu kiban̄ eso ifuk sabum ìbonisulu ema osusut. Ire, ìkare ikeya ke îkirọ me lek kiji. 15 Ìkisulu eji osusut mgbọ yaage, ufuna ijo kiji ikawa ìraka iman̄. 16 Eya orọ, nsan kan̄ ìkakinan me lek kiji. Môkọt isa ùrioon̄ irọ eji enọ lek, ire, ìkajijit ebi eyi kan̄ ìtele. 17 Eji etumu ikọ chi, inyi esa ekekeek. Mgbọ keyi, eji mêfo lek ibot ikọ kiji.
Elieja îkwu mkpa mije ichechieek kan̄.
18 Îkaan̄ ene ge ekigwen Elieja. Ọmọ ìre ene ge me lek ebi ilile me etete ebi ìjeen̄ Ikan. Ọmọ înin̄ ugane, mè ire ene òsisibi isi. Usen ge, enenitet otu kan̄ ikama me unye, mè itap anam okodi ibe itaka imen. 19 Ire, ichechieek ikwukwu mkpa me ulibi, igak iluluk ugwem me esip. Eya orọ, ikwukwut anam ya ifiin̄, mè isa ukot kan̄ ije isi inin̄ me otu ọfọkọ, 20 kubọk îgbebe ibe ogwu geelek ejit onyebe ijijit inu Ikan obe ekarie irọ, ubọk geelek ugwem orebe inu otutuuk ene ekima iluluk.
21 Ebi ìkup me otuchieen̄ ngwugwa Ikan ojebe ikeme ya, bak me lek ujọn̄ọ mgbọ ema melek kan̄ erebe unene, esasa ọmọ ije ida ibọkọ, mè inween̄ lek itumu inyi ibe isa anam eyi ubọk kan̄, eyi îbokọt itaka, inu, mè ifiaan̄ ikitaka kubọk ke ìre eyi ogwu ubọọn̄ obe etaka ya ire eya. 22 Kè eya orọ ibe ekakpan̄ ọmọ, mè orọ si ibe ekaan̄ ata ejit me lek kan̄ bak me lek ujọn̄ọ mgbọ ema melek kan̄ erebe unene. 23 Ire, bak me lek umin ògbegbe ujọn̄ọ acha kan̄, mè ulibi eyi irek ugane kan̄, mè isọọn̄ ibot kan̄ eyi ọmọ osabe ire ene òsisibi isi, mè ata eru kan̄ bene me ijija, eyi ògagak otutuuk ìre, me lek Ikan mbuban Awaji onyibe, itutumu ifieek me ejit kan̄, mè igwat lek itumu isibi me isi ogbo ama ibe eria ọmọ efo ama ekwukwu.
24 Ìtumu inyi ema ibe, “Ojelek ofiaan̄ kecha ìkaje ìkike melek otu ifuk acha kiji. Owuwa nsabọn irieen̄ mênenikikeek ibe ke Elieja îkana ifo lek awaji ebi ichen ekiriaak, mgbọ îsobe akọp acha onaan̄ge. 25 Ire mbak me lek iluluk ugwem sọntiik mgbọ inyi isi, mè mfiaan̄ irọ kubọk ke ntaka anam yi, nsabọn irieen̄ cha mêkpọ me ubọk n̄a, mè ije ilọ oniin̄. Emi mânenififila lek n̄a, mè isa esip itet ukan nkanbe. 26 Ire nnwọnwọnọ mkpa ubọk ebilene me mgbọ keyi, mè ìre ǹkukup me ugwem, mè ìre ǹkwukwu, m̀kpanwọnwọnọ me ubọk Ogwu Òkaan̄ Unye Geelek. 27 Eya orọ, ire nkat ejit ikwu mgbọ keyi, mâjeen̄ ibe ke ukan n̄a îgbe emi. 28 Eya mônenire si atalek inu ijejeen̄ inyi nsabọn irieen̄ òfo me lek ubọk ekikwu ata mkpa, me ata ejit melek umin, mije Ikan mbuban ya eyi ekinyi umin.”
Itutumu ikọ chi isan̄a, ijeje mgbọ yaage isi inin̄ me otu ọfọkọ. 29 Ebi ife cha, ìkakaan̄ ata ejit me lek kan̄ sọntiik mgbọ òraraka, ebebene ikikaan̄ ijo ejit me lek kan̄. Mije, ema ekeek ibe ke ikọ cha îtumube ìre ikọ ogwu iraak. 30 Sabum înikwu me irak osusut cha, ikekigọt ibene ida ibe, “Okumugwem, ogwu iriọọn̄-inu kan̄ okupbe mbuban, îmun̄ ijaan̄ lek ibe, ke kè nkọt nnwọnọ mkpa. Ubọk geelek nkibọkọ ikpele ujaralek me irak osusut ekisulu emi, ire, me ibot ejit n̄a, mbele ejit, mije ukpook nkaan̄be me lek Okumugwem.”
31 Sa me ikeyi ke Elieja okwu. Mkpa kan̄ ìre inu ijejeen̄ òfo me lek ene ikakaan̄ umin mè ikpele unye-ejit. Inu ijejeen̄ keyi ìkakup ìnyi nsabọn irieen̄ gaalek, ìkup si inyi otutuuk ene me ido kiban̄.