3 Ogwu ubọọn̄ onanaan̄ ejit enenen, mè inyi ida ibe eyik otin̄ ikala-inu mè uchieen̄ ile me ukan̄ ewọp eyok. 4 Mgbọ yaage ewọpbe otin̄ mè uchieen̄ cha iren̄e, ibebe ekọọk alọm ogwu òtumu ikọ ya, mè enyiaan̄ akpa inyọn̄ ibot kan̄ esan̄a, mè esọp ubọk kan̄ melek ukot kan̄, inyi ebi ngwan̄ me ogwu uga ekemun̄. 5 Mgbọ erọbe inyi ikayaka ìkaan̄ unye geege, ogwu ubọọn̄ obebe eben, mgbọ îkifuuk efuuk, esa esi etap me emen otin̄ ikala-inu me ukan̄, mè ekala njijom. Ike oduku ònan̄a me emen otin̄ ya okibubaan̄ ikana, ogwu uga mè ebi ngwan̄ kechilọ ekekikat lek kiban̄ ejit, inyi ema ekwaan̄ me umin, mè ikibe,

6 “Okumugwem Awaji òkikpọ. Me atikọ, njijin kiji òkitet ọmọ, kubọk Mosis okọtbe me okwa îsabe ikeke ata-ikọ ikeme ebi nte nte kiji me isi kiban̄ gaalek ibe, ‘Okumugwem ìkpolọlọ itoto ebi ikwaan̄ kan̄ njijin.’ ”

7 Mgbọ ogwu adasi ene ojebe ikeyi ikwu, ebi ife cha esasan̄a ogwu òso iba isibi isa ifit ifit nnaan̄ òkitop ema me lek. Ema enyanyiaan̄ ogwa akpa melek ijeek isan̄a me ibot, mè ido ibe, “Ìre owu môtaka anam okodi yi, sà ìre eji ejijaka owu, mè efieek owu ubọk mè ukot ge ge?”

8 Ire, ifọfọọk me otu usem ebi nte nte kan̄ ibe, “In̄-in̄! M̀kpataka!” Eya orọ, ejijijaka ọmọ kubọk ejijakabe ogwu ngwan̄. 9 Mgbọ ìbochit chieen̄, ibọbọn̄ ukpo itumu inyi ogwu ubọọn̄ ibe, “Owu ene ikpak keyi, kpan̄ eji san̄a me lek ugwem keyi. Ire, Ogwu Ubọọn̄ Otutuuk Linyọn̄ môjomo eji itap me ugwem òbokup ire mgbọ geelek. Mije, îre me ibot Ikan kan̄ ke eji ekwaan̄.”

10 Eyi kan̄ itata, ema etetet ogwu òso ita isa ifit ifit ikpak òkitop ema me lek. Mgbọ edobe, igwagwat lek iwọọk alọm kan̄ isibi, mè ikat ejit inyana ubọk kan̄ inyi, 11 mè ikitumu ikọ me umin ibe, “Îre Akpabin inyọn̄ onyi emi ubọk kechi. Ire, njit ema bak me lek Ikan kan̄. Ǹkikpọ chieen̄ iyayaka ikpọk ibọkọ ubọk chi ofifi me ubọk kan̄ si.” 12 Ike gwun̄ enerieen̄ ya okatbe ejit ire, mè ike ikasage ufialek kan̄ ìgwen inu, okeke ogwu ubọọn̄ mè ebi melek kan̄ chieen̄ enenen.

13 Mgbọ ogwugwa okwube, enininia ogwu òso ini, mè itutuku si ikeya. 14 Mgbọ îbotọbọ, itataan̄ ukpo itumu ibe, “Ikwukwu mkpa me ubọk ebilene înwọn eji me lek. Utoon̄-ejit kiji ìre ke Awaji îchieek use ijojomo eji me mkpa. Ire, owu, Antiọkus, kpunu ijojomo me mkpa inin̄ me aya ugwem inyi owu.”

15 Ofifi kan̄, ema enenisan̄a ogwu òso go isibi, mè ibene ikininia. 16 Ire, ibebene chieen̄ ikpọ ogwu ubọọn̄, mè ibe, “Mije okaan̄be unye me lek ebilene orọ, owu ogwu ebilene, okirọ inu ubọk òneme owu. Ire, kakeek ibe ke Awaji ìjijit ebi kiji. 17 Kup kpọ, owu mômun̄ ubọk Awaji môsabe ikpele unye kan̄ ijijaka owu melek ebi owot iman kwun̄ isan̄a.”

18 Eyi kan̄ iraraka, esasan̄a ogwu òso gweregwen isibi. Ikọ kan̄ sabum înikwu ìre, “Kafiaan̄ lek kwun̄. Ukwook keyi eji ekibọkọ ìnan̄a me lek ijo inu eji erọbe Awaji kiji. Îre mije keya ke uyeke uyeke inu chi okirọ eji. 19 Ire, kakeek ibe ke owu mônwọnọ osusut, eyi owu okitim Awaji akọn̄ me lek!”

20 Nga kiban̄ ore ogwu òrọrọ inu ògbegbe itọn̄ ichit, mè igbe ogwu ebekikeek melek umin. Mije, ubọk geelek îkupbe ikikpọ ibot bọn jaaba îkaan̄be ekikwaan̄ me egwe yaage, îkat ejit ime, bak me lek ikpọchieen̄ îkaan̄be me lek Okumugwem. 21 Ikekisa usem ebi nte nte kiban̄ itumu ikọ ònyenye ema ejit. Irọrọ inu òkaan̄ umin îjot ọmọ owot. Inenisa m̀memem ejit ebibaan̄, melek ewuuk ewuuk unye-ejit ebirieen̄, itumu ikọ inyi bọn kan̄ ibe, 22 “Ǹkariọọn̄ ubọk enyi ejebe ininin̄ emi owot, ìkare emi nnyi enyi ugwem mè efuuk, ìkarere si emi mgbaan̄ nriroon̄ geelek me lek kinyi isọk. 23 Eya orọ, Ogwu Òrorom Linyọn̄, ogwu òtoto ibe eman ene, mè isan̄a inu geelek isibi me ibebene, ìkpolọlọ isasa me nsan kan̄ ikpọk inyi enyi ugwem mè efuuk, mije enyi ekpọbe ugwem kinyi ilọ chieen̄ mije Ikan kan̄.”

24 Bak me lek ida ogwu enenwaan̄ ya osabe itumu ikọ, Antiọkus omọmọnọ ibe ke ìkirọ ọmọ ochak, mè ikikeek ibe ke ìkinye chieen̄ inyi ọmọ. Mgbọ ya, kpekpakpan̄-nu ogwu gwun̄ ogwu òrere ijija ichit. Antiọkus okekiriaak gwun̄ enerieen̄ ya. Ìkare me ikọ otu gaalek, înyan̄a ibot ichieek use inyi ibe ke ọmọ môrọ ogwugwu ibọọn̄ ubọọn̄, mè itaan̄ etip, ire ogwugwu ijit orọmijọn̄ ebi nte nte kè ogwugwu, ke ọmọ môtap ogwugwu me ogbo ebi Unene Ogwu Ubọọn̄, mè inyi ogwugwu irek ile me mkpulu kan̄. 25 Ogwu nsabọn irieen̄ yi ìkanyinyi ogwu ubọọn̄ isi. Eya orọ, ogwu ubọọn̄ obebeek ogwu uga ibe iteme gwun̄ ya nteme, ufuna inyan̄a ebek ugwem kan̄. 26 Îsisaak nga gwun̄ ya mege, ichechieek ibe ọmọ môtumu inyi gwun̄ kan̄ ichieek. 27 Inenikana lek ikwuun̄ ichit ogwu gwun̄, mè inisa usem ebi nte nte kiban̄ itumu ikọ ifiaan̄ ogwu ubọọn̄ ikibe, “Gwun̄ n̄a, to njijin n̄a. Onyan̄ onaan̄ge ke mben owu me owot, mè inyi owu ebe acha ita. Nnyi owu inorie, mè ikpukpo owu inire ikeke keyi okekebe, mè igbala chieen̄ ikpọ owu. 28 Ǹkibebeek owu, gwun̄, kpọ akpa inyọn̄, mè kpọ ijọn̄, mè kpọ inu geelek òkup me emen kiban̄, mè riọọn̄ ibe ke Awaji ìkasa inu geege òwuwuuk lek ikup ìrom ema. Ikeya si ke ebilene enan̄a isibi. 29 Katet ukpook me lek ogwu òkpan̄ ene yi. Jeen̄ ibe ke owu ogbe ogwu ebi ngwan̄ kwun̄ ebetoon̄ ejit me lek. Bọkọ mkpa tap, ufuna, inan̄a me nsan Awaji, mâkpọk ikaan̄ owu melek ebi ngwan̄ kwun̄.”

30 Ikọ ya ìkatata ọmọ me otu, gwun̄ enerieen̄ ya obebe, “Keke ke enyi etet ikaan̄ ikikpọ? Emi m̀kparọ inu ya ogwu ubọọn̄ otọbe. Ire, m̀barọ inu Ikan Mosis onyibe ebi nte nte kiji otọbe. 31 Ire, owu, ogwu òdọdọmọ owuwa chieen̄ ijo inu ikeme ebi Iburu, riọọn̄ ibe ke owu òkponwọnọ me ubọk Awaji. 32 Mije, eji ekibọkọ ukwook mije ijo inu kiji. 33 Ire Ogwukaan̄ kiji ogwu òkup me ugwem inaan̄ ejit sọnja mgbọ inyi eji, mè isulu eji osusut ibe eji enọ lek, ọmọ môyaka ikpọk ibọkọ eji ebi ikwaan̄ kan̄ itap, mè itele ijo kiji inyi eji. 34 Ire owu keyi, ene ikpak ikakupge me mbuban, owu ofifila ichit me etete ebilene. Kabele ejit me ikike, mè ìsa ikpọchieen̄ ikakaan̄ge ibot ìgugo lek mgbọ okibene ubọk isulu bọn Awaji òkup me inyọn̄ osusut. 35 Mije, owu òkanwọnwọnọ-nu osusut Awaji Ogwukaan̄ Inyọn̄ mè Ijọn̄, ogwu òkimọọn̄ inu geelek. 36 Ebi ngwan̄ n̄a mîbọkọ ujaralek mgbidim mgbọ isan̄a, mè isa me inyan̄a-ibot eyi Awaji, ikirie ugwem eyi kpotabe ire mgbọ geelek. Ire, owu, sa me oyerebet Awaji, owu môbọkọ osusut ògbegbe ugumulek kwun̄. 37 Emi si, ike ebi ngwan̄ n̄a erọbe, nkana akpalek n̄a mè ugwem n̄a inyi me ibot Ikan ebi nte nte kiji, mè ikigwen Awaji ibe ikaan̄ ata ejit me lek ebi ido kiji ugwat ugwat, mè isa ntọ-mkpọ eji ekije itibi, melek osusut kiji, irọ inyi owu òtumu òsibi ibe ke ọmọ gaalek ore Awaji. 38 Kè Ogwukaan̄ Inyọn̄ mè Ijọn̄ isa emi melek ebi ngwan̄ n̄a irọ ibe unen uyok uyok unaan̄-ejit kan̄, eyi òrọrọn̄ ikeme otutuuk ido kiji ita.”

39 Ogwu ubọọn̄ onanaan̄ ejit ujat ujat, mije ikọ ochak gwun̄ enerieen̄ ya osisaakbe ọmọ ugwem, mè isa me ikeya ininia gwun̄ enerieen̄ yi ifieek enenen igak ubọk îrọbe ebilọ. 40 Gwun̄ yi si okwukwu mkpa kpunube okpa me lek, mè itoon̄ ejit ikam me lek Okumugwem. 41 Mgbọ ekpan̄be bọn cha isan̄a, ekpakpan̄ si nga kiban̄ me òta kan̄.

42 Ikeyi îkem me lek ukpatu irerie inu egwabe inyi yọk, melek ukpatu ijo ujat ujat tukutuku.