5 Mgbọ yaage Makabiyọs onamabe urum akọn̄ kan̄ ikeke, ebi ofifi ido cha kpeyaka ikọt ikeke ida ọmọ, mije, uyok uyok unaan̄-ejit Okumugwem okaan̄be me lek kiban̄, ebi Ju, îkana nsan. 6 Makabiyọs ìkije me nriki inin̄ ama, mè ikitaak ukan̄ iwọp ama ilile mè ama ijija. Îbọkọ owuwa irek ere òkitat me lek akọn̄, mè irieen̄ owuwa ebi ochicha ichieen̄ ita. 7 Eririeen̄ ke ijeje enun̄unun̄ cha okitat me lek kan̄. Etip unye kan̄ otataan̄ ikana otutuuk ere.

8 Mgbọ Filip, ogwu òkikpulu Jeruselem, omun̄be ibe ke Judas òkibọkọ ijọn̄ sọntiik sọntiik, ke ìkpọkpọ ikitim ikpan̄ isi ge isi ge, igege ikpa ijet Tolemi, ogwu òkikpulu ido Kole-Siria mè ido Fonisia, ikibeek ibe iria ebi akọn̄ inu, inyi enetap ubọk eweek nnwọn mkpulu ogwu ubọọn̄. 9 Tolemi osasan̄a Nikanọ, gwun̄ kè Patirokulọs, ene ge me lek ebi ogbo Unene ogwu Ubọọn̄ ebi ilile, ito me ibot urum akọn̄ môsobe akọp obop ene iba, ìnan̄a me otutuuk ofifi ido geelek, mè ibe echachan ebi Ju esan̄a kpai. Îsan̄a si Gọgiyas, ogwu isi akọn̄ òrọriọọn̄ ukot akọn̄ ijaan̄ itap me lek.

10 Nikanọ ìben me ejit inyanyam ebi Ju etetbe me akọn̄ isa ikpe urieek otitip efie ikpoko alata okuket iba ogwu ubọọn̄ okaan̄be ebi Rom. 11 Me ikafiatge mgbọ, iraria etip ijet ebi ama ìkiluk me agba awaji ibe enelep ebi Ju me lek usun̄, mè ichieek use ibe ke ọmọ mônyam akọp ene onaan̄ge me lek akọp ikpoko alata okuket. Ire, ìkariọọn̄ ibe ke oyerebet Ogwukaan̄ Inyọn̄ mè Ijọn̄ mônitut ọmọ.

12 Judas onenibọkọ etip ibe ke Nikanọ òkisa akọn̄ inu, mè inilook ebi melek kan̄ ibe ke ogwu ochicha òkinu. 13 Ebi ìrere ebi ukpook owot me etete kiban̄, ebi kpetoon̄ ejit me lek unen oyerebet Awaji, elililim inan̄a ifon. 14 Usini ene ekpukpulu otutuuk inu ema ekaan̄be òsisik inyiaan̄, mè isa si mgbọ ya iriaak uriaak ibeek Okumugwem ibe inyan̄a ema me ubọk kè Nikanọ ogwu ikariọọn̄ge Awaji, ogwu òbebene ikinyam ebi kiban̄ itap me usun̄ sabum akọn̄ onibebene me etete kiban̄ melek kan̄. 15 Ema ebe, ire Awaji ìkposa mije kiban̄ inyan̄a ema, mè isa mije inyan̄a-ibot înyan̄abe melek ebi nte nte kiban̄, mè mije erieen̄ kan̄ eyi îsabe igwen ema, òrere erieen̄ òkakaan̄ mgbugbo mè ikup me mbuban. 16 Judas, ogwu ekigwen si Makabiyọs, otititiin̄ urum akọn̄ kan̄, ìsoso obop ene gweregwen, mè ikat ema ejit ibe ekafieek owot me lek ogwu ochicha ya, mè ekatetet ukpook si me lek ikpele urum ebi ofifi ido cha ìbeben akọn̄ ikinu ema lek me ejit ikpak, mè ema etet ejit enye etim akọn̄, 17 mè ekpọ me lek ijo inu ebi ofifi ido cha erọbe isa ifiat ere mbuban kubọk ikan geege ìkakup, mè ike ema erọbe ama Jeruselem inu ochak, mè iben orọmijọn̄ ebi nte nte kiban̄ itọp ifiin̄. 18 Îtumu si inyi ema ibe, “Ife cha esa nroon̄ akọn̄ mè unye-ejit ema ekaan̄be itoon̄ ejit. Ire, utoon̄-ejit kiji ìkup me lek Awaji Ogwukaan̄ Inyọn̄ mè Ijọn̄, ogwu môkọtbe itọp ibot gaalek, jakajaka môbebeen̄ ebi ìkinu eji akọn̄ me lek isan̄a kpai, mè ikerere otutuuk linyọn̄.”

19 Îkeek si ema mgbọ inen mè inen Awaji otapbe ubọk inyi ebi nte nte kiban̄. Îtumu ikọ òfo me lek mgbọ Senakerip osabe efit mè akọp ebi akọn̄ jeeta mè obop go inifiin̄ isan̄a, 20 mè mgbọ ebi Ju etimbe akọn̄ me lek ebi Galesia me Babilonia, mgbọ ya, obop ebi Ju jeeta egọọk obop ebi Mesidonia ini ikeke. Mgbọ akọn̄ onwunwanabe ebi Mesidonia, sa me ntap-ubọk Awaji ònan̄a me akpabin inyọn̄, obop ebi Ju jeeta ya ejijijaka efit mè akọp obop ebi akọn̄ iba ebi Galesia, mè ifum owuwa owuwa inu.

21 Ikọ kechi ke Judas osa ijomo ekwukwu ebi kan̄, mè irọ inyi ema ebem lek ikwukwu mkpa me ibot Ikan kiban̄ melek ido kiban̄. Ineniche ebi akọn̄ kan̄ ukpa ini, 22 mè ito ebi ngwan̄ kan̄, Saimọn mè Josefu mè Jonatan, melek kan̄ me ibot ukpa ge ge. Akọp mè efit ene go ekup me ukpa ge. 23 Inenisan̄a Elieja ibe ibene ida ifuk ikpa mbuban, mè ininyi ema usem ebekisa itiki akọn̄ ibe, “Me ntap-ubọk Awaji!” Ọmọ me lek kan̄ onenisa adasi ukpa ebi akọn̄ ijibi akọn̄ isibi isi ikweek Nikanọ.

24 Mije Ogwukaan̄ Inyọn̄ mè Ijọn̄ ogọọkbe ema ikeke, ema ekpakpan̄ obop ene onaan̄ge me lek ebi ochicha, mè itap unan me lek agan̄ ilile me lek ebi akọn̄ kè Nikanọ, mè ililaba ema isan̄a. 25 Ema mîbọkọ ikpoko me ubọk ebi ìbenilep ebi Ju me usun̄ cha, mè irieen̄ ebi ochicha cha ijọn̄ọ ere, mè igwu ikom mgbọ egwe ofitbe. 26 Mije ofit iwele kan̄ orebe Usen Mbuban ke ema etele irerieen̄ ife cha. 27 Mgbọ ema ebọkọbe nroon̄ akọn̄ ebi ochicha cha, mè ibọkọ ema si inu ema efumbe, ema enenisun̄ Usen Mbuban, mè ikisa ikpele itọn̄ inyi Ogwukaan̄-ene ogwu òsusun̄ ema iban usen keya, mè ikibe ọmọ onirọ, mè isa usen ya irọ usen nsan kan̄ obenebe igwook me lek kiban̄, ebi Ju, kubọk mbat. 28 Mgbọ Usen Mbuban orakabe, ema eneniche usini inu efumbe inyi ebi osusut akọn̄ ya okemebe, mè iche si inyi ebi nwakpa mè ebi kpà-nte, mè iche echi òsisik inyi lek kiban̄ mè nsabọn kiban̄. 29 Eyi itata ema me ubọk, ema egọgọọk otutuuk ene igbaan̄ iriaak uriaak ikibeek Okumugwem ogwu nsan, ibe unaan̄-ejit kan̄ me lek ebi ikwaan̄ kan̄ ita otutuuk isan̄a.

30 Judas mè ebi kan̄ enenisi itim akọn̄ me lek urum ebi akọn̄ kè Timọti mè Bakides, mè ikpan̄ iraka akọp obop ene iba me etete kiban̄, mè ibọkọ owuwa me lek uwu mgban akọn̄ kiban̄ cha òbebene ichep me inyọn̄, mè ifum owuwa inu kiban̄, mè ifele inu cha ìkike iba, mè isun̄ agan̄ ge inyi lek kiban̄, mè isa agan̄ ge keyilọ iche inyi ebi osusut akọn̄ ya okemebe, mè ebi kpà-nte mè ebi nwakpa, melek ebi oka ugane. 31 Ema enenikpulu nroon̄ akọn̄ ebi ochicha cha ema ebọkọbe iriọọn̄ ubọk isun̄ me ere ubọk kiban̄ môgwatbe ire lek, mè isa inu kechilọ efumbe, echi echebe isik, ifo Jeruselem. 32 Ema mîkpan̄ ogwu ibot akọn̄ kè Timọti, òrere atalek ene ikpak òkisisaak ebi Ju enenen. 33 Mgbọ ekirie ijọk ntim-mkpan̄ ya me Jeruselem, uga ama ebi nte nte kiban̄, ema ewọwọp ebi ìtatap ukan̄ iwọp otunchit mbuban cha, òrere Kalisitenis mè ebi melek ìlilibi isi ilileek me emen sọntiik uwu ge. Ikeya ke ebi ife chi ebọkọ mkpukpe ògbegbe nlilọ inu cha ema erọbe.

34 Nikanọ, njijọ lek ogwu ebilene ya, ogwu òsasa obop ebi Rom inu ibe enelep ebi Ju me lek usun̄, 35 onenimun̄ ibe, sa me ntap-ubọk Okumugwem, ke ebi ọmọ okpọbe isiki chieen̄ enenen cha, mîtim akọn̄ ikpan̄ ọmọ. Mgbọ yaage, iwọwọọk uja ofọnti akọn̄ kan̄ ifiin̄, mè ilibi, ọmọ gaalek, kubọk ogwu usun̄, isaba ido ya isi ire Antiọk. Otutuuk inu îkọtbe irọ ìre isasa urum akọn̄ kan̄ inyi ibe ejijaka esan̄a.

36 Sa me ikeya, ogwu òweweek itetet ebi Jeruselem inyam isan̄a isa ikpe otitip mkpulu inyi ebi Rom, otutumu isibi ibe ke ebi Ju mîkaan̄ Ogwu Òje Isi Akọn̄, mije keya, ke kpebekọt itim ikpan̄ ema, bak me lek ema ekigọọk Ikan Ogwu Òje Isi Akọn̄ ya onyibe ema.