16
Ema enenisa okop inyan̄a-ibot Awaji ya inu initap me emen uwu ọfọ Debit ogwuun̄be inyi, mè inigwa ngwugwa echi ewọwọp iriọk melek echi esuuk inyi Awaji. 2 Mgbọ Debit ogwabe ngwugwa echi ewọwọp mè echi esuuk cha isan̄a, inenisa erieen̄ Okumugwem igbana otutuuk ebi Ijeren, 3 mè iniche owut fituru ge ge, mè nchicha mfut asaak, mè nchicha gerep ge ge inyi otutuuk ebi Ijeren geelek, ebirieen̄ mè ebibaan̄.4 Inenigobo usini ebi otoko kè Libai ito me ere okop inyan̄a-ibot Okumugwem ya okupbe ibe ekesi ikwaan̄ eyi ibebeek mbeek, mè itọtọn̄ Okumugwem, Awaji ebi Ijeren, mè ibebe ọmọ onirọ me ibot otutuuk ebi Ijeren. 5 Asafu ore ogwu ibot, Jekaraya ogọgọọk, sabum Jeyen, mè Semiramot, mè Jeyien, mè Matitiya, mè Eliabu, mè Benaya, mè Obedi-Edọm mè Jeyen. Ebibi ebekikwak uneen̄ ile mè uneen̄ ija, sà Asafu obokikwak mkpamkpa. 6 Benaya mè Jayajien ebi ngwugwa ebekiwut otita mgbọ geelek me isi okop inyan̄a-ibot Awaji.
Okwa itọn̄ kè Debit
7 Usen ya ore adasi mgbọ Debit ojeen̄be Asafu mè ebi melek kan̄ ibe ekekọt okwa itọn̄ yi esa eketọn̄ Okumugwem:
8 Ìbe Okumugwem onirọ,
ìtumu erieen̄ kan̄ ìsibi;
ìkpa inu îrọbe ìkana ido geelek.
9 Ìkọt okwa ìnyi ọmọ, ìkọt okwa ìtọn̄ ọmọ;
ìkpa otutuuk uyeke uyeke ikwaan̄ kan̄ ìsibi.
10 Ìsa erieen̄ kan̄ òkup me mbuban
ìgugo lek;
ebi geelek ìkiriaak ọmọ, ìbele ejit.
11 Ìweek Okumugwem,
mè ìweek si unye kan̄;
ìkiweek ntap-ubọk kan̄ mgbọ geelek.
12 Ìkeek uyeke uyeke inu cha îrọbe,
inu ukechieen̄ kan̄ cha,
mè ata oyerebet cha îfieekbe,
13 enyi bọn owot iman kè Ijeren
ogwu ikwaan̄ kan̄,
enyi bọn ebirieen̄ kè Jekọp,
ebi îgobobe inyi lek kan̄.
14 Ọmọ ore Okumugwem Awaji kiji;
ikan kan̄ okikpulu me otutuuk linyọn̄.
15 Ìkikekeek inyan̄a-ibot
înyan̄abe ire mgbọ geelek,a
use îchieekbe ìkikukup ire obop ukot,
16 òrere inyan̄a-ibot înyan̄abe
melek kè Ebereyam;
mè use kan̄ îchieekbe Ajiki.
17 Îrọ use ya inye inyi Jekọp
kubọk ikan kan̄,
mè irọ inye inyi ebi Ijeren
kubọk inyan̄a-ibot òbokup ire mgbọ geelek.
18 Mgbọ ya ke îtumube ibe,
“Mâsa ijọn̄ Kenan inyi owu;
môre ìrot inyi bọn owot iman kwun̄.”
19 Me ike mgbọ ya, ema ìre ene inen me inen gaalek;
kpewawa me otu ifuk;
mè ire si ebi ichen me ijọn̄ Kenan ya.
20 Ema ekijijijen̄e ikana ere
inan̄a me ido ire me ido,
mè inan̄a me ama ubọọn̄ ge isi ofifi.
21 Ire, Awaji ìkachieek ibe
ene geege itutuku ema;
ìkigagana ikọ inyi ebi ubọọn̄
me ibot kiban̄ ibe:
22 “Ikalululuk ìchak ubọk
me lek ebi ngobobe inyi lek n̄a;
ikasasak si ebi nriran n̄a
unan geege me lek!”
23 Ìkọt okwa ìnyi Okumugwem,
enyi otutuuk ebi linyọn̄;
me usen me usen,
ìkilook etip unyan̄a kan̄ îkinyan̄a ene.
24 Ìkpa umin kan̄ ìkana ìnyi ebi ido geelek;
ìkpa si uyeke uyeke ikwaan̄ kan̄
ìnyi otutuuk ebilene.
25 Okumugwem îmin enenen,
mè igbe ogwu ebetọn̄ enenen;
ọmọ ogbe ibe etet ukpook me lek
igak otutuuk ofifi awaji geelek.
26 Mije, otutuuk awaji ebi ofifi ido geelek
ìre mkpọmfaka,
ire, Okumugwem,
ọmọ orom akpabin inyọn̄.
27 Òrirọ mè umin ubọọn̄
ìkakana ọmọ okokop;
unye melek unwọọn̄
ìjojot me Uwu Mbuban kan̄.
28 Enyi ebi ototun̄ ukan̄ geelek me linyọn̄,
ìnyi Okumugwem umin;
ìtumu ìsibi ibe
ke Okumugwem okaan̄ unye.
29 Ìnyi Okumugwem umin
ògbegbe erieen̄ kan̄.
Ìben akpan ngwugwa ìsa ìnu me isi kan̄;
ìtọbọ ebum ìnyi ọmọ,
mije, ọmọ îkup mbuban
me oniin̄ òkup òrirọ òrirọ.
30 Enyi otutuuk ebi linyọn̄,
ìtet ukpook me isi kan̄!
Ọmọ îsun̄ linyọn̄ ikam me irek;
kpebekọt ijujuk isan̄a me akpat.
31 Akpabin inyọn̄, bele ejit;
linyọn̄, nwọọn̄ unwọọn̄;
ìkilook ido geelek
ibe ke Okumugwem òwa me mkpulu!
32 Okwaan̄, owu si,
melek inu geelek òkup me emen kwun̄,
bele ejit, mè gbugbut.
Ijọn̄ uko, owu si,
melek inu geelek òkup me emen kwun̄,
bele ejit!
33 Otutuuk uti òkup me oron
mônenikikọt okwa inwọọn̄ unwọọn̄;
ema mêkọt okwa unwọọn̄ me isi Okumugwem,
mije, ọmọ ògwa òkinu
inenisibi oyerebet inyi ebi linyọn̄.
34 Ìbe Okumugwem onirọ,
mije ke ọmọ înwọn,
mije, imumechieen̄ kan̄
ìkikukup ire mgbọ geelek.
35 Ìtumu ìnyi ọmọ ibe,
“Nyan̄a eji, jei Awaji ogwu unyan̄a kiji;
titen̄e eji me ido geelek sa gwu kom ka,
inyi eji ebe owu onirọ,
mè etọn̄ erieen̄ mbuban kwun̄,
mè esa owu egugo lek.”
36 Itọn̄ ikup inyi Okumugwem,
Awaji ebi Ijeren,
bene me mgbọ geelek si re mgbọ geelek.
Otutuuk ebi ene enenichieek igwook ibe, “Ikup ikeya!” mè itumu si ibe, “Ìtọn̄ Okumugwem.”
37 Debit onenito Asafu mè ebi ngwan̄ ibe ekup ekesi ikwaan̄ usen geelek me ere okop inyan̄a-ibot Okumugwem ya okupbe, ike edọmọbe isun̄. 38 Debit îto si Obedi-Edọm mè akọp ebi ngwan̄ gweregwen mè jeeta ibe egọọk ekesi ikwaan̄ me ere ya. Obedi-Edọm gwun̄ kè Jedutun melek Osa ere ebi ìkibem otunchit.
39 Debit îgobo si Jadọk ogwu ngwugwa mè ebi ngwan̄ ito ibe ekesi ikwaan̄ enyi Okumugwem me Akpatan̄ Mbuban me ere mbuban me Gibiọn, 40 mè ekegwa ngwugwa ewọwọp iriọk me inyọn̄ ntook ngwugwa enyi Okumugwem mgbọ geelek, me ewelegwe mè ikakwun̄, igọọk me otutuuk inu egebe me emen Ikan Okumugwem, eyi înyibe ebi Ijeren. 41 Ebi ìkitap ubọk inyi ema ìre Eyiman mè Jedutun, igbaalek ofifi ebi geelek egobobe mè igwen me erieen̄ ibe egọọk eketọn̄ Okumugwem, “mije, imumechieen̄ kan̄ ìkikukup ire mgbọ geelek.” 42 Ikwaan̄ iwuwut otita mè ikwakwak mkpamkpa, mè ikwaan̄ ikwakwak nkwukwak mgbọ ekikọt okwa itọn̄ inyi Awaji ìkup me ubọk kè Eyiman mè Jedutun. Bọn ebirieen̄ kè Jedutun ke eto ibe ekebem otunchit.
43 Mgbọ erọbe inu chi geelek isan̄a, ebi ene eyayat, ogwu ikup, ofo uwu kan̄. Debit si ofofo isi igbana ebi uwu kan̄.