Awaji mè ebi eyi kan̄
105
Ìbe Okumugwem onirọ;ìtumu erieen̄ kan̄ ìsibi;
ìkpa inu îrọbe ìkana ido geelek.
2 Ìkọt okwa ìnyi ọmọ;
ìkọt okwa ìtọn̄ ọmọ,
ìkpa otutuuk uyeke ikwaan̄ kan̄ ìsibi.
3 Ìsa erieen̄ kan̄ òkup me mbuban ìgugo lek;
ebi geelek ìkiriaak ọmọ, ìbele ejit.
4 Ìweek Okumugwem, mè ìweek si unye kan̄;
ìkiweek ntap-ubọk kan̄ mgbọ geelek.
5 Ìkeek uyeke uyeke inu cha îrọbe,
inu ukechieen̄ kan̄ cha îrọbe,
mè ata oyerebet cha îfieekbe,
6 jei, bọn owot iman kè Ebereyam ogwu ikwaan̄ kan̄,
enyi bọn kè Jekọp, ebi îgobobe inyi lek kan̄!
7 Ọmọ ore Okumugwem Awaji kiji;
ikan kan̄ okikpulu me otutuuk linyọn̄.
8 Ìkikekeek inyan̄a-ibot înyan̄abe ire mgbọ geelek;
use îchieekbe ìkikukup ire obop ukot;
9 òrere inyan̄a-ibot înyan̄abe melek Ebereyam;
mè use kan̄ îchieekbe Ajiki.
10 Îrọ use ya inye inyi Jekọp kubọk ikan kan̄,
mè irọ inye inyi ebi Ijeren
kubọk inyan̄a-ibot òbokup ire mgbọ geelek.
11 Mgbọ ya ke îtumu ibe,
“Mâsa ijọn̄ Kenan inyi owu;
môre ìrot inyi bọn owot iman kwun̄.”
12 Me ike mgbọ ya, ema ìre ene inen me inen gaalek;
kpewawa me otu ifuk;
mè ire si ebi ichen me ijọn̄ Kenan ya.
13 Ema ekijijijen̄e ikana ere inan̄a mè ido ire me ido,
mè inan̄a me ama ubọọn̄ ge ire ofifi.
14 Ire, Awaji ìkachieek ibe ene geege itutuku ema;
ìkigagana ikọ inyi ebi ubọọn̄ me ibot kiban̄ ibe:
15 “Ikalululuk ìchak ubọk me lek ebi ngobobe inyi lek n̄a;
ikasasak si ebi nriran n̄a unan geege me lek!”
16 Okumugwem îtap akan̄ me ido Kenan,
mè ichit otu oniin̄ inorie kiban̄.
17 Ire, ufuna ọmọ inyan̄a ebi eyi kan̄,
iraria ene ge ogwu òdadasi ije;
ene ya ìre Josefu, ogwu enyambe kire usun̄.
18 Mîgon ọmọ mkpọn me ukot, ukot kan̄ obebeek,
mè ikwaan̄ ọmọ mkpọn okwukwut me ebek,
19 mege, inu ya ọmọ obe ke môrọ, orọrọ si;
ikọ Okumugwem orọrọ inye ibe ke Josefu îtumu atikọ.
20 Ogwu ubọọn̄ oraria ibe etọn̄ọ ọmọ eto;
ogwu òkikpulu owuwa ido
osasan̄a ọmọ me mkpọn isibi,
21 mè isa ọmọ ito me ibot mkpulu kan̄,
mè irọ ọmọ ogwu òkitọ ikọ
me lek inu geelek ogwu ubọọn̄ okaan̄be.
22 Ikeya si, îyaka ebi ibot ikwaan̄ mkpulu itap me irak kan̄
ibe inyi nteme ubọk òneme ọmọ,
mè ibe ijeen̄ ebi nteme ogwu ubọọn̄ iriọọn̄-inu.
23 Mgbọ ya ke Jekọp, ogwu ekigwen si Ijeren,
onigọọk iluk me Ijipiti òrere ido kè Am,
mè ikana ogwu ichen me ido ya.
24 Okumugwem orọrọ ebi kan̄ emumana enenen,
mè ekaan̄ unye egak ebi ochicha kiban̄.
25 Îrọ si ebi Ijipiti echa ebi kan̄,
mè eketọt ijo otitọt ebak ema.
26 Mgbọ ya ke îria Mosis ogwu ikwaan̄ kan̄,
melek Erọn ogwu îgobobe, ibe esi Ijipiti.
27 Ema mîrọ ikwaan̄ ukpook,
mè uyeke inu Awaji obe ema erọ me ido kè Am,
òrere Ijipiti.
28 Bak me lek Mosis mè Erọn kpekpaka ikọ kan̄,
Awaji oraria udun itap me otutuuk ido ya.
29 Îrọ okwaan̄ kiban̄ ìkana eje,
mè ikpan̄ irin̄ kiban̄ isan̄a kpai.
30 Àkwọọk oninin̄ ijot ido kiban̄ gbak,
mè inin̄ ire emen agwut ogwu ubọọn̄ kiban̄.
31 Awaji onyinyi ida, ijo nson mè ijo atantan
ejijibi akpa akpa inin̄ ijot otutuuk ido kiban̄.
32 Kpan̄asi ata ibot, iraria ibot mgbọlọ
mè omumen-inyọn̄ iso otutuuk lek ijọn̄ kiban̄.
33 Îjijaka si uko gerep kiban̄ mè uti figi kiban̄ isan̄a kpai,
mè igbugbọ otutuuk uti
òkup me inyọn̄ ijọn̄ kiban̄ igwook.
34 Înyi ida, ebi kè akaka ituuk ekariọọn̄ge otu ifuk enunu,
mè bọn kiban̄ me ego me ego,
35 mè initaka otutuuk mbubet mè njijoon̄ inwan̄
mè inu geelek ewopbe me uko me ido ya
ikpan̄ isan̄a kpai.
36 Îkpan̄ adasi gwun̄ enerieen̄ geelek me ido kiban̄,
adasi mfut ema ekaan̄be mgbọ nsabọn irieen̄ kiban̄.
37 Mgburudun̄, Awaji okpukpulu ebi Ijeren isibi me ido ya;
ema ekwọkwọọk alata araran̄
mè alata okuket isa igbaalek ifon;
kpunu orukan̄ me lek ene geege kiban̄;
otu ukwuuk kiban̄ ìnyenye.
38 Mgbọ ema efonbe, ebi Ijipiti mîbele ejit,
mije, ukpook kiban̄
îgwook ebi Ijipiti mgbugba me lek enenen.
39 Awaji osasa oduku inyọn̄ iwele ikwek ebi kan̄ lek,
mè inyi ukan̄ òkinyi ema utoon̄ me eririeen̄.
40 Ema mîdo Awaji anam itataka,
iraria ekun̄kun̄ ijet ema,
mè inyi ema fituru ònan̄a me isinyọn̄, ema ererie ijot.
41 Îsulu ewuuk ibum, mun̄ ogbugbuku me emen isibi,
mè ikigbọọk me emen èwê kubọk okwaan̄.
42 Mije Awaji ìkawuuk use kan̄;
use mbuban ya îchieekbe Ebereyam
ogwu ikwaan̄ kan̄.
43 Ikeya ke îkpulu ebi eyi kan̄ me unwọọn̄ isibi;
ema ebi îgobobe esasa me ubelejit inan̄a isibi.
44 Îsa ijọn̄ ebi ofifi ido inyi ema,
mè inyi ema uko ebi ofifi ife
ekwookbe ukwook me lek irọ isan̄a,
ema ebọbọkọ isak.
45 Ìrọ ikeya ufuna ebi eyi kan̄ mêsun̄ ikan kan̄,
mè irọ otutuuk inu îtọbe ibe ema erọ.
Ìtọn̄ Okumugwem!