Awaji înwọn melek ebi eyi kan̄
106
Ìtọn̄ Okumugwem;ìbe Okumugwem onirọ, mije ke ọmọ înwọn;
mije, imumechieen̄ kan̄ ìkikukup ire mgbọ geelek.
2 Ekene obokọt ikpa otutuuk ikpele inu ọmọ orọbe isan̄a?
Ekene obokọt itọn̄ ọmọ ubọk îgbebe?
3 Kpọ-nu ikpele ubelejit òkup inyi ebi ìkirọ inu ònenen,
mè ikirọ inu òtatat mgbọ geelek. 13
4 Jei Okumugwem, keek emi
mgbọ okirọ ata inu inyi ebi eyi kwun̄;
mgbọ owu mônyan̄abe ema, nyan̄a emi si gbaalek,
5 ufuna m̀mun̄ inu okije ijaan̄ me lek ebi eyi kwun̄,
mè ǹkaan̄ uche me lek unwọọn̄ ebi ido kwun̄,
mè ǹgọọk ebi owu okaan̄be ǹgugo lek.
6 Eji mîrọ ijo inu kubọk ebi nte nte kiji erọbe;
eji mîrọ inu òfefieek lek,
me atikọ, eji mîrọ inu ikpak ikpak.
7 Ebi nte nte kiji kpekọt itet ibot
me lek uyeke ikwaan̄ owu orọbe me Ijipiti;
ema mîwuuk òjot òjot imumechieen̄
okaan̄be me lek kiban̄;
ema mîkpaka ibot inyi owu me okwaan̄ Anyiaan̄.
8 Ire, owu onyanyan̄a ema mije erieen̄ kwun̄,
isa ijeen̄ ebi ene ibe ke owu okaan̄ ikpele unye.
9 Owu ogana ere inyi okwaan̄ Anyiaan̄,
okwaan̄ ochachiaak,
owu osasa ebi kwun̄ ije itibi ejit okwaan̄ me nchat ijọn̄,
kubọk ìre emen èwê.
10 Ikeya ke owu onyan̄a ema isibi me ubọk ebi oriara kiban̄,
mè itaba ema isan̄a me irak unye ebi ochicha kiban̄.
11 Ire, mun̄ orerie ebi ochicha kiban̄ isan̄a kpai;
ene geege ikeyi me lek kiban̄ ìkasik.
12 Mgbọ ya ke ebi eyi kwun̄ enichieek ikọ kwun̄,
mè ikọt okwa itọn̄ owu.
13 Ire, ìkafifiin̄ mgbọ,
ema ewuwuuk inu owu orọbe inyi ema;
kpekukup ikpọ ibe owu ònyi ema nteme kwun̄.
14 Ebek inorie îkwat ema me emen èwê,
ema etọtọ owu Awaji ikpọ me ere ya òkup wêem.
15 Owu onyinyi ema inu ema edobe;
ire, owu oraria si ijo orukan̄ itap me etete kiban̄.
16 Me emen ere m̀gba-ǹgwele ukan̄ kiban̄ me emen èwê,
ema enenimin ejit me lek kè Mosis mè Erọn,
ebi owu Okumugwem ogobobe
isun̄ esese inyi lek kwun̄.
17 Ijọn̄ ochichili otu ibook,
mè imen Datan ichep,
mè ikana si Abiram mè ebi ogbo kiban̄ ichit bùk.
18 Ukan̄ oseseme me lek ebi melek kiban̄;
alọm ukan̄ otataka ebi òkpaka ibot cha iriọk.
19 Me Orebu, ema mîsa alata araran̄ ibot gwun̄ orie eriembuuk,
mè itọbọ ebum inyi inu ebobot ya.
20 Ema mîyaka umin kwun̄ isa inyi inu ema ebotbe;
inu òbet lek eriembuuk òkitaka mbubet.
21 Ema mîwuuk owu Awaji ogwu ònyanyan̄a ema;
ogwu òkwọkwọkọ ebi Ijipiti ijeek me ibot.
22 Mîwuuk osusut osutbe ebi ido kè Am,
mè uyeke inu echi orọbe me okwaan̄ Anyiaan̄.
23 Eya orọ, owu Awaji onenibe
ke owu môjijaka ema isan̄a kpai;
ire, Mosis, gwun̄ ikwaan̄ kwun̄ ogobobe,
okekeke ikiteek nteek,
mè irọ ibe owu òyaka unaan̄-ejit kwun̄
òbojijaka ema ya òto.
24 Mgbọ eya orakabe, ema ejijit ata ijọn̄ ya òkilọlọk ene ebek,
bak me lek ema kpechieek
me lek use owu ochieekbe ema.
25 Ire, ema ekukup me emen uwu ọfọ kiban̄ ikinunuun̄,
mè ijit inọnọ ikọ kwun̄ Okumugwem.
26 Eya ke owu obene ubọk inyan̄a ibot
ibe ke ema mêkwaan̄ ita me emen èwê;
27 ke owu môchon bọn kiban̄ igwook me ido geelek,
mè iyiyala ema ikana ofifi agan̄ geelek.
28 Ofifi si, ebi kwun̄ mîtap lek
igọọk ikitọbọ ebum inyi Baali ebi Peyọ,
mè ikirie inu ngwugwa
egwabe inyi ebi ìkwakwaan̄.
29 Irọrọ kiban̄ oriribi owu unaan̄-ejit;
ijo orukan̄ obubumu me etete kiban̄.
30 Ire, Fineyas onanan̄a ikeke,
mè isulu ene osusut isasa iteek;
ijo orukan̄ ya osisibi.
31 Eya ke esa ifuk ọmọ ibe ìre ogwu ata irọrọ,
me ukot me ukot ire mgbọ geelek.
32 Me ogbuuruk Meriba,
ema mîrọ ejit inaan̄ owu Okumugwem;
bak me lek keya, Mosis oninin̄ me uyọrọlek.
33 Mije ema eyọọkbe Mosis owot enenen;
Mosis osasa me unaan̄-ejit itumu ikọ ilọ.
34 Owu Okumugwem otọ
ibe ema ekpan̄ ebi ido ìluk me ijọn̄ ya esan̄a,
ire, ema ejijit ikpakpan̄ ife cha isan̄a ubọk otọbe.
35 Kpan̄asi ikeya, ema egbagbaan̄ ifufuku melek ife cha,
mè ikween̄ orọmijọn̄ ife cha ikigọọk irọ.
36 Ema mîtọbọ ebum inyi mkpọmfaka ife cha;
eya onenikana ufe inyi ema.
37 Ema mîsa bọn ebirieen̄ kiban̄ mè bọn ebibaan̄ kiban̄
igwa ngwugwa inyi ijo erumun̄.
38 Sa me ikeyi, ema efafiat eje ebi kpelọ inu geege;
eje bọn ebirieen̄ kiban̄ mè bọn ebibaan̄ kiban̄,
ebi ema esabe igwa ngwugwa
inyi mkpọmfaka ebi Kenan;
eje nsabọn cha ochachaka mbuban me lek ijọn̄ ya.
39 Bak me lek inu ya ema erọbe, ema kpeyaka itana,
mije, ema kpekeke isi me lek kwun̄, Awaji.
40 Owu Okumugwem oneninaan̄ ejit ikeme ebi kwun̄,
mè ijọ ejit me lek ebi owu ogobobe
inyi lek kwun̄ me ìrot.
41 Owu ojijit ema itele inyi ebi ofifi ido;
ema eninin̄ me irak mkpulu ebi ìchacha ema.
42 Ebi ochicha kiban̄ etututuku ema,
mè ikeme ema isiki me irak unye kiban̄.
43 Owu Okumugwem okinyan̄a ema owuwa mgbọ;
ire, ema etọtọt otu,
mè ikpaka ibot inyi owu;
ijo irọrọ kiban̄ okekikeme ema,
mè irọ inyi ema ekabene isi.
44 Ubọk geelek si, owu onọnọ ida ito kiban̄,
mè ikpọ chieen̄ me lek ukwook kiban̄.
45 Owu okeek inyan̄a-ibot kwun̄,
mè ito ema njijin
mije ikpele imumechieen̄ kwun̄ òkikup ire mgbọ geelek.
46 Owu orọrọ mè otutuuk
ebi ìkpukpulu ema me usun̄ akọn̄
ekaan̄ ema ejit nsan me lek.
47 Nyan̄a eji, jei Okumugwem Awaji kiji,
mè titen̄e eji me ido geelek sa ka ido kiji,
inyi eji ebe owu onirọ,
mè etọn̄ erieen̄ mbuban kwun̄,
mè esa owu egugo lek.
48 Itọn̄ ikup inyi Okumugwem, Awaji ebi Ijeren,
bene me mgbọ geelek si re mgbọ geelek.
Kè otutuuk ebi ene etumu ebe, “Ikup ikeya!”
Ìtọn̄ Okumugwem!