IKPA ÒSO GO
Okwa 107–150
Itọtọn̄ Awaji ogwu òkirọ nnwọn
107
Ìbe Okumugwem onirọ, mije, ọmọ înwọn;mije imumechieen̄ kan̄ ìkukup ire mgbọ geelek.
2 Enyi ebi Okumugwem onyan̄abe isibi,
ìtumu ikeya ìtọn̄ ọmọ;
ọmọ înyan̄a enyi isibi me ubọk ebi ìkitutuku enyi,
3 mè iteen̄ enyi me ido ikarege echi kinyi isa ika;
îteen̄ enyi me agan̄ inyọn̄, mè osiki,
mè mbum-ura, mè ichep-ura, isa ika.
4 Usini ene mînyinya ikana emen èwê,
ere kpunube oniin̄ geege;
kpekọt imun̄ ama geege ere ema mêlukbe.
5 Uraafiọọn̄ îtaka ema;
ebek îrak ema;
ogugo îsibi ita ema me lek.
6 Me emen uyọrọlek, ema etataan̄ ukpo igwen Okumugwem;
inyanyan̄a ema isibi me ukwook kiban̄.
7 Awaji îsa ema ije me oniin̄ òtatat,
mè isa ema ifo ama ere ema mêlukbe.
8 Tele ema etọn̄ Okumugwem
bak me lek imumechieen̄ mgbọ geelek kan̄,
mè bak me lek ikwaan̄ ukechieen̄ cha
îrọbe inyi ebilene.
9 Ọmọ înyi ebi ebek orakbe mudim enwọ,
mè inyi ebi uraafiọọn̄ ata inorie erie.
10 Usini ene ekup me emen udun mè uga ufieejit;
ema ìre ebi mkpọn ìkimun̄ ofaak,
melek mkpọn me ukot mè ubọk,
11 mije ema mîje ikeme Ikan Awaji, Ogwu Òbebene Ichit,
mè ikpọ chieen̄ ilọ me lek nteme kan̄.
12 Eya ke îsa unye ikwaan̄ ekinyi ebi usun̄
isulu ema osusut;
ema erururọn̄ọ me ijọn̄;
kpunu ogwu òtatap ubọk ibene ema igwuun̄.
13 Ema enenitaan̄ ukpo igwen Okumugwem;
inyanyan̄a ema me ubọk ebi ìkitutuku ema cha.
14 Îsan̄a ema isibi me udun mè uga ufieejit,
mè ifaan̄ mkpọn esabe igoon̄ ema.
15 Tele ema etọn̄ Okumugwem
bak me lek imumechieen̄ mgbọ geelek kan̄,
mè bak me lek ikwaan̄ ukechieen̄ cha
îkirọ inyi ebilene.
16 Mije, ọmọ îgbugbọ otunchit cha
esabe ekwe inama isa igwuk ikwek ema,
mè ifaan̄ okwukwut cha esabe igoon̄ otunchit cha.
17 Ebi burubut mîkpaka ibot inyi Awaji,
mè irọ ijo inu;
Awaji onyinyi ema ufialek.
18 Inorie geelek ojọjọ ema ejit;
mkpa orere ema chieen̄.
19 Ema etataan̄ ukpo igwen Okumugwem
me emen ujaralek kiban̄;
inyanyan̄a ema isibi me emen ujaralek kiban̄.
20 Îtumu ikọ inyi ema;
lek kiban̄ onyenye;
isusun̄ ema me ògat ugwem.
21 Tele ema etọn̄ Okumugwem
bak me lek imumechieen̄ mgbọ geelek kan̄,
mè bak me lek ikwaan̄ ukechieen̄
îkirọ inyi ebilene.
22 Tele ema egwa ngwugwa onirọ enyi ọmọ,
mè ekọt okwa unwọọn̄ esa ekpa inu îrọbe.
23 Ebi ìkinin̄ uji ile isibi emen awaji;
ema ìre ikpele ebi ewe ìkikọp
me ejit okwaan̄ ikirọ mbubek kiban̄.
24 Ife chi mîkimun̄ inu Okumugwem okirọ;
ikwaan̄ ukpook îkisi me ugwuuk okwaan̄.
25 Ọmọ isinyi ida, uga efet egwijo îra ibene,
mè otap ogbururu òchit okwaan̄.
26 Ekoon̄ îra ibene uji ile ichep me inyọn̄ tọi,
mè òyaka ogele osiki odọk òchep gbọ̀k;
ibot ejit kiban̄ îra iwulu itele ema
mije gbologbolo isi mun̄.
27 Ema mîra ikije gbegbegbe mè lọlọlọ kubọk ebi miin̄ osabe;
ifuk-ibot geelek ema ekaan̄be
isa ikikọp okwaan̄ îra ita itele ema.
28 Ema mîra ikup me uyọrọlek kiban̄
itaan̄ ukpo igwen Okumugwem;
îra inyan̄a ema isibi me emen ukwook kiban̄.
29 Okumugwem ìkirọ egwijo iwọ,
mè orọ ekoon̄ ilaak,
inyi isi mun̄ okwaan̄ ilọkọ.
30 Ejit îra ibele ema, mije okwaan̄ osikibe;
Awaji îra ibem ema
mege isi itoon̄ me atasuk ama ema eweekbe itotoon̄.
31 Tele ema etọn̄ Okumugwem
bak me lek imumechieen̄ mgbọ geelek kan̄,
mè bak me lek ikwaan̄ ukechieen̄
îkirọ inyi ebilene.
32 Tele ema etumu umin kan̄ esibi
me emen ntitiin̄ ebi eyi kan̄,
mè etọn̄ ọmọ me ere ebi ugane ama etitiin̄be.
33 Okumugwem îrọ ibe okwaan̄ ikana èwê,
mè irọ okwaan̄ òkigbugbuk ikana ijọn̄ òchachat.
34 Ijọn̄ òkisibi mfut îkana ijọn̄ uchi uchi,
bak me lek inu ikpak ebi ìluk me lek ijọn̄ ya erọbe.
35 Îrọ èwê ikana èdọ mun̄,
mè irọ ijọn̄ òchachat
ikana ogbuuruk òkigbuk mun̄ isibi,
36 mè isa ebi uraafiọọn̄ inu
inigwook me ere ya ibe eluk;
ema echichili ama me ere ya iluk.
37 Ema ewowop uko me ere ya,
mè iwop si gerep,
mè irọkọ mfut owuwa owuwa.
38 Awaji îgbana si ema;
ema emumumana enenen;
ìkachieek ibe urum eriembuuk kiban̄ ise.
39 Ire, ike mgbọ ema ebenebe ikise me otu ifuk,
kpeyaka ikọt ibene isi
bak me lek tukutuku mè ùrioon̄, mè ufieejit,
40 Okumugwem orọrọ ebi ilile kiban̄ cha inu ochak,
mè irọ inyi ema enyinya ekana emen èwê;
ere kpunube oniin̄ geege ijeje.
41 Ire, itataba ebi eyi kan̄, ebi una, isibi me ufialek,
mè irọ ema emaan̄ bọn me ototun̄ ukan̄ kiban̄,
kubọk arọọn̄ mè eriembuuk ekimaan̄.
42 Ebi ata irọrọ emumun̄ inu chi, mè ibele ejit;
ire, otu ebi ìkirọ ikpak ochichit bùk.
43 Ene geelek òkakaan̄ iriọọn̄-inu, itet ibot me lek inu chi,
mè ikeek ikpele imumechieen̄
Okumugwem okaan̄be mgbọ geelek.