Uriaak ikeme ebi ochicha
Okwa. Okwa kè Debit.
108
Jei Awaji, mbieen̄ ejit inye me lek kwun̄;mâkọt okwa isa itọn̄ owu me otutuuk ibot ejit n̄a.
2 Uneen̄ ile n̄a mè uneen̄ ija n̄a, ìnan̄a ìkeke!
Mânan̄a ikeke ikwak uneen̄ sabum egwe ònowele.
3 Jei Okumugwem,
mâbe owu onirọ me isi ebi ido geelek;
mâkọt okwa itọn̄ owu me etete ebi ido geelek,
4 mije imumechieen̄ okaan̄be mgbọ geelek me lek kiji
îmin ire akpabin inyọn̄;
ikeya si ke atikọ kwun̄ obene ichak me isinyọn̄.
5 Jei Awaji, kè ebilene emin owu
esaba eraka akpabin inyọn̄;
kè etọn̄ ujamgbugbo kwun̄ ekana eso otutuuk linyọn̄.
6 Sa unye kwun̄ nyan̄a eji sibi;
nọ uriaak n̄a, inyi owu ònyan̄a eji
ebi owu omun̄be me chieen̄.
7 Awaji ìkup me Uwu Mbuban kan̄ itumu ibe,
“Ntim ikpan̄ ebi Sekem mè ebi Sukot;
mâche ama Sekem,
mè idọmọ iteke ijọn̄ Sukot inyi ebi n̄a.
8 Ijọn̄ Giliadi ìre eyi n̄a;
ijọn̄ ebi Manasi si ìre eyi n̄a;
ebi Iferem ebekire ebi akọn̄ n̄a;
sà Juda ore uwu
ere ogwu ubọọn̄ ngobobe obonan̄a isibi.
9 Ebi Mowabu ebekisi ikwaan̄ inyi emi;
ebi Edọm ebekire usun̄ inyi emi;
ire ebi Filisia, m̀batitim ikpan̄ ema,
mè ikitaan̄ ukpo iwulu òkô.”
10 Ìre ekene obosa emi isi akọn̄ me Edọm?
Ìre ekene obosa emi isi, inyi ǹsi ǹtim m̀kpan̄ Edọm,
unye ama ya mgban okanabe?
11 Jei Awaji, ìre òjijit eji itele ni?
Ìre owu òkpofat igọọk urum akọn̄ kiji isibi isi akọn̄ ni?
12 Tap ubọk nyi eji me lek ogwu ochicha kiji,
mije, ntap-ubọk ogwu ebilene okitap ìre inu ikike.
13 Eyi Awaji okekeke me agan̄ kiji,
eji mêtim ikpan̄ ikpele ikpele,
mije, ọmọ môjak ibot ebi ochicha kiji ikpukpuku.