Nana-lek ogwu uyọrọlek okitet
Ìkup inyi ogwu òjeen̄ okwa. Okwa kè Debit.
109
Jei Awaji, ogwu nkitọn̄,kakpọkpọ ìriaan̄ emi ìkup koon̄!
2 Ebi òkpaka ibot mè ebi ataak
mîyaka otu igwook emi me lek;
ema ekikan̄ ataak itoon̄ emi.
3 Ema ekisa me ochicha chieen̄
ikilo emi ikana ere okokop;
ema ekitim emi akọn̄ me lek
me kpunube inu geege nrọbe ilọ.
4 Ubọk geelek mmun̄be ema me chieen̄,
mè ikiriaak uriaak me ibot kiban̄,
ema ekichacha emi.
5 Ema esa ijo inu ikpe emi me lek ata inu nrọbe ema,
mè isa ochicha ikpe emi me useen̄ imumechieen̄ n̄a.
6 Jei Awaji, gobo ogwu nnaan̄ to,
inyi isibi oyerebet me ibot ogwu ochicha n̄a;
rọ inyi ene ge me lek ebi ochicha kan̄
itoon̄ ọmọ ikọ môtipbe ọmọ oyerebet.
7 Mgbọ ekisibi oyerebet me ibot kan̄,
rọ ibe oyerebet itip ọmọ;
mgbọ ọmọ môkiriaak ibe, “Soso,”
rọ ibe emọnọ uriaak kan̄ kubọk ìre ijo inu.
8 Kè ugwem kan̄ ire mgbidim;
kè ofifi ene ibọkọ irek ikwaan̄ kan̄!
9 Kè bọn kan̄ ekana bọn kpà-nte,
mè nwa kan̄ si ikana nwakpa!
10 Kè bọn kan̄ ekejijen̄e ekana ebeek inu,
mè ekesi erọọn̄ inorie me inyọn̄ otiton.
11 Kè ebi îkaan̄be urieek efum otutuuk inu îkaan̄be esan̄a,
mè ebi ichen ekpulu inu
îkwukwulube ikaan̄ esa efon.
12 Kè ene geege ikarọrọ ọmọ nsan;
ene geege ikatoto si bọn îkwube itele njijin.
13 Kè bọn owot iman kan̄ ekwaan̄ eta;
mè erieen̄ kan̄ ichep, ikakup ìraka ukot òbogọọk.
14 Okumugwem, kawuuk ijo inu ebi nte nte kan̄ erọbe;
katele si ijo inu echi nga kan̄ orọbe.
15 Kè ijo inu kiban̄ ikanan̄a owu me ejit;
inyi owu òrọ ibe ewuuk ema esan̄a isi ge me linyọn̄;
16 mije, ọmọ ìkirọ nnaan̄ enenen,
mè òkorọ ikpak me lek ebi ugbọọn̄, mè ebi una,
mè òkokpan̄ ebi ijo irek.
17 Ọmọ ìkima igbogbo ene, ogbo si okup inyi ọmọ;
ọmọ ìchacha igbagbana ene, ugbana si ìlilibi ọmọ lek.
18 Ogbo ìkakinan̄a me otu kan̄,
kubọk ofọnti ìkakinan̄a me akpalek kan̄;
eya orọ, kè ogbo imimini inin̄ ọmọ lek kubọk mun̄,
mè ije inin̄ ọmọ otu ukwuuk kubọk aran̄.
19 Kè esa ogbo kan̄ ewele echit ọmọ lek kubọk ekwut,
mè esa ekana ọmọ ebọp mgbọ geelek kubọk fanti.
20 Okumugwem, soso,
echicha ore osusut mbe owu òsut ebi ochicha n̄a;
ikeya ke emi mweek ibe owu
òrọ ebi ìkitumu ijo ikọ ibak emi.
21 Ire, Okumugwem Awaji n̄a,
tap ubọk nyi emi mije erieen̄ kwun̄,
mè nyan̄a emi
bak me lek nnwọn okirọ mije imumechieen̄ okaan̄be.
22 Emi ìre ogwu ugbọọn̄ mè ogwu una;
ejit îfieek emi ire lek ekpọọk.
23 Ugwem n̄a òkire lek itata,
kubọk ogugo obochep me otu ikakwun̄;
egegen̄ emi ifiin̄ kubọk ekigen̄ akaka ituuk me lek inwan̄.
24 Akpatukot îwọ emi bak me lek ijijin otu;
lek îtak emi ita.
25 Nkana inu ochak inyi ebi ene;
ema isimun̄ emi, mîra ikisisik ibot.
26 Jei Okumugwem, Awaji n̄a, tap ubọk nyi emi;
nyan̄a emi, mije imumechieen̄ okikaan̄ mgbọ geelek.
27 Jei Okumugwem, rọ mè ebi ochicha n̄a eriọọn̄ ibe
ke îre owu onyan̄a emi;
rọ inyi ema emun̄ ubọk ikwaan̄ kwun̄ me lek n̄a.
28 Eya orọ, ema isikigbo emi, owu môkigbana emi;
ema isinu emi etim me lek, owu môrọ ema esip;
ire, emi ogwu ikwaan̄ kwun̄ mâkibele ejit.
29 Rọ esip ichit isi ebi ochicha n̄a
kubọk ìre ofọnti ke ema etap;
sa esip kat ema lek kana kubọk ekwut.
30 Mâsa otu n̄a ibe Okumugwem onirọ ikpele ikpele;
mâtọn̄ ọmọ me emen ntitiin̄ ebi eyi kan̄,
31 mije, îkeke ogwu una me udun̄,
mè inyan̄a ọmọ me ubọk ebi ìtitip ọmọ oyerebet mkpa.