Okwa isasa itọn̄ Ogwu Òrom
104
Ibot ejit n̄a,tọn̄ Okumugwem!
Jei Okumugwem Awaji n̄a, owu omin enenen;
owu osa òrirọ mè umin ubọọn̄
iwele ichit lek kwun̄ kubọk ekwut.
2 Owu osa utoon̄ ibala lek kubọk ofọnti,
mè iyat akpabin inyọn̄ iwele isaak kubọk uwat-ura.
3 Owu onama ere olukbe
me inyọn̄ isi mun̄ òkup me akpabin inyọn̄;
oduku inyọn̄ ke osa ikikọp lek kwun̄ ije kubọk uji,
mè ikisa efet irọ uwop ikọp lek kwun̄ ikana.
4 Owu òsa efet irọ ebi osat kwun̄,
mè isa omumen-inyọn̄ isun̄ ebi ikwaan̄ kwun̄.
5 Owu òtọtọbọ ọdọ eyi linyọn̄ inye,
ìkpokọt isisik mege ire mgbọ ikakaan̄ge itata.
6 Mgbọ obenebe inu irom,
owu osa mun̄ iwele ichit linyọn̄ kubọk òtap ọmọ ofọnti;
mun̄ ya omemeen̄ ebi kè ogoon̄.
7 Ire, mgbọ owu oganabe ere inyi mun̄, ililibi;
mgbọ osookbe ida kubọk isinyọn̄ inyi,
iteteen̄ ekot ikaan̄,
8 mè igbọọk me inyọn̄ ogoon̄ igwook me emen iteke,
ere osun̄be inyi ọmọ.
9 Owu onyi ọmọ okike ere ìboje iyaka;
ere ya ke ìbokeke, ìkposaba iraka;
ìkpoyaka ikpọk ibaak ichit linyọn̄ ofifi.
10 Owu orọ ibe ogbuuruk
igbuk mun̄ igwook me emen iteke ijọn̄,
okwaan̄ okekigbuk itibi agbagba ogoon̄.
11 Ebi kè anam oron ekakaan̄ mun̄ inwọ;
ebi kè inyinya akpan echi oron eneninwọ isiki ebek.
12 Unọn òwulu me inyọn̄ ìnama uwu me agba mun̄ cha,
mè ikup me inyọn̄ uti me ere ya ikikọt okwa.
13 Owu okiria ibot me akpabin inyọn̄ igwook me inyọn̄ ogoon̄;
ugbana kwun̄ îra ikijot linyọn̄.
14 Owu orọ ibe mbubet itibi inyi ebi kè anam etaka;
mè irọ uti ewowop itibi inyi ebilene esa erọ ikwaan̄,
ufuna inorie inan̄a me ijọn̄ isibi.
15 Ikeyi si ke miin̄ isasa irọ ejit ene ikibele osibi,
mè aran̄ isasa irọ isi ene ikitoon̄,
mè inorie isasa itap ene efuuk me emen.
16 Okumugwem ìkigbagbala chieen̄ ikpọ uti kan̄,
uti olik echi îwopbe igwook me oron Lebanọn.
17 Ere ya ke ebi kè unọn ekinama uwu kiban̄,
mè ebi kè aba mbese èkeluk me inyọn̄ uti alaga inwan̄.
18 Inyọn̄ ogoon̄ òbebene ìkup inyi ebi kè ebot oron iluluk;
sà agbagba ikpele ewuuk cha
okup inyi ikpi emen ewuuk ilelet lek.
19 Owu orom onyan̄ ibe ire inu isasa ikifuk ibot mgbọ;
ura îriọọn̄ mgbọ ọmọ okinim.
20 Owu okisa udun inu,
îra inikana eririeen̄,
mgbọ ebi kè anam oron geelek ekisibi ibọm urie.
21 Mgbọ ya ke bọn egbe àtat
ekigbin ikana igọọk anam ema mêchimbe;
ema ekinya ikana ikiweek inorie me ubọk Awaji.
22 Ura isibum, ema mîra igwu ikom
ifon emen okpot kiban̄,
isi itọbọ ifi.
23 Mgbọ ya, ebilene mîra ikisibi ije isi ikwaan̄ kiban̄,
mè isi ikirọ nninaan̄ kiban̄ mege ire ikakwun̄.
24 Jei Okumugwem, ikwaan̄ kwun̄ îwa enenen;
iriọọn̄-inu ke osa irọ ema otutuuk;
inu owu orombe ìjojot linyọn̄.
25 Emen awaji ọmọ òwa,
îmin mgbugbo ile,
mè iwele isaak;
inu owu orombe ìjojot emen, ìkakaan̄ otu ifuk;
echi ikpele ikpele ọmọ òwa;
echi asasa si ọmọ òwa.
26 Îre emen awaji ke uji ile okije;
emen kan̄ si ke mgbugbo anam ejit okwaan̄,
eyi owu orombe ito, ibe ikifit ikana, oluk.
27 Otutuuk kiban̄ ekikpọ owu chieen̄
ibe owu ònyi ema inorie mgbọ îlọkbe ema.
28 Owu osinyi ema, ema mîra irie;
owu osichili ubọk inyi ema, ata inu îra ijot ema owot.
29 Owu osigba udun̄ ifit ema, ema mîra ikiran;
owu osibọkọ ema efuuk kiban̄, ema mîra ikwaan̄ mkpa,
mè ikana ntitaak ijọn̄ eyi ema erebe.
30 Owu oria Ekwukwu kwun̄ inu,
mè isa me ikeya irom ema;
owu orọ inu geelek me linyọn̄ ikana ayaya.
31 Kè umin Okumugwem ikup ire mgbọ geelek;
kè Okumugwem ikaan̄ ubelejit me lek inu îrombe!
32 Ọmọ isikọọn̄ chieen̄ ikpọ linyọn̄,
linyọn̄ îra isisik;
ọmọ isichak ubọk me lek ogoon̄,
ogoon̄ îra ibumu oduku.
33 Mâkọt okwa inyi Okumugwem otutuuk ugwem n̄a;
mâkọt itọn̄ inyi Awaji n̄a
mgbọ geelek mâlukbe ugwem ire.
34 Kè inu chi nkikeek ibak ọmọ itop ọmọ me lek;
mije, ǹkibele ejit me emen Okumugwem.
35 Kè ejijaka ebi ijo esan̄a kpai me linyọn̄,
mè ebi òkpaka ibot etata enọọn̄.
Ibot ejit n̄a tọn̄ Okumugwem!
Ìtọn̄ Okumugwem!