Imumechieen̄ Awaji
Okwa kè Debit.
103
Ibot ejit n̄a, tọn̄ Okumugwem;nriro geelek òkup me lek n̄a,
ìtọn̄ erieen̄ kan̄ òkup me mbuban!
2 Ibot ejit n̄a tọn̄ Okumugwem;
kawuuk nnwọn kan̄ geelek.
3 Ọmọ îtele otutuuk ijo n̄a,
mè igwa orukan̄ n̄a geelek.
4 Ọmọ onyan̄a emi me ubọk mkpa,
mè isa imumechieen̄ kan̄
melek nsan kan̄ igwuk ikana emi.
5 Ọmọ onyi emi ata inu geelek òkilọk emi;
eya orọ nkisek, mè inye lek kubọk igo.
6 Okumugwem îsibi unen oyerebet inyi ebi ekitutuku,
mè inyi ema unen kiban̄ geelek.
7 Îchili nkeek kan̄ ijeen̄ Mosis,
mè irọ ebi Ijeren emun̄ ikwaan̄ unye ọmọ osibe.
8 Okumugwem îjot me atata nnwọn,
mè ikaan̄ ejit nsan;
ìkakigwat lek ìnaan̄ ejit;
imumechieen̄ kan̄ òkikup ire mgbọ geelek ìre òjot òjot.
9 Ìkakifieek ene ikọ otutuuk mgbọ;
ìkakiben unaan̄-ejit me ejit ìre mgbọ geelek.
10 Ìkakinyi eji osusut òkekem me lek ijo inu kiji;
ìkakikpe si eji mkpukpe òsoso nlilọ inu kiji.
11 Ike akpabin inyọn̄ obenebe
inan̄a ijọn̄ọ ere me ijọn̄ ire,
ikeya ke imumechieen̄ kan̄ me lek ebi ìkimin ọmọ omin ire.
12 Ike agan̄ mbum-ura ojọn̄ọbe ere inan̄a me agan̄ ichep-ura ire,
ikeya ke îben nrọ-nlọ kiji ijọn̄ọ ere isan̄a eji me lek ire.
13 Ike ute okikaan̄ ejit nsan me lek ebi bọn,
ikeya ke Okumugwem okikaan̄ ejit nsan
me lek ebi ìkimin ọmọ;
14 mije, ọmọ îriọọn̄ ubọk ọmọ orombe eji,
ìkawuuk ibe ke eji ìre ntitaak ijọn̄ ikike.
15 Ire eji ebilene, ugwem kiji ìbet lek mbubet;
eji ekitibi mè ejaan̄ lek kubọk ajakajak òkup me oron.
16 Efet isiwut igwook me lek,
îra ichiaak, mè ogen̄ òta;
chieen̄ ene ìkayaka ìrieen̄ me lek ofifi.
17 Ire, bene me mgbọ geelek si re mgbọ geelek,
imumechieen̄ Okumugwem
ìkikukup me lek ebi ìkimin ọmọ;
nnwọn kan̄ ìkire lek bọn bọn;
18 ìkire lek bọn bọn ebi ìkitet inyan̄a-ibot kan̄ inye,
mè ikisun̄ ikan kan̄.
19 Okumugwem îyik ogboon̄ ubọọn̄ kan̄ me emen inyọn̄;
ọmọ ore ubọọn̄ me ibot mkpulu geelek.
20 Ìtọn̄ Okumugwem, enyi ebi osat kan̄;
enyi ebi unye ìkirọ otu ikọ kan̄,
mè ikigban̄ utọn̄ me ida ikọ kan̄.
21 Ìtọn̄ ọmọ, enyi ebi urum akọn̄ emen inyọn̄,
ebi ikwaan̄ kan̄ ìkirọ inu îweekbe.
22 Ìtọn̄ Okumugwem enyi inu geelek îrombe;
enyi ebi ìkup me ere geelek ọmọ okikpulu.
Ibot ejit n̄a,
tọn̄ Okumugwem!