Uriaak ogwu ukwook okitet
Uriaak ogwu ufialek okitet òkinina lek inyi Okumugwem mgbọ ogugo kan̄ owulube.
102
Jei Okumugwem, gban̄ uriaak n̄a,mè nọ ukpo nkitaan̄ ibeek ntap-ubọk.
2 Kagba udun̄ ìfit emi mgbọ nkupbe me ufialek;
soso, nọ mbeek n̄a,
mè nye lek gwat lek fọọk emi otu mgbọ ngwenbe owu.
3 Usen ugwem n̄a òkije kubọk oduku ònininiin̄ ichep;
otu ukwuuk n̄a òkiyok emi ukan̄ kubọk ototun̄.
4 Ejit n̄a îmun̄ ufialek,
mè ichiaak ita kubọk mbubet ebọn̄be imem;
inorie otu ìkayaka ìlọk emi.
5 Nto mfi mege,
mè iwọlọ ikup uti uti.
6 Ǹnikititeek ikana kubọk edene òkup me emen èwê,
kpunu ere ntetbe lek iriaak;
ǹkinyinya kubọk ikwurikwu òluk ama òyayat,
kpunu ere nletbe lek.
7 Ilaak ìtata emi me chieen̄ isan̄a kpai,
ǹnikup kubọk unọn ibot ge
òsọsọọk me inyọn̄ otoon̄-uwu,
kpunu ogwu òkat emi ejit.
8 Ebi ochicha n̄a ekichachak emi ochak eririeen̄ mè ikarek;
ebi ìkisa emi ito mbele,
ekigbo ene ibe ekup ubọk nkupbe.
9 Ǹkitaka achiaan̄ kubọk inorie,
mè ikimeen̄ mun̄ ito n̄a kubọk mudim,
10 bak me lek onaan̄be ejit,
mè ikaan̄ uyok-ejit me lek n̄a,
mè ikpana emi itọp ifiin̄.
11 Usen ugwem n̄a mônita,
kubọk ogugo obochep me otu ikakwun̄,
ǹchachiaak ita kubọk mbubet.
12 Ire, owu Okumugwem, ìre ubọọn̄ ire mgbọ geelek;
etip kwun̄ môtaan̄ ire ukot geelek.
13 Soso, tọbọ jibi,
mè kaan̄ njijin me lek ama Sayọn;
mgbọ itoto ọmọ nsan îre,
mgbọ keyi ore mgbọ òtatat.
14 Ebi ikwaan̄ kwun̄ mîma ọmọ
ire lek ewuuk kan̄ egbugbọbe igwook,
mè ikaan̄ si njijin me lek
achiaan̄ ònan̄a me lek kan̄ igigen̄e igwook me ijọn̄.
15 Ebi ido geelek mênyi erieen̄ Okumugwem ulibi;
otutuuk ebi ubọọn̄ geelek me linyọn̄
mêtet si ukpook me lek unye kan̄.
16 Mije Okumugwem môkpọk inama Sayọn;
mgbọ ya, ujamgbugbo kan̄ môsibi utoon̄.
17 Ọmọ mônọ uriaak ebi una ubọk,
mè irọ mbeek kiban̄ inyi ema.
18 Ìge etip yi ìtap me ikpa ìban ebi ukot òkinunu,
ufuna ebi kpemaman-nu mênitọn̄ Okumugwem.
19 Okumugwem îkup me uwu kan̄ me emen inyọn̄
isiki chieen̄ ikpọ;
ìkup me emen inyọn̄ iruk chieen̄ ikpọ linyọn̄.
20 Ìkiweek inọnọ ito ebi ìkup me mkpọn,
mè itọtọn̄ọ ebi ebekpakpan̄ itele.
21 Ìkiweek ibe ebi ene etumu erieen̄ Okumugwem esibi
me Sayọn,
mè etọn̄ si ọmọ me Jeruselem,
22 mgbọ ebi owuwa ido mè ama ubọọn̄ mêtitiin̄be
inenitọbọ ebum inyi Okumugwem.
23 Owu orọ efuuk ita emi me owot me ugwem n̄a;
owu òkpochieek ibe ǹluk usen ugwem n̄a ǹso.
24 Jei Awaji, soso,
kachieek ibe m̀fan̄a ǹkwu me mgbidim ugwem n̄a;
eyi kwun̄, Okumugwem,
owu òkikukup nan̄a me ukot re me ukot.
25 Akarake akat ke owu otọbọ ọdọ linyọn̄,
akpabin inyọn̄ ìre ubọk ikwaan̄ kwun̄.
26 Ema mêchieen̄ ita, ire, owu môbia;
ema mêjeen̄ ita kubọk njeen̄ ekwut;
owu môtọp ema ifiin̄ kubọk ekifiin̄ oka ekwut;
ema kpebeyaka ikup.
27 Ire, owu òkikup ubọk yaage okupbe;
ugwem eyi kwun̄ ìkakaan̄ mgbọ itata.
28 Bọn ebi ikwaan̄ kwun̄
mêluk inye me irak mbem eyi kwun̄;
bọn bọn kiban̄ si mêluk ikam me isi kwun̄.